Xitay général lyu yaju xitay kompartiyisini üzül - késil islahatqa chaqirdi

Bügün'ge qeder xitay öktichi küchliri we ziyaliyliri arisida xitay kompartiyisini démokratik islahatqa chaqiridighan teklipler xéli köp chüshken bolsimu, kompartiyining ichidin, bolupmu yuqiri hakimiyet qatlimidin, islat chaqiriqini otturigha qoyghuchilar köp bolmighan.
Muxbirimiz shohret hoshur
2010.09.09
Share on WhatsApp
Share on WhatsApp

5 ‏ - Awghust küni Xitay xelq azadliq armiyisining générali lyu yaju, xongkongda chiqidighan sumrugh heptilik zhurnilida pikir bayan qilip, xitay kompartiyisini siyasiy tüzülmide üzül - késil islahat élip bérishqa chaqirghan.

Général lyu yaju, xitay kompartiyisi merkizi komitétining ezasi we intizam tekshürüsh komitétining parixorluqqa qarshi emeldarliridin biri.
 
U ötken hepte, xongkongda chiqidighan sumrugh heptilik zhurnilida pikir bayan qilip, xitay dölitining nöwette hayat - mamatliq bir tallashqa duch kelgenlikini, eger aldimizdiki 10 yilda üzül - késil islahat élip barmisa, sowét ittipaqigha oxshash gumran bolidighanliqini eskertken.

U sözining béshida, junggo sherqi déngizda amérika bilen küch talashqiche, amérikining qanun sistémisini qobul qilip özini halakettin qutquzushi kérek dégen. U, "eger bir dölet öz xelqining erkinlikini boghsa, öz xelqining ijadchanliqini cheklise, heqiqiy wekillik salahiyiti bar rehberlerni chetke qaqsa, bu tüzüm yiqilishqa mehkumdur," dep körsetken. U amérikini qudret tapquzghan pul we téxnika emes, belki mustehkem qanun we tüzümdur؛ sowét ittipaqini yiqitqan bashqa nerse emes, belki muqimliqini hemmining üstige qoyuwélish we adaletni chetke qéqish dep chüshendürgen.

Général lyu yaju eslide xitay xelq azadliq armiyisi hawa armiye qismining mu'awin siyasiy komissari bolup u yéqinda dölet mudapi'e uniwérsitétining siyasiy komissarliqigha östürülgen. Uning bayan qilishiche, nöwette xitay jem'iyitini, yuqiridin töwen'giche pulgha choqunush xahishi qaplighan, étiqad we exlaq yoqsuzlashqan. Yene uning qarishiche, yalghuz pulningla qudritige ishen'gen millet, qalaq we hamaqet millettur.

Xitayda nöwette del mushu xil alametler körülmekte. Xitay halakettin qutulush we iqtisadiy tereqqiyatni dawamlashturush üchün choqum, mustebit tüzümdin waz kéchishi we derhal démokratik islahatni bashlishi kérek.

Lyu yaju bu yil 52 yash bolup, xitayning sabiq re'isliridin li shyennenning küy'oghli, u xitay yuqiri derijilik rehberlik qatlimida ochuq sözlüki we islahatchi meydani bilen tonulghan. U ötken yili bir xongkong metbu'atida pikir bayan qilip, 1989 ‏- yili tyen'enmén weqesi yüz bergende herbiy emeldarlar arisida bolup ötken bir qétimliq talash - tartishni ashkarilighan. Uning shu qétimqi sözidin melum bolushiche, u eyni chaghda tyen'enmén meydanigha esker kirgüzüshke qarshi turghuchilardin biridur.

Général lyu yaju mezkur chaqiriqini élan qilip 2 kün kéyin, béyjing téxnologiye institutining iqtisad proféssori xu shingdu, xu jintawgha qaritip bir ochuq xet élan qilghan. Umu xétide, xitay kompartiyisini islahatqa chaqirghan؛ emma u üzül ‏ - késil islahat emes, baldaqmu - baldaq islahat pikirini otturigha qoyghan. U xitay kompartiyisining sotsiyalizm yolini dawamlashturushini, emma, xelqning erkin saylam we erkin pikir qilish hoquqigha yol qoyushini telep qilghan. Xu shingdu özining islahat layihisini asasiy qanunluq sotsiyalizm dep atighan.

Yuqiridiki awaz ulinishidin, bu heqtiki melumatimizning tepsilatini anglaysiler.


 
Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.