Amérika sériq déngizda, xitay sherqiy déngizda ötküzidighan herbiy meshiqler peyda qilghan diplomatiye jiddiyliki

Xitay armiyisining sherqiy déngizda étish meshiqi élip baridighan waqti bilen amérika bilen jenubiy koriyining sériq déngiz da birleshme herbiy meshq élip baridighan waqti toghra kélip qaldi. Bir nechche kündin buyan bu ikki herbiy meshiq toghrisida diplomatiye jehette jiddiylik boluwatidu.
Muxbirimiz weli
2010-06-29
Élxet
Pikir
Share
Print
Amérika we jenubiy koriye sériq déngizda, xitay sherqiy déngizda  herbiy meshiq élip barmaqchi bolup, sürette bu ikki déngizning jughrapiyilik orni körsitilgen.
Amérika we jenubiy koriye sériq déngizda, xitay sherqiy déngizda herbiy meshiq élip barmaqchi bolup, sürette bu ikki déngizning jughrapiyilik orni körsitilgen.
http://nf.nfdaily.cn Din élindi.

Shinxu'a agéntliqi 6‏ - ayning 28 ‏ - küni Xitay armiyisining déngiz qisimliri bu yil élip baridighan herbiy meshiqini 10 kün aldigha sürüp, uni 6‏ - ayning 30 ‏ - künidin 7‏ - ayning 5 ‏ - künigiche sherqiy déngizda ötküzülidighan étish meshq dep békitti, dep jakarlidi. Bu, amérika bilen jenubiy koriyining yillardin buyan sériq déngizda birleshme meshq ötküzidighan waqtigha toghra kelgen idi.

'Xitayning sherqi déngizdiki étish meshiqi awi'amatkilarni chöktürüshni meqset qilidighan meshiq'

Xitayning 'xelq géziti'de bolsa, xitay armiyisining 91765 belgilik déngiz floti sherqi déngizda ötküzidighan étish meshqining, tamamen amérikining awi'amatkilirini chöktürüshni meqset qilghan meshq ikenliki, hetta 'amérikining awi'amatkisi sériq déngizgha kirsila uni derhal ' chöktürüwétish ' üchün heriket qollinidighan meshiq ikenliki tilgha élinip turdi.

Amérika bilen jenubiy koriyining sériq déngizdiki herbiy meshqining derijisi shimaliy koriye peyda qilghan weqe tüpeylidin derijisi örlitilgen

Amérika awazining bayan qilishiche, amérika bilen jenubiy koriyining bu yil sériq déngizda ötküzidighan herbiy meshqining derijisi, jenubiy koriyining herbiy paraxoti shimaliy koriyining hujumigha uchrighan weqe tüpeylidin örlitilgen. Shunglashqa bu meshiqqe, amérikining 'jorj washin'gton' belgilik eng chong yadroluq awi'amatka urushchi paraxotlar topi qatnashturulmaqchi bolghan. Démek amérika bilen jenubiy koriyining bu yil sériq déngizda ötküzidighan herbiy meshiqi, jenubiy koriyining herbiy paraxoti shimaliy koriyining hujumigha uchrighan weqege qaritilghanliqi üchün xitay bilen shimaliy koriyining zitigha tegken.

Xitay bayanatchisi ching gang 'her ikki terep özini tutuwélishi kérek' dep jakarlidi

Roytrs agéntliqining bayan qilishiche, xitay tashqi ishlar ministirliqi bayanatchisi chin gang bügün muxbirlarning so'allirigha jawab bergende, xitayning sherqiy déngizda ötküzidighan étish meshiqi amérikigha qaritilghanliqini étirap qilmidi. U 'azadliq armiyining jenubiy déngizda ötküzidighan étish meshiqi, amérika bilen jenubiy koriyige qaritilghan emes, biz hazir bu ikki chong meshiqning bir waqitqa toghra kélip qalghanliqidin ibaret bundaq bir mesilige jiddiy diqqet qiliwatimiz. Her ikki terep özini tutuwélishi we rayon xaraktérlik jiddiylik peyda qilmasliqi kérek' dep jakarlidi.

'Xitayning 022 belgilik téz paraxotliri bir yushurun xéyim - xeter'

Amérika awazining bayan qilishiche, teywenning herbiy mutexessisi li wéy bügünki mulahiziside 'xitayning bu qétim sherqiy déngizda ötküzidighan étish meshqining tigh uchi, del amérika bilen jenubiy koriyining sériq déngizda ötküzidighan herbiy meshiqige qaritilghan. Xitay bu qétimqi étish meshiqige, bashqurulidighan bomba orunlashturulghan 022 belgilik téz paraxotlirini qatnashturidu. Bu bir yushurun xéyim - xeter' dep bayan qilghan.

'Bir - birige ot échish éhtimalliqi az, chünki ikki terepning küch sélishturmisida nahayiti chong perq bar'

Xongkong herbiy mutexessisi ma dingshéngning köz qarishi buninggha oxshimaydu. Uning qarishiche, sériq déngiz bilen sherqiy déngizning ariliqi yéqin emes, oxshimighan jayda boluwatqan herbiy meshiqtin bir - birige ot échish éhtimalliqi az, uning üstige amérika - jenubiy koriye terep bilen xitay terepning herbiy esliheliri we herbiy küchide nahayiti chong perq bar.

'Xitay - shimaliy koriye - amérika otturisida kimning yüriki pok - pok ikenlikini sinaydighan bir waste '

Washin'gton pochtisi gézitining bayan qilishiche, amérika bilen xitayning herbiy meshiq ötküzidighan waqti oxshashla iyun éyining axirigha orunlashturulghanliqi, her xil éhtimallar tüpeylidin, sherqiy déngiz diplomatiyiside jiddiylik peyda qildi. Bu jiddiylik emeliyette, xitay - shimali koriye - amérika otturisida kimning yüriki pok - pok ikenlikini sinaydighan bir waste bolup qaldi.

Yuqiridiki awaz ulinishidin, bu heqtiki melumatimizning tepsilatini anglaysiler.

Toluq bet