Уйғур паалийәтчилириниң телефон, елхәтлири вә уйғур тор бәтлири һуҗумға учриди

Радиомиз игилигән учурлардин мәлум болушичә, "26 - июн шавгүән вәқәси" вә "5 - июл үрүмчи вәқәси"ниң бир йиллиқи мәзгилидә, хитай һөкүмити уйғур елидә қаттиқ бихәтәрлик тәдбирлири алған. Охшаш бир мәзгилдә йәнә чәтәлләрдики уйғур паалийәтчилириниң телефон, елхәт алақиси һәм чәтәлләрдики уйғур тор бәтлириму хаккерларниң һуҗумға учриған.
Мухбиримиз миһрибан
2010.06.30
Urumqi-7-5-Uyghur-pajiesi-Xitay-zomigerligi-305.jpg YouTube Дин елинған бу сүрәтләр кириштүрмисидә, 5 - ийул үрүмчи қанлиқ вәқәсидин кейин чәтәл мәтбуатлириниң хәвәрлиридә берилгән көрүнүшләр, йәни 7 - ийул күнидики уйғур айаллириниң намайиши җәрйанида айаллар вә балилиларниң учриған муамилиси, 13 - ийул күни йүз бәргән хитай сақчилириниң 2 уйғурни етип өлтүргәлик вәқәси, шундақла 6 - ийулдин кейин, үрүмчидики хитай пуқралириниң қандақ қоралланғанлиқи вә урүмчи кочилирида уйғурларни "овлап" йүрүп, уйғурларни уруп өлтүрүшлири көрситилгән.
YouTube Дин елинди.

Өткән һәптә уйғур аптоном район даирилири уқтуруш чиқирип, мәтбуатларда һәм идарә, җәмийәт, мәктәпләрдә "26 - июн шавгүән вәқәси" һәм "5 - июл үрүмчи вәқәси" гә даир учурларни хәвәр қилмаслиқ, бу һәқтә тохталмаслиқни тәләп қилған иди. Игилишимизчә, 28 - июн дүшәнбидин башлап йәнә үрүмчи, қәшқәр, ғулҗа қатарлиқ шәһәрләрдә кочиларда сақчилар көпәйтилип, чарлаш күчәйтилгән. Үрүмчидики фаң ханимниң 29 - июн радиомизға билдүрүшичә, һөкүмәт даирилири бу бир нәччә күндә пуқраларниң сиртқа аз чиқиши тәләп қилинған, бәзи җайларда 4 - 5 - июл күнлири дәм елишқа қоюп берилидиғанлиқи уқтуруш қилинған.

Радиомиз игилигән учурлардин мәлум болушичә, бу бир нәччә күндин буян, чәтәлләрдә паалийәт елип бериватқан уйғур актиплириниң телефонлири һәм елхәтләргә болған һуҗум күчәйтилгән. Шуниң билән бир вақитта чәтәлләрдики уйғур тәшкилатлириниң тор бәтлири һәм пуқралар тәрипидин қурулған уйғур тор бәтлириму намәлум хаккерларниң һуҗумиға учриған.

Чәтәлләрдики уйғур актиплиридин, һазир америкида яшаватқан, дуня уйғур қурултийиниң ички ишлар мудири илшат һәсән әпәнди бүгүн зияритимизни қобул қилип, өткән һәптидин буян өзиниң телефони һәм елхәт сандуқиға қаритилған һуҗум күчәйгәнликини, буниң хизмәт һәм күндилик турмушиға қулайсизлиқларни елип кәлгәнликини билдүрди.

Илшат әпәнди сөзидә йәнә, нөвәттә чәтәлләрдә паалийәт елип бериватқан уйғур актиплирила әмәс, бәлки чәтәлләрдә қурулған уйғур тор бәтлириниңму хаккерлар тәрипидин һуҗумға учраватқанлиқини илгири сүрүп, өзиниң бу һәқтики қаришини оттуриға қойди.
 
Әрк телевизийиси бултур 9 - айда голландийидә қурулған уйғур тилидики тор телевизийиси болуп, бир нәччә күндин буян бу тор бекити хаккерларниң һуҗумиға учрап тақилип қалған иди. Бүгүн тор бекитиниң саһиби абдурахман өзтүрк әпәнди зияритимизни қобул қилип, тор бекитиниң 26 - июндин буян хаккерларниң һуҗумиға учрап тақилип қалғанлиқини, өзлириниң һазир тор бекитини әслигә кәлтүрүш үчүн җиддий ишләватқанлиқини билдүрди.

Чәтәлләрдики уйғур тор бәтлиридин йәнә, вәтиним тор бекитиниң админлиридин бири болған османҗан әпәндиму бүгүн зияритимизни қобул қилип, тор бекитиниң тақилип қелиш сәвәби һәққидә тохталди.

Илшат әпәнди нөвәттә чәтәлләрдә уйғур тор бәтлириниң хаккерлар тәрипидин үзлүксиз һуҗумға учришидики сәвәбләр һәққидә тохтилип, буниң хитай һөкүмитиниң уйғур аптоном район даирисидә, бултур районда йүз бәргән "5 - июл үрүмчи вәқәси" дәк кәң көләмлик наразилиқ һәрикәтлириниң қайта йүз беришидин әнсиригәнлики сәвәбидин хаккерлар арқилиқ, чәтәлләрдики уйғурларға қозғиған бир қетимлиқ һуҗуми икәнликини илгири сүрди.

Юқиридики аваз улинишидин, бу һәқтики мәлуматимизниң тәпсилатини аңлайсиләр.

 
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.