Xitay démokratchilirining 2008 chaqiriqnamisi heqqide

Mushu ayning béshida, xitaydiki bir türküm meshhur ziyaliylar, adwokatlar we kishilik hoquq pa'aliyetchiliri birlikte , xitayning démokratiyilishishini otturigha qoyghan bir chaqiriqname élan qilghan idi.
Muxbirimiz shöhret hoshur
2008-12-22
Élxet
Pikir
Share
Print

Bu chaqiriqname hazirgha qeder 2008 xartiyisi, 2008 nizamnamisi, 2008 chaqiriqi dégen namlarda atilip kelmekte. Chaqiriqnamige deslepte 300 kishi imza qoyghan bolup, nöwette imza qoyghuchilarning sani 5000din ashqan.

Chaqiriqname 3 bölümdin teshkillen'gen bolup, birinchi bölümide xitayning yéqinqi yüz yilliq siyasi tarixidiki démokratiye , erkinlik küreshliri we tejribe sawaqlar, ikkinchi bölümide bolsa, arzu qiliniwatqan yéngi siyasiy tüzülmining asasiy prinsipliri؛ üchinchi qismida bolsa, siyasiy tüzülme islahati üchün derhal bésishqa tégishlik qedemler bayan qilin'ghan.

Chaqiriqnamida, döletni bashqurushtiki 6 asasiy prinsip otturigha qoyulghan, bular, erkinlik, insan heqliri, barawerlik, jumhuriyetchilik, démokratiye we qanuniyliqtin ibarettur.

Chaqiriqnamidiki asasliq teshebbuslar, yéngi asasiy qanun berpa qilish, üch xil hoquqni ayrish, démokratik saylam arqiliq xelq iradisige wekillik qilidighan parlaméntni qurup chiqish , edliye orunlirini musteqil qilish؛ armiyini partiyige boysunidighan emes , asasiy qanun'gha boysunidighan qilish , fédéral jumhuriyet qurush arqiliq étnik we yerlik mesililerni hel qilish qatarliqlardur. Chaqiriqnamida derhal bésilidighan qedemler süpitide, aldi bilen 4 ‏ - iyun tyen'enmén weqesige qaytidin baha bérish, barliq siyasiy tutqunlarni qoyup bérish we ulargha tölem tölesh, axbarat erkinlikini qoyup bérip, oxshimighan pikir, oxshimighan qarashlargha sorun bérish, ammiwiy teshkilatlarni, diniy pa'aliyet sorunlirini, diniy pa'aliyetchilerni hökümetning testiqidin ötküzüsh tüzümini bikar qilish؛ oxshimighan qarashtiki kishilerning teshkilatlargha uyushushi, partiye qurushi we hakimiyetke ishtirak qilishigha yol échish؛ nahiye, sheher we ölke derijilik saylam komitétlirini tesis qilish, hökümetni xelq qurush, xelq bashqurush we xelq üchün xizmet qildurush.

Chaqiriqnamining étnik we yerlik mesililerge alaqidar qismi konkrét bayan qilinmighan؛ bu qisimda xongkong we makawda nöwette mewjut bolghan erkinlikni dawamlashturush, teywen mesilisini démokratiye we erkinlikke kapaletlik qilip , muresse yoli bilen hel qilish, az sanliq milletler rayonidiki mesililerde aqilane bolup, barliq étnik we diniy guruppilarni memnun qilish teshebbus qilin'ghan.

Nöwette mezkur chaqiriqnamige imza qoyghuchilarning sani hökümet we dölet ichi - sirtida bolup köpiyip barmaqta. Buning bilen xitay ichide tesiri zoraymaqta.

Bügün chéx jumhuriyitining sabiq prézidénti, Vaclev Havel bayanat élan qilip, xitay hökümitini sabiq chéxoslowakiye hökümitidin ders élishqa we 2008 chaqiriqnamisige qulaq sélishqa chaqirdi.

Xitay démokratlirining 2008 chaqiriqnamisi, sabiq chéxoslowakiyede 1977 ‏ - yili élan qilin'ghan 77 chaqiriqnamisini ülge alghan. Chéxoslowakiyede élan qilin'ghan 77 chaqiriqnamisi, chéxoslowakiyining démokratiyilishishi we bölünüshige seweb bolghan idi.

Bügün 2008 chaqiriqnamisining layihiligüchisi lyu shawboning béshigha kelgen künler eyni waqit 77 chaqiriqnamisini layihiligen sabiq prézidént Vaclev Havel ningmu béshigha kelgen.

Toluq bet