Téximu köp karxanilar we kadirlar Uyghur élige teklip qilinmaqchi

Yéngi bir nöwetlik “Shinjanggha yardem bérish” xizmiti munasiwiti bilen téximu köp karxanilar we kadirlar Uyghur élige teklip qilinmaqchi.
Muxbirimiz irade
2012.02.28
zhang-chunxian-305.jpg Uyghur aptonom rayonning partkom sékrétari jang chünshyen béyjingdiki yighinda, Uyghur élide muqimliqni saqlap qalduq, dédi. 2011-Yili 8-mart.
AFP

Düshenbe küni ürümchide yéngi bir nöwetlik shinjanggha yardem bérish xizmet yighini chaqirilghan. Yighinda Uyghur aptonom rayonning partkom sékrétari jang chünshen söz qilip, yardem bérish xizmitidin kéyin Uyghur élide zor özgirishlerning barliqqa kélip, xelq turmushining körünerlik derijide yaxshilan'ghanliqini ilgiri sürgen we bundin kéyin 19 ölke we sheherdin téximu köp shirket hem ixtisasliq xadimlarni teklip qilishni teshebbus qilghan. Uyghur közetküchiler bolsa buning Uyghur élini ilgirilep talan-taraj qilish we köchmen yötkesh teshebbusi ikenlikini bildürmekte.

27-Féwral küni Uyghur aptonom rayonluq “Shinjanggha yardem bérish” xizmet yighini hem “Kesipler boyiche shinjanggha yardem bérish” xizmet yighini échilip, shinjanggha yardem bérish xizmiti bashlan'ghan 2 yildin buyanqi xizmetler xulasilen'gen we bu yilliq yardem bérish xizmetlirining nishani hem türliri orunlashturulghan. Uyghur rayonluq partkom sékrétari jang chünshen yighinda söz qilip, Uyghur éli teqsim qilip bérilgen 19 ölke sheherning yardem bérish xizmetlirini medhiyiligen.

Xitayning xelq gézitining bu heqtiki uchurlirigha asaslan'ghanda jang chünshenning körsitishiche, 19 ölke-sheher Uyghur élige yardem bérish xizmiti bashlan'ghandin buyan Uyghur élige saheler boyiche yardem qiliwatqan herqaysi ölke-sheherlerning pen-téxnika organliri 1627 türlük yardem bérish qurulushini tamamlighan. Bu tür qurulushlirigha 15 milyard 300 milyon yüen meblegh sélin'ghan. 128 Milyard 100 milyon yüen yardem meblighi emeliyleshken.

Jang chünshyen shinjanggha yardem bérish xizmiti bashlan'ghan ikki yildin buyan qolgha kelgen netijiler qatarida yene, Uyghur élidiki türler qurulushigha sélin'ghan mebleghning 80 pirsentining xelq turmushini yaxshilashqa ishlitilgenliki, bu yilliq “Shinjanggha yardem bérish xizmiti” ni orunlashturghanda “Shinjanggha yardem bérish xizmitini ammining turmush shara'itini yaxshilashqa zich birleshtürüsh, 90 türlük el rayi qurulushini yolgha qoyup, shinjanggha saheler boyiche yardem bérish qurulushini xelq ammisining ‛béyish qurulushi‚, ‛milletler ittipaqliqining qelblerni tutashturush‚ qurulushigha aylandurush kérek” dep körsetken.

Uyghur élining partkom sékrétari jang chünshyen yighinda “Shinjanggha yardem bérish” ni xelq ammisini razi qilish, “Milletler ittipaqliqi qurulushi” dégenni teshwiq qilish bilen bir waqitta, yene bir yaqtin Uyghur élide muqimliqni qoghdashqa kapaletlik qilishni qattiq tekitlimekte. U téxi yéqindila qilghan sözide Uyghur élining muqimliqigha kapaletlik qilish üchün qattiq zerbe bérish heriketlirini küchlendürüshni telep qilghan idi. Bügün yene tengritagh torida bérilgen xewerdin qarighanda, Uyghur aptonom rayonluq hökümet teripidin teshkillen'gen muqimliqini saqlash xizmitige yétekchilik qilish-tekshürüsh guruppisi xoten'ge mexsus tekshürüshke bérip, xotenning bir qanche nahiyilirining muqimliq xizmetlirini közdin kechürgen.

