10 مىڭ خىزمەت گۇرۇپپىسى، 42 مىڭ ھۆكۈمەت كادىرلىرى پۇقرالارغا كومپارتىيىگە بوي سۇنۇش، بۆلگۈنچىلەرگە قارشى تۇرۇش، ئىناق جەمئىيەت بەرپا قىلىش تەربىيىسى ئېلىپ بارماقتا.
شىنخۇا ئاگېنتلىقىنىڭ 17-ئاپىرىلدىكى خەۋىرىگە قارىغاندا، خىتاي ھۆكۈمىتى ئۇيغۇر ۋەتىنىدە 10041 خىزمەت گۇرۇپپىسى تەشكىللەپ 87 ناھىيە-شەھەردىكى 694 يېزا-بازار، 92 كوچا باشقارمىسى، 7590 كەنت، 1251 مەھەللە رايونىدا ئۇيغۇرلارغا قارىتا مېڭە يۇيۇش ئوپېراتسىيىسى ئېلىپ بارغان. ئاپتونوم رايونلۇق پارتكوم تەرىپىدىن بۇ يىل 2-ئايدىن باشلاپ تەشكىللەنگەن بۇ خىزمەت گۇرۇپپىسىدىكى مېڭە يۇيۇشقا مەسئۇل ئەمەلدارلارنىڭ سانى 42883 كىشىگە يەتكەن. ئۇلار بارغانلا جايدا پارتىيىگە سادىق بولۇش، مۇقىملىقنى ھەممىدىن ئەلا بىلىش تەربىيىسى ئېلىپ بارغان. قىزىل بايراق چىقىرىش، قىزىل ناخشىلارنى ئوقۇش، ئاكتىپ ئىپادە بىلدۈرۈش پائالىيەتلىرىنىڭ دەبدەبىسى ھەممە يەرنى قاپلىغان. «قانۇنسىز دىنىي ھەرىكەتلەرنىڭ 26 ئىپادىسى»، «ئۇزۇن مۇددەتلىك ئەمىنلىكنى ئەمەلگە ئاشۇرۇش توغرىسىدا سوئال-جاۋابلار»، «مىللىي سىياسەت توغرىسىدا تاللانمىلار» دېگەندەك كىتابلار ئۆگىنىش تېمىسى قىلىنغان. مىللىي بۆلگۈنچىلەرگە، تېررورچىلارغا، ئەسەبىي دىنىي كۈچلەرگە قارشى تۇرۇش ئاساسى مەزمۇن قىلىنغان بۇ ئوپېراتسىيە تۈپەيلى قانچە مىليون ئۇيغۇرنىڭ ئاۋارە قىلىنغانلىقى نامەلۇم.
ئاۋسترالىيىدىكى ئۇيغۇر مۆتىۋەرلىرىدىن ھۈسەن ھەسەن ئەپەندى خىتاي يولغا قويۇۋاتقان بۇ سىياسەتنى «دۇنيادا مىسلى كۆرۈلمىگەن ئاقتېررورلۇق» دەپ ئاتىدى. ئۇ سۆزىدە، ئۇيغۇرلارنىڭ مۇستەملىكە تارىخىدا بۇنداق كەڭ كۆلەملىك مېڭە يۇيۇش ھەرىكىتىنىڭ بولۇپ باقمىغانلىقىنى، جاڭ چۈنشيەننىڭ ۋاڭ لېچۈەندىنمۇ ئەشەددىيلىشىۋاتقانلىقىنى ئەسكەرتتى. خىتاي يولغا قويۇۋاتقان بۇ باستۇرۇش ھەرىكىتىنىڭ ئۇيغۇرلارنى يەنە بىر قارشىلىق ئۈچۈن مەجبۇرلاۋاتقانلىقىنى ھەم تەربىيىلەۋاتقانلىقىنى تەكىتلىدى.
قەشقەر، خوتەن، ئاقسۇ رايونلىرى بۇ قېتىمقى مېڭە يۇيۇش ئوپېراتسىيىسىنىڭ نۇقتىلىق مەركەزلىرىگە ئايلانغان بولۇپ، قەشقەر پارتكوم تەشۋىقات بۆلۈمىنىڭ 17-ئاپىرىلدىكى مەلۇماتىغا ئاساسلانغاندا، مىللىي بۆلگۈنچىلەرگە، رادىكال دىنىي كۈچلەرگە قاتتىق زەربە بېرىش پائالىيەتلىرى بۇ رايونلاردا تېخىمۇ ئەۋجىگە چىققان. كۆزەتكۈچىلەرنىڭ قارىشىچە، 5-ئىيۇل ئۈرۈمچى ۋەقەسىدىن كېيىن ئىناق جەمئىيەت بەرپا قىلىش، مۇقىملىقنى ئەمەلگە ئاشۇرۇش شوئارى ئىزچىل تەكىتلىنىپ كېلىنگەن، قارايىلپىز ئالاھىدە ساقچى ئەترىتى بۇ رايونغا ئورۇنلاشقان، ئەڭ قاتتىق باستۇرۇش تەدبىرلىرى يولغا قويۇلغان بولسىمۇ، خىتاي ھۆكۈمىتىنىڭ ۋەزىيەتنى تىزگىنلەش خىزمىتى ئانچە ئۈنۈملۈك بولمىغان. ئۆتكەن يىلى خوتەن ۋە قەشقەردە ساقچىخانىغا ھۇجۇم قىلىش، خىتاي پۇقرالىرىغا ھۇجۇم قىلىش ۋەقەلىرى يۈز بېرىپ، كۆپلىگەن ساقچى ۋە پۇقرالار ئۆلگەن. 19 خىتاي ئۆلكىسىنىڭ ئۇيغۇر ۋەتىنىدە ھالقىما تەرەققىيات يارىتىش پىلانىمۇ خەلقنى ئالدىيالمىغان. ئۇيغۇر جەمئىيىتىدىكى ھاكىمىيەتكە بولغان نارازىلىق، قارشىلىق كەيپىياتلىرى ھېچ تۆۋەنلىمىگەن.