Әхмәтҗан шәрдиноф қазақистан хәлқи ассамблейисиниң муавин башлиқи болуп сайланди

Сүрәттә, президент н. Назарбайеф қазақистан хәлқ ассамблейисиниң орунбасар рәисликигә сайланған "уйғурларниң җумһурийәтлик мәдәнийәт мәркизи" җәмийәтлик бирләшмисиниң рәиси әхмәтҗан шәрдиноф қатарлиқларни тәбриклимәктә.

Йиғинға 70 мәмликәтниң вәкиллири, дипломатийилик вакаләтханилар вә хәлқара тәшкилатларниң башлиқлири, қазақистанниң мәркизий иҗраий органлири, җумһурийәтлик вә районлуқ етно - мәдәний бирләшмиләрниң рәһбәрлири, парламент депутатлири, сиясий партийиләр вә диний конфессийиләр вәкиллири вә башқилар қатнашти.

Астана йиғинида сөзгә чиққан қазақистан хәлқи ассамблейисиниң рәиси, президент нурсултан назарбайеф йиғин қатнашқучилирини қазақистан хәлқи ассамблейисиниң 15 йиллиқ тәвәллуди билән қизғин тәбриклиди.

У, қазақистан дөлитиниң дәсләпки күнлиридин башлапла, хәлқләр достлуқи вә бирликигә чоң әһмийәт берилгәнликтин, қазақистан хәлқиниң мәқсәт вә вәзипилири бир нишанға - қазақистанниң гүллинишигә, униң хәлқарадики һөрмитиниң өсүшигә, аһалиниң турмуш - тирикчилики дәриҗисиниң яхшилинишиға, тинчлиқ вә хатирҗәмликниң тәминлинишигә қаритилғанлиқтин қазақистанниң бу утуқларға еришкәнликини алаһидә тәкитлигән. Президент бу җәрянда дөләт асасий қануни вә хәлқ ассамблейисидин ибарәт икки улуқ қәдрийәтниң мәзкур утуқларни қолға кәлтүрүшкә земин яратқанлиқини әскәрткән.

Президент н. Назарбайеф хәлқарадики вәзийәт, болупму дуняниң һәр қайси җайлиридики етнослар ара тоқунушлар, уларниң келип - чиқиш сәвәблирини ениқлаш, һәл қилиш йоллирини изләш, хәлқләр вә дөләтләр ара достлуқни вә ишәнчни күчәйтиш мәсилилири үстидиму тохталған.

Йиғинда сөзгә чиққучилар президент н. Назарбайефниң ассамбилейиниң бүгүнки күндики ишиға, әлниң тәрәққияти һәмдә хәлқләр вә динлар оттурисидики бирликни вә разимәнликни қолға кәлтүрүштики паалийитигә юқири баһа бәрди.

Шундақла миллий бирликни мустәһкәмләшкә мунасип һәссә қошқини үчүн ассамбилейиниң бәзи әзалири "қазақистан хәлқи ассамблейисиниң җәмийәтлик 'бирлик' алтун медали" билән мукапатланди һәмдә ассамбилейә рәисиниң йеңи орунбасарлири сайланди.

Бу лавазимға қазақистан окраинлириниң рада иттипақиниң президенти юрий тимошенко вә "уйғурларниң җумһурийәтлик мәдәнийәт мәркизи" җәмийәтлик бирләшмисиниң рәиси әхмәтҗан шәрдиноф сайланди.

Юқиридики аваз улинишидин, бу һәқтики мәлуматимизниң тәпсилатини аңлайсиләр.