Xewerde éytilishiche, bu tekshürüsh guruppisidikiler chira nahiyisining chira yézisi, kériye nahiyisining qarqi yézisi, siyek, kökyar yézisi, lop nahiyisi, lop nahiyilik suchiliq idarisi we j x idarisi, xoten sheherlik j x idarisi, qoralliq saqchi qisim bash etriti hem bir qisim saqchixanilargha bérip, jiddiy ehwalgha taqabil turush qomandanliq sistémisining omumiy ehwali, türlük muqimliqni saqlash küchlirining birikishi, charlash, mudapi'e-kontrol sistémisi, yéza saqchixana qurulushi qatarliqlarni közdin kechürgen. Muqimliqni saqlash xizmitige yétekchilik qilish-tekshürüsh guruppisining yétekchisi shung shu'en'go yuqirida nami atalghan jaylarda muqimliq xizmitini orunlashturghanda qilghan sözide “Muqimliqni saqlash weziyitige toghra höküm chiqirish, aptonom rayon we wilayetning bir qatar muqimliqni saqlash tedbirlirini qet'iy éghishmay izchillashturup emeliyleshtürüsh, tewrenmeslik, arisaldi bolmasliq” dep yolyoruq bergen.

Xitay da'iriliri Uyghur élini 19 ichkiri ölke-sheherge yardem bérishke bölüp bergendin buyan öz teshwiqatlirida bu 19 ölke-sheherning Uyghur élige qilghan yardemlirining sayiside, Uyghur éli xelqining turmushining körünerlik yaxshilan'ghanliqini, déhqanlarning béyighanliqini ilgiri sürüp kelmekte. Emma, iqtisadni Uyghur élide muqimliqni berpa qilishning asasiy dep qarawatqan xitay hökümitining buning bilen birlikte da'im muqimliqtin endishe qilip, muqimliqni saqlash xizmetlirini hessilep chingitiwatqanliqi melum bolmaqta. Yuqiridiki ehwal chet'ellerdiki közetküchilerning diqqitini qozghimaqta. Ularning qarishiche, ichkiri ölkilerning Uyghur élige yardem bérish xizmiti hergizmu jang chünshen ilgiri sürgendek xelq rayini asas qilip, xelqqe emeliy nep élip kelmidi, eksiche ichkiridin chiqqanlarni bay qildi. Shunga ular bu xil qattiq qolluq zerbe bérish heriketliri arqiliq xitay ölkiliridin chiqqan shirketlerning menpe'itini qoghdashqa mohtaj, dep körsetmekte. Shwétsiyidiki Uyghur ziyaliyliridin abdulla exet ependi “19 Ölkining Uyghur élige yardem bérish qurulushi” xitay hökümiti nurghun yillardin béri rayonda yürgüzüp kéliwatqan xelqni aldash siyasetlirining shekil özgertken bir türi, dep körsetti.

Igilinishiche jang chünshen bu yilliq shinjanggha yardem bérish xizmiti yighinida qilghan sözide bu yilliq xizmetlerni muweppeqiyetlik ishqa ashurush üchün qilishqa tégishlik ishlarni körsetkende ichkiridin kélidighan ixtisasliq xadimlarning, kadirlarning sanini ashurushni, aliy mektep püttürüsh aldidiki yashlarni Uyghur élige kélip ishleshke jelp qilishni alahide tekitligen.

Ötken yil türler boyiche yardem bérish siyasitige asasen Uyghur élige saheler boyiche yardem bériwatqan ölke-sheherlerdin 7 türküm boyiche jem'iy 3200 neper kadir Uyghur élige kelgen bolup, aldimizdiki yillarda bu reqemning téximu ashidighanliqi melum bolmaqta.

Uyghur élige yötkiliwatqan xitay köchmenliri mesilisi Uyghurlar alahide diqqet qiliwatqan mesililerning biri. Chet'ellerdiki kishilik hoquq organliri we herqaysi Uyghur éli weziyitini közetküchiler xitay köchmenliri mesilisining milliy ziddiyetke we rayondiki muqimsizliqqa seweb boluwatqan asasliq amilliqigha ishinidu. Emma xitay hökümitining her xil nam astida bu siyasitini dawam qilishi közetküchilerni umidsizlendürmekte.

Abdulla ependi sözining dawamida Uyghur élige xitay köchmen yötkesh siyasitini dawamlashturushi we buning ornigha Uyghur yashlirini ichkiri ölkilerge yötkishini xitay hökümitining Uyghurlarni tarqaqlashturush siyasitining bir parchisi ikenlikini eskertip, xitay hökümiti meyli qandaq tedbir alsa-alsun Uyghurlargha barawer mu'amile qilmighuche, ulargha öz hoquqini toluq bermigüche muqimliqtin éghiz échishning mumkin bolmaydighanliqini éytti. Emma Uyghur éli partkom sékrétari jang chünshen bolsa yighindiki sözide Uyghur élide “Wetenni söyüsh, shinjangni söyüsh idiyisini, milletler ittipaqliqi idiyisi teshwiqatini kücheytish Uyghur élide muqimliqni ishqa ashurushning muhim kapaletlirining biri”, dep körsetken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.