ئۇيغۇر كادىر: «ئىچكىرىدىن ياردەمچى كادىر داۋاملىق كېلىۋاتىدۇ، ئەمما ھېچ ياردىمىنى كۆرمىدۇق»

خىتاي ھۆكۈمىتى 2010-يىلى شىنجاڭغا ياردەم بېرىش خىزمەت يىغىنى ۋە شىنجاڭ سۆھبەت يىغىنلىرىنى ئېچىپ، خىتاينىڭ 19 ئۆلكە ھەم بىۋاسىتە قاراشلىق شەھەرلىرىنى ئۇيغۇر ئېلىگە ساھەلەر بويىچە ياردەم بېرىشكە ئورۇنلاشتۇرغاندىن بۇيان، بۇ ئىستراتېگىيە ئۇيغۇر ئېلىدىن مەڭگۈ كەتمەيدىغان يېڭى ئەۋلاد خىتاي خىزمەت ئەترىتىنى قالدۇرماقتا.

بۇ يىل خىتاينىڭ 12-بەش يىللىق پىلانى ئىككىنچى يىلغا قەدەم قويدى شۇنداقلا خىتاينىڭ ھەر قايسى جايلىرىدىن شىنجاڭغا ياردەم بېرىش خىزمىتىمۇ ئىككىنچى يىلىغا قەدەم قويدى. 2010-يىلى شىنجاڭ خىزمىتى سۆھبەت يىغىنى ۋە شىنجاڭغا كەسىپلەر بويىچە ياردەم بېرىش يىغىنى ئېچىلغاندىن بۇيان خىتاي ئۆلكىلىرىنىڭ ئۇيغۇر ئېلىگە مەبلەغ سالغان ۋە ئادەم كۈچى كىرگۈزگەن تۈرى 200 گە يېقىنلاشتى.

خىتاي كوممۇنىستىك پارتىيىسى مەركىزى كومىتېتى سىياسىي بيۇروسى دائىمىي كومىتېت ئەزاسى جۇ يۈڭكاڭ، شىنجاڭغا كەسىپلەر بويىچە ياردەم بېرىشنىڭ بىر يىللىق دوكلات يىغىنىدا قىلغان سۆزىدە شىنجاڭغا ساھەلەر بويىچە ياردەم بېرىشتە ياخشى ئىشلەشكە تېگىشلىك ۋەزىپە ۋە نىشان ھەققىدە توختىلىپ «بىرىنچىسى ئەمىن ئۆي قۇرۇلۇشى، ئىككىنچىسى، خەلقنى بېيىتىش، ئۈچىنچى، قوش تىل ئوقۇتۇشى قۇرۇلۇشىنى مۇكەممەللەشتۈرۈش، كەسىپ رايونى قۇرۇلۇشىنى پۇختا ئىشلەپ قەشقەر ۋە قورغاستىن ئىبارەت ئىككى ئىقتىسادىي تەرەققىيات رايونىنى كۈچنى مەركەزلەشتۈرۈپ قۇرۇپ چىقىش، بەشىنچى، كادىرلار ئىختىساسلىقلار قۇرۇلۇشىنى ياخشى ئىشلەش ئارقىلىق ئىشقا ئورۇنلاشتۇرۇشقا تۈرتكە بولۇش» دېگەن ئىدى.

خىتاي ھۆكۈمىتى بۇ يىل يەنە خىتاي ئۆلكىلىرىنىڭ شىنجاڭغا ساھە ۋە كەسىپلەر بويىچە ياردەم نىشانىنى ئاساس قاتلامغا ۋە بايلىق مەنبەلىرىنى ئېچىشقا قارىتىدىغانلىقىنىمۇ جاكارلىدى.

شىنجاڭ خەۋەر تورىنىڭ 5-فېۋرال خەۋىرىگە قارىغاندا، خىتاي مەركىزى كارخانىلىرى ۋە خىتاي شىركەتلىرىنىڭ ئۇيغۇر ئاپتونوم رايونىغا ساھەلەر بويىچە ياردەم بېرىش تۈرلىرىنىڭ ئەمەلىيلىشىش دوكلات يىغىنى، 5-فېۋرال چۈشتىن كېيىن ئۈرۈمچىدە ئېچىلغان بولۇپ، خىتاينىڭ ئۇيغۇر ئاپتونوم رايونىغا قويغان رەئىسى نۇر بەكرى يىغىندا خىتاي مەركىزى كارخانىلىرى ۋە شىركەتلىرىگە، شىنجاڭغا ياردەمگە كەلگەنلىكى ۋە ئۇلارنىڭ ئۇيغۇر ئېلىگە پەن-تېخنىكا، ئىختىساسلىقلارنى ۋە مەبلەغ كىرگۈزۈپ كەسىپلەر بويىچە يېڭىچە گۈللىنىش، راۋاجلىنىش، ئەمەلىي نەتىجە ھاسىل قىلدى دەپ ئالاھىدە رەھمەت بىلدۈرگەن.

خىتاي ئۆلكىلىرىنىڭ شىنجاڭغا كەسىپلەر بويىچە ياردەم بېرىش تەشۋىقات خەۋەرلىرىدىمۇ مۇشۇنىڭغا ئوخشاش «ھەر قايسى ئۆلكە ۋە بىۋاسىتە قاراشلىق شەھەرلەرنىڭ شىنجاڭغا ياردەم بېرىش تەدبىرلىرى ئىچىدە خەلق تۇرمۇشىنى ياخشىلاش باشتىن-ئاخىر ئالدىنقى ئورۇنغا قويۇلدى، شىنجاڭغا ياردەم بېرىش شىنجاڭغا ھەقىقىي ياردەم بېرىش، پەن تېخنىكىدا ياردەم بېرىش ئارقىلىق ھەر مىللەت خەلقىگە نەپ يەتكۈزۈلدى» دەپ تەشۋىق قىلىنماقتا.

ھالبۇكى، رادىئومىزغا بۇ ھەقتە كېلىۋاتقان ئىنكاسلار ۋە بىزنىڭ ئۇيغۇر ئېلىدىكى خىتاي ئۆلكىلىرىنىڭ نۇقتىلىق ياردەم بېرىش نىشانى قىلىنغان رايونلارنى ئاساس قىلىپ ئېلىپ بارغان زىيارەتلىرىمىزدىن مەلۇم بولۇشىچە، ئەمەلىيەتتە شىنجاڭغا ياردەم بېرىش نامىدا كېلىۋاتقان ئاتالمىش خىتاي ئىختىساسلىق خادىملىرىنىڭ جايلاردا ھېچبىر ئەمەلىي خىزمەت ئېلىپ بارمىغاندىن باشقا، ئۇلارنىڭ ھەرخىل ئالاھىدە ئىمتىيازلىرىدىن پايدىلىنىپ خەلقنىڭ مەنپەئىتىنى زىيانغا ئۇچرىتىدىغان قىلمىشلىرى يەرلىك خەلقنىڭ نارازىلىقىنى قوزغىماقتا ئىكەن. بۇ ھەقتە قەشقەرنىڭ مەلۇم ناھىيىسىدىكى بىر ئۇيغۇر ئايال كادىر، گەرچە نام شەرىپىنى ئاشكارىلىمىغان بولسىمۇ، ئەمما ئاتالمىش ئىختىساسلىق خىتاي كادىرلار بىلەن بىللە ئىشلەش جەريانىدا ھېس قىلغانلىرىنى بايان قىلدى.

يۇقىرىدىكى ئاۋاز ئۇلىنىشىدىن، ئاساسىي قاتلامدا ياردەمگە كەلگەن خىتاي كادىرلار بىلەن بىرگە خىزمەت قىلىۋاتقان ئۇيغۇرلارنىڭ ئۇلارغا بەرگەن ھەقىقىي باھاسىنى  ئاڭلىغايسىلەر.