Général jasus weqesidin teywen, xitay, amérika munasiwetlirige nezer

“Wolt strit” géziti ning bayan qilishiche, teywende milletchi partiye (gomindang) hoquq tutqandin kéyin, meyli siyasiy jehettin bolsun yaki iqtisadiy jehettin bolsun, teywen bilen kommunist xitay otturisidiki jiddiylik hemme jehettin peseydi. Emma, bu qétim teywende pash qilin'ghan jasusluq délosi teywende jiddiylik peyda qildi.

Teywen quruqluq armiye générali lo shyenjéning toqquz yildin buyan kommunist xitaygha jasusluq qilip kéliwatqanliqining pakitliri, emdi teywen-xitay, xitay-amérika we amérika-teywen munasiwetliride, bolupmu amérikining teywen'ge özini qoghdaydighan qoral sétip bérish mejburiyitide jiddiy özgirish peyda qilishi mumkin.

Bu qétim tutulghan jasus aran bir, mensep-emelimu bek töwen

Hazir teywende turuwatqan musteqil tetqiqatchi, erkin asiya radi'osining obzorchisi lin bawxu'a teywen quruqluq armiyisining général mayori kommunist xitaygha 9 yildin buyan jasusluq qiliwatqanliqi pash qilin'ghandin kéyin, teywen, xitay, amérika munasiwetliride qandaq özgirish bolushi mumkinliki heqqide mulahize otturigha qoydi.

Uning qarishiche, teywende bu qétim tutulghan jasusning sani bek az, aran bir, mensep-emelimu bek töwen, eger uchurni amérika teminlimigen bolsa, hazir teywende hoquq tutuwatqan gomindang bundaq jasusni tutmasliqi mumkin idi, chünki u kommunist lükchekliridin qorqidu, eger tutmisa, amérikining 'senmu kommunist xitayning jasusimu' dep qélishidinmu qorqti. Teywende hoquq tutuwatqan gomindang hazir öz ichidiki bu kommunist jasusini tutmisa bolmaydighan yerge kélip qalghan.

Ma yingju xitayning ikki qolluq siyasitini bilmeydighan adem emes

Lin bawxu'aning qarishiche, teywen prézidénti ma yingju xitay hazir teywen'ge dostluq ipadilewatidu, teywen peqet xitay bilen dost bolup ötkende, andin teywen iqtisadiy tereqqiy qilidu we xelq'arada bir boshluqqa érisheleydu, démek, peqet xitayla teywenni qutquzalaydu, dep kéliwatqan idi. Bu qétim pash qilin'ghan jasusluq délosi, gerche ma yingju xitaygha yardemliship teywen xelqini aldawatqandimu, xitay yenila teywenning herbiy mexpiyetlikini oghrilap, xalighan waqitta hujum qilishqa teyyar ikenlikini ispatlidi.

Ma yingju xitayning bir qolida birliksep bayriqini kötürse, yene bir qolida urush bayriqini kötürüwatqanliqini, teywen'ge hujum qilishqa her da'im teyyar ikenlikini bilmeydighan döt adem emes, u xarwardni püttürgen doktor, emma u némishqa buni bilmes boluwalidu? men ma yingjudin gumanlinimen, uni kommunist xitayning jasusi déyishke pakitim yoq, emma uni kommunist xitayning jasusi emesmu déyelmeymen.

Biz körüwatimiz, teywende hazir générallar herbiy septin chékinsila teywende turmay udul xitaygha kétidu, ular teywenni tashlap ketsila bolmamti? yaq, ular teywenning teywenlikning qolida turushinimu xalimaydu.

Bu, xitay özining gomindang sépidiki jasusliridin ayrilip qéliwatqanliqidin, gomindangning teywen xelqi ichidiki tesiri ajizlaydighanliqidin dérek béridu

Lin bawxu'aning qarishiche, teywende bu qétim pash qilin'ghan jasusluq délosi, xitay hazir özining gomindang sépidiki jasusliridin ayrilip qéliwatqanliqidin, gomindangning teywen xelqi ichidiki tesiri ajizlaydighanliqidin dérek béridu, bu, hazir dawamlishiwatqan teywen-xitay munasiwitige tesir yetküzidu.

Bu, teywen xelqige peqet minjindangdek yerlik teywenlikning özining partiyisi hoquq tutqandila andin teywenning kelgüsi istiqbalidin söz ichishke bolidighanliqini bildüridu. Emdi teywendiki gomindangchilar teywende dawamliq turimen dése, aldi bilen öz ichidiki kommunist xitayning jasuslirini tazilimisa bolmaydu.

Bu, teywen-xitay munasiwitige tesir körsitidu, emma amérika-xitay munasiwitige chong tesir körsitelmeydu

Lin bawxu'aning qarishiche, teywende bu qétim pash qilin'ghan jasusluq délosi teywen-amérika munasiwitigimu tesir yetküzidu. Eger ma yingju hökümiti kommunist xitaydin mudapi'e körmeydighan mushundaq ehwal dawamlishiwerse, amérikining teywenni özini qoghdaydighan ilghar qorallar bilen teminlishige tesir yétidu. Emma, amérika-xitay munasiwitige chong tesir körsitelmeydu. Chünki, amérika kommunist xitaynimu, gomindangnimu obdan chüshinidu.

Buningdin ikki yil burun teywende shiddetlik boran-chapqun yüz bergende, xitay armiyisi teywenlikni qutquzush dégen nam bilen esker ewetmekchi bolghanda, amérika bu ishta xitaydin burun téz heriket qilghan idi. Amérikining hazir yaponiye, jenubiy koriye qatarliq sherqiy asiya döletliri bilen bolghan hemkarliqini kücheytiwatqanliqimu, del xitayning teywenni ishghal qiliwélish meqsitige taqabil turush üchün qolliniwatqan tedbir.

Lin bawxu'aning éytishiche, eger gomindangchilar kommunist xitaydin ayrilalmisa, özliri teywenni tashlap chong quruqluqqa ketsun, bu teywenlikning awazi.