Хитай компартийә өмики қазақистанда зиярәттә

Хитай коммунистик партийисиниң рәсмий вәкиллири қазақистанда зиярәттә болди. Қазақистан җумһурийити "нур отан" хәлқ - демократик партийисиниң тәклипи билән қазақистанға кәлгән хитай коммунистик партийисиниң мәркизий комитети сиясий бюросиниң әзаси, хитай коммунистик партийиси мәркизий комитетиниң катипи, тәшвиқат министири лю йүншән "нур отан" партийиси рәисиниң биринчи орунбасари нурлан ниғматулин билән учрашти.
Мухбиримиз ойған
2010-09-07
Share
Qazaqistan-Xitay-nefit-gaz-turubisi-305.jpg Сүрәт, қазақистан - хитай нефит турубиси пүтүп ишқа чүшкәндики көрүнүш.
AFP Photo

Учришиш давамида икки партийә оттурисидики һәмкарлиқ мәсилилири қаралди. Йәрлик ахбарат васитилириниң мәлуматлириға қариғанда, қазақистан вә хитай оттурисидики мунасивәтләргә, шу җүмлидин партийә дәриҗисидики һәмкарлиққа қазақистан һөкүмәт даирилири юқири баһа бәрмәктә.

Нурлан ниғматулин икки дөләт оттурисидики мундақ алақиләрниң бу икки мәмликәтниң лидерлири нурсултан назарбайеф вә ху җинтавниң достлуқ мунасивәтлири арқисида йүз бериватқанлиқини тәкитлигән. У шундақла лю йүншәнни "нур отан" партийисиниң қазақистанниң иҗтимаий - иқтисадий һаятида елип бериватқан сиясити билән тонуштуруп, уни партийиниң кәлгүсидики 13 - қурултийиға қатнишишқа чақирған.

Өз нөвитидә лю йүншән қазақистан президентиниң хитайда чоң һөрмәткә игә икәнликини һәм шундақла униң дунядики әң атақлиқ лидерларниң бири икәнликини илгири сүрди. Хитай тәшвиқат министири қазақистанниң хәлқарадики ролини вә дуняви малийә кризиси дәвридики утуқлирини алаһидә тәкитлиди. Учришиш давамида келәчәктә кәспий партийә кадирлирини тәйярлашта өз ‏ - ара тәҗрибә алмаштуруш тәклиплириму оттуриға қоюлған иди.

Лю йүншән қазақистан һөкүмити баш министири кәрим мәсимоф билән көрүшкән һәм бу җәрянда улар икки дөләт оттурисидики сода вә иқтисадий алақиләрни муһакимә қилған. Улар н. Назарбайеф вә ху җинтав оттурисидики музакирә давамида қолға кәлтүрүлгән келишимләрниң һәмдә қазақистан - хитай истратегийилик һәмкарлиқиниң мувәппәқийәтлик әмәлгә ашидиғанлиқини үмид қилидиғанлиқини билдүргән.

Астанада хитай партийә өмики йәнә, қазақистан җумһурийитиниң алақә вә ахбарат министири асқар җумағалийеф билән учрашти. Сөһбәт җәрянида улар икки әлниң алақә вә ахбарат саһәлиридики мәсилиләрни муһакимә қилди һәм қазақистан телевизийә каналлирини хитай җумһурийитидә аңлитиш мумкинчиликлирини қараштурди.

Игилишимизчә, хитай партийә өмики 3 - сентәбир күни алматада болуп, йәрлик һөкүмәт, билим вә ахбарат вәкиллири билән учрашқан. Лю йүншән шундақла, алмата шәһири һакими, "нур отан" партийисиниң алматадики бөлүминиң рәиси әхмәтҗан есимоф билән көрүшти. Ә. Есимоф алматаниң 70 йил мабәйнидики утуқлирини тәкитләп, қазақистан бойичә алий мәктәп оқуғучилириниң 30 пирсәнтиниң, банк иш - һәрикәтлириниң 55 пирсәнтиниң, ахирқи сәккиз ай ичидила дөләт мәблиғи һесабиға чүшүватқан омумий селиқларниң 29 пирсәнтиниң алмата шәһиригә тоғра келидиғанлиқини атап көрсәткән. У шундақла шәһәрдә көплигән хитай ширкәтлириниң иш елип бериватқанлиқини, шуниң билән бир вақитта қазақистан сода ширкәтлириниң үрүмчидә паалийәт көрситиватқанлиқини оттуриға қойған.

Хитай партийә өмики шундақла әл - фараби намидики қазақ миллий университетида болған. Мәзкур университетниң башлиқи бәхитҗан җумақулоф университет тәркибидики куңзи институтиниң паалийити һәққидә алаһидә мәлумат бәргән. Лю йүншән университет ишиға юқири баһа берип, бу йәрдә миңдин ошуқ хитай оқуғучилириниң билим елиши қазақистан - хитай достлуқиниң ярқин дәлили икәнликини тәкитлигән.

Юқиридики аваз улинишидин, бу һәқтики мәлуматимизниң тәпсилатини аңлайсиләр.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт