Xitay tashqi ishlar ministiri qazaqistanda ikki künlük ziyarette boldi

Astanidiki ikki künlük seper jeryanida yang jiéchi qazaqistan rehberliri bilen uchriship, siyasiy, iqtisadi we ijtima'iy saheler boyiche ikki otturidiki hemkarliq, xelq'araliq we rayonluq bixeterlik mesililiri, shundaqla birleshken döletler teshkilati, shangxey hemkarliq teshkilati we asiyadiki birliship heriket qilish we ishench chariliri kéngeshmisige oxshash xelq'araliq teshkilatlarda hemkarlishishning muhim mesililirini muhakime qilghan.

Qazaqistan todéy agéntliqining xewer qilishiche, qazaqistan jumhuriyitining prézidénti nursultan nazarbayéf 28-dékabir küni xitay tashqi ishlar mes'ulini aq'ordida qobul qilip, ikki memliket otturisidiki munasiwetlerning istratégiyilik ehmiyetke ige ikenlikini alahide tekitligen. Mezkur agéntliq shundaqla qazaqistan rehbirining axbarat xizmiti melumatlirigha tayan'ghan halda, n. Nazarbayéf we yang jiéchining ikki otturidiki hemkarliq we xelq'ara weziyetning köpligen mesililirini muhakime qilghanliqini bayan qilghan. "Qazaqistan we xitay arisidiki munasiwetler istratégiyilik ehmiyetke ige. Biz döletlirimiz otturisidiki dostluq, ishench we qoshnidarchiliqni yuqiri bahalaymiz. Xitay dunyawi iqtisadi krizis dewride qazaqistan'gha köp yardem körsetti.
Biz köp sahelerde, yeni énérgiyide, transportta hemkarlishiwatimiz, hazir bolsa biz, bolupmu qazaqistanning sana'et programmisini emelge ashurush da'iriside birliship heriket qilishni téximu kücheytishni xalaymiz" dégen idi qazaqistan rehbiri.

Xitay wekili yang jiéchi bolsa öz nöwitide mundaq dégen: "biz 2011-yili astanada shangxey hemkarliq teshkilatining uchrishishini aliy derijide ötküzüshning zörürlükini muhakime qilduq. Men nursultan nazarbayéfni uning rehberlikide qazaqistanning asasen ijtima'i-iqtisadi tereqqiyatta, rayonluq we keng da'iridiki bixeterlikni we turaqliqni teminleshtiki utuqliri bilen tebriklidim, shundaqla yéngi yilda, qazaqistan musteqilliqining 20 ‏- yilliqida yenimu muweppeqiyetler qazinishini we güllinishini tilidim