Gollandiyide wakaletsiz milletler teshkilatining yighini bashlandi

Bu qétimqi yighin'gha u n p o wekilliri, denxag sheherlik hökümetning rehberliri hemde köpligen xelq'ara siyasiyonlar we mutexessisler ishtirak qilghandin sirt, Uyghurlargha wakaliten wakaletsiz milletler teshkilati ijra'iye komitéti ezasi dolqun eysa ependi, d u q ning yawropa parlaméntidiki alahide wekili memet toxti ependilermu qatnashqan.

Dolqun eysa ependi 11-féwral küni denxagta téléfon ziyaritimizni qobul qilip, xelq'ara adalet mehkimiside bashlan'ghan wakaletsiz milletler teshkilati qurulghanliqining 20 yilliqini xatirilesh murasimidin melumat berdi.

Échilish murasimida yawropa parlaménti wekilliri we bir qisim siyasiyonlar, mutexessisler mustemlike milletlerning öz teqdirini özi belgilesh témisida nutuq sözligendin tashqiri, wakaletsiz milletler teshkilatining qurulushi üchün zor hesse qoshqan erkin aliptékin ependi we dalay lama wekillirining tebrik xetlirimu oqup ötülgen.

Yighinda yene, eyni chaghda mustemlike astida qalghan, wakaletsiz milletler teshkilatigha eza bolghan, hazir bolsa öz teqdirini özi qoligha alghan musteqil döletler toghrisida tejribe-sawaqlar yekünlen'gen hemde wakaletsiz milletler teshkilatining 20 yildin béri élip barghan xelq'araliq pa'aliyetliridin xulase chiqirilghan. 

11-Féwral küni chüshtin kéyin, gaga sheherlik hökümet binasida mustemlike milletlerning azab-oqubetlirige a'it resim körgezmisi ötküzülgen. Bu körgezmige Uyghurlargha munasiwetlik resimlermu qatnashturulghan.

Dolqun eysa ependi bergen melumatqa asaslan'ghanda, 12-we 13-féwral künliri wakaletsiz milletler teshkilati ijra'iye komitétining ichki yighini chaqirilip, xizmet pilanliri muzakire qilinidiken we yéngidin ezaliqqa iltimas sun'ghan milletler teshkilatlirining mesililiri qarap chiqilidiken.