" Uyghur musteqilchiliri béyjing hawa qatnishini 4 sa'et toxtashqa mejburlidi"

Amérika birleshme agéntliqining xewer qilishiche, xitay hawa qatnishini toxtitish uqturushini ashkara élan qilmighan, peqet ayrodrom we hawa yoli shirketlirige uqturush Chüshürgen. Amérika birleshme axbarat agéntliqi xongkongdiki Cathay Pacific hawa yoli shirkitidin bu heqte melumat igiligen. Shirket bayanatchisi Carolyn Leung xanim, béyjing xelq'ara ayrodromining 8 ‏ - awghust küni kechte taqilidighanliqi heqqide uqturush tapshuruwalghanliqini ashkarilighan. U yene shu küni kech sa'et 9:45 de béyjinggha qonidighan bir ayropilanning, béyjinggha qonush waqtini etisi chüshtin kéyin sa'et 1ge özgertkenlikini bildürgen.

Birleshme agéntliq xitay hawa yolliri shirkitidin ehwal igiligendimu oxshash jawabqa érishken. Fransiye axbarat agéntliqi xewiride, xitayning hawa qatnishini toxtitish qararini shinjang we shizangdin kélidighan tehdittin qorqup alghanliqini yazidu we xitayning xelq gézitide ötken hepte, béyjing olimpiki tarixta körülmigen bixeterlik tehditige duch keldi dep xewer bergenlikini eskertidu.

Bu yil kirgendin buyan, xitay dölet bixeterlik ministirliqi, j x ministirliqi, Uyghur rayonluq dölet bixeterlik nazariti we j x nazariti arqa - arqidin bayanat élan qilip, béyjing olimpikining térrorluq tehditige duch kelgenlikini bildürgen idi, bularning ichidiki eng yéqinqi bir bayanatta, térrorluq tehditining asasliqi sherqi türkistan küchliridin kéliwatqanliqi bayan qilin'ghan idi.

Xitay da'iriliri bu bayanatliri bilen birlikte yene, xitayda barliq milletlerning ténch - barawer yashawatqanliqi, Uyghur rayonining muqimliq jehette tarixtiki eng yaxshi basquchta turuwatqanliqini bildürüp aldinqi bayanatliri bilen zitliq shekillendürüp kelmekte idi. Uyghur rayonining partkom sékritari wang léchüen bu yil béyjingda ikki yighin mezgilide söz qilip, " dölitimiz küchlük, sherqi türkistan küchliri ajiz, ular ish tewritelmeydu" dep bayanat bergen idi. Béyjingning olimpik bixeterlikige eng chong tehdit süpitide sherqi türkistan küchlirini körsitishi, we bixeterlikni közlep hawa qatnishini toxtitish qarari élishi, wang léchüenning yuqiriqi bayanlirigha zit kelmekte.

Uyghur pa'aliyetchiliridin kanada yashawatqan gülshen abduqadir we amérikida yashawatqan Uyghur pa'aliyetchisi ilshat ependiler qarashlirini otturigha qoyidu.

Uyghur pa'aliyetchisi ilshat ependi mundaq deydu: "xitay olimpik bixeterlikige a'it bayanatlirida ashkara halda asasliq tehditning sherqi türkistan küchliri ikenlikini bayan qilip keldi. Méningche, sherqi türkistan küchlirining yeni Uyghur musteqilchilirining olimpikqa hujum qilish pilani bar - yoqluqi, bundaq qilishqa küchi yétidighan - yetmeydighanliqi ayrim mesile. Bu yerde ashkarilan'ghan mesile, xitayning Uyghurlargha tamamen ishenmeslikidur. Démek xitay shunche köp kishilerge ölüm jazasi bérip, shunche köp kishilerni türmige qamap turup, Uyghurlarni tarixta az uchraydighan teqip astigha élip turupmu yenila xatirjem bolalmighan. Démek men sherqi türkistan küchliri, Uyghur milliti xitayni olimpik murasimi mezgilide hawa qatnashni 4 sa'et toxtitishqa mejburlidi dep qaraymen. Démek wang léchüenning dégini xata, sherqi türkistan küchliri ajiz emes, Uyghur xelqi charisiz emes."