'Halal we haram' namliq kitab neshirdin chiqti

Yéqinqi zaman tarixida Uyghur élide bashlan'ghan yéngi islamiy oyghinish herikitining asas salghuchiliridin biri bolghan, Uyghur perzentlirining pakistan, se'udi erebistani we misir qatarliq islam memliketliridiki ali bilim yurtlirida ilim tehsil qilish yolini achqan, ataqliq diniy alim, meshhur jama'et erbabi merhum muhemmed abdulla mexsum hajimning oghli wetenperwer yash alim abdujélil turan ependining teklimakan Uyghur neshriyati teripidin "islam dinidiki halal - haram, musulmanlar üchün cheklen'gen ishlar " namliq eser neshirdin chiqti.
Muxbirimiz ömerjan toxti
2008-12-25
Share

Abdujélil turan ependi, uygurlar.net We uyghurweb.net Qatarliq Uyghurche torlarning sahibi, teklimakan Uyghur neshriyatining qurghuchisi bolup, u oqushini awwal dadisida, andin pakistan we misirlarda tamamlighandin kéyin hayatini millitige xizmet qilish yoligha atap kéliwatqan bolup, hazirghiche jemi 70 parchidin köprek kitab neshir qilip weten ichi we sirtidiki Uyghur perzentlirige tarqatqan. 

Abdujélil turan ependi bizning bu heqtiki söhbitimizni qobul qilghan idi.

Abdujélil turan ependi bilen söhbet

Abdujélil turan ependi mezkur kitabni tonushturup mundaq dédi: " "islam dinidiki halal - haram, musulmanlar üchün cheklen'gen ishlar" namliq bu eser neshirdin chiqti. Bu Uyghurlar arisida tonulup kelgen, " islamdiki a'ile tüzümi, islam eqidiliri, namaz, zakat, roza qatarliq kitablarning aptori teripidin yézilghan eser bolup, bu uning en axirqi esiri hésablinidu, bu kitabni keng Uyghurlargha tarqattuq."

Bu kitabning alahidiliki

Abdujélil turan ependi mezkur kitabning alahidiliki heqqide mundaq dédi:" bu kitabning xéli köp alahidilikliri bar. Men ikki muhim alahidilikini éytip bérey, birinchidin chet'ellerde oquwatqanlarning yazghanlirigha sélishturghanda, bu kitabning tili nahayiti yaxshi, aptorning bashqa kitabliriningmu tili yaxshi emma bu kitabning tili alahide yaxshi chiqqan. Ikkinchidin bu kitab chüshinishlik, herkim chüshineleydighan, Uyghur til qa'idisige muwapiq bolghan delil ispatlarni az keltürüp ixcham hazirlan'ghan."

Bu kitabning silawyanchisi yéqinda neshirdin chiqidu

Abdujélil turan ependi mezkur kitabning yéqinda silawyanchi nusxisiningmu neshirdin chiqidighanliqi heqqide mundaq dédi:" biz 2000 - yillardin burun bir qanche parche silawyanche kitab chiqarghan bolsaqmu, ottura asiyagha ewetish ishining qiyinliqidin qayta chiqarmighan iduq. Emdi bu kitabning muhimliqigha qarap, bu kitabni nuqtiliq bir kitab dep sanap uning silawyanchi nusxisinimu neshir qilishni oylashtuq. Uni neshir qilip qazaqistan we qirghizistanlargha, shundaqla yawropadiki Uyghur dostlargha ewetip bérimiz.

Yawropadiki Uyghurlarningmu diniy kitablargha éhtiyaji köp

Abdujélil turan ependi yawropada yashaydighan Uyghurlarning diniy kitaplargha éhtiyajliq ikenliki heqqide mundaq dédi:" Uyghurlarning telepliri bar. Chünki yawropadiki Uyghurlarning sanining köpiyishige egiship, ularning diniy kitaplargha bolghan éhtiyaji kündin kün'ge ashmaqta. Ularmu özlirining diniy étiqadini saqlap qélish yolida diniy kitaplargha zor éhtiyajliq bolmaqta."

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet