Хитай - берма чегрисидики җиддийлик тоғрисида бүгүнки йеңи учурлар
Мухбиримиз вәли
2009.08.28
2009.08.28

AP Photo
Шинхуа агентлиқиниң тәсвирлишичә, берма 10 полк әскирий күчи билән кокаң райониға зәһәрлик чекимлик ақтуруш үчүн киргәндә , қариму - қарши тәрәпләр өз - ара етишип кәткәндин кейин, бу райондики хитайлар питрап кәткән. 1989 - Йили берма һөкүмити билән бу район оттурисида йәрлик қораллиқ қисимларни сақлап қелиш шәрти билән келишим түзүлгәндин кейин давамлишиватқан чегра содиси һазир тохтиған.
Б б с ниң баян қилишичә, берминиң кокаң районидики һөкүмәткә қарши қораллиқ күчләр 27 - авғуст күни берминиң лаос билән чегрилинидиған җайдики бир сақчи идарисиға һуҗум қилип, уни ишғал қиливалған. Шуниңдин кейин бу районда вәзийәт техиму җиддийләшкән.
Чин гаңниң бу һәқтики баянати
Ройтрс агентлиқиниң бейҗиңдин баян қилишичә, хитай ташқи ишлар миниситирлиқиниң баянатчиси чин гаң бүгүн бу һәқтә баянат елан қилип, қаттиқ тәләппуз билән 'берма өзиниң ички мәсилилирини яхши бир тәрәп қилиши лазим' дегән вә йәнә 'бермидики хитай пуқралилирини яхши қоғдиши лазим' дәп тәкитлигән.Бүгүнгә қәдәр бермидин хитайниң йүннән өлкисигә қечип кәлгән адәм сани 30 миңға йәтти
Б д т мусапирлар мәһкимисиниң баянатчиси андирәҗ махиҗи бүгүн, берма қисимлири билән берминиң кокаң районидики хитайларниң қораллиқ күчлири оттурисида тоқунуш йүз бәргәндин кейин, бүгүнгә қәдәр бермидин хитайниң йүннән өлкисигә қечип кәлгән адәм сани 30 миңға йәткән.Хитайниң бермиға чегридаш болған йүннән өлкисиниң нәнсән шәһәрчиси бермидин қачқан хитай мусапирларни торар җай вә йемәк билән тәминләшкә башлиған. Франсийә агентлиқиниң баян қилишичә, б д т ниң мусапирлар мәһкимиси һазир йүннәндики бу мусапирлар лагири билән алақә қилишқа башлиған.
Берма даирилири чөкүп кәткән бир белиқчилиқ парахотини сүзүш җәрянида икки нәпәр хитай пуқрасиниң җәситини байқиған
Шинхуа агентлиқниң баян қилишичә, 8 - айниң 24 - күни дилова портидин 3 деңиз чақирим йерақлиқта (рангун шәһиридин 10 чақирим йерақлиқтики деңиз йүзидә ) , һава райи нормал әһвал астида чөкүп кәткән бир белиқчилиқ парахотини берма даирилири сүзүш җәрянида, икки нәпәр хитай пуқрасиниң җәситини байқиған, йәнә 14 нәпәр хитай пуқраси техичә тепилмиған.Түнүгүн хитайниң бермида турушлуқ баш әлчиханисиниң ениқлишичә, бу парахот хитайниң ниңбо шәһиридики бир белиқчилиқ ширкитиниң берма билән һәмкарлишип һәрикәт қиливатқан парахоти икән.
Америка ташқи ишлар мниситирлиқи берма - хитай чегрисида йүз бериватқан вәзийәтни җиддий көзитиватиду
Америка авазиниң баян қилишичә, бермида дөләтниң һәрбий қисимлири билән һөкүмәткә қарши йәрлик қораллиқ күчләр оттурисида җиддий уруш йүз берип, берминиң кокаң райондики чегра хәлқи хитайға қечишқа башлиғандин кейин, америка ташқи ишлар мниситирлиқи бу районда йүз бериватқан вәзийәтни җиддий көзитиватиду.'Йәр шари вақити гезити'ниң хәвиригә қариғанда, бу райондики тоқунушниң хитай районлириға кеңийип кетишидин сақлиниш үчүн, хитай һөкүмитиму аллиқачан берма билән чегридаш районларға қораллиқ сақчи қисим әвәтип болған . Һазир бу районда оқ - зәмбирәк авази үксимәйватиду.
Бу вәзийәт, мәйли қайси җәһәттин болмисун, хитайниң мәнпәәти үчүн интайин зиянлиқ
Германийә авазиниң бүгүн елан қилған обзорида баян қилинишичә, һазир хитай бермида су електир истансиси, су тосмиси ясаватқан вә чәтәлләрдин алған нефитлирини берма арқилиқ әкилиш үчүн нефит турубиси ясашқа җидидий тәйярлиқ қиливатқан иди. Йеқинда берма һөкүмәт армийиси билән берминиң кокаң районидики қораллиқ күчләр оттурисида йүз бәргән тоқунуш он миңлиған адәмниң хитайға еқип керишгә сәвәбчи болди.Гәрчә вәқә йүз бәргән райондики кокаңларниң әскирий күчи 1500 дин ашмисиму, әмма улар һазир шу райондики берма һөкүмитигә қарши 20 миң әскири бар ва қушунлири дәп атилидиған йәнә бир һәрбий күч билән бирлишип һәрикәт қилишқа йүзлинип, вәзийәт техиму мурәккәплишиватиду. Бу, мәйли қайси җәһәттин болмисун, хитайниң мәнпәәти үчүн интайин зиянлиқ. Хәлқара мунасивәтләр ноқтисидин ейтқандиму, берма һазир хитайдин ибарәт бундақ бир чоң дөләтниң тәләплиригә псән қилмайватиду, хитай буниңдин қаттиқ хапа болидиғанлиқи ениқ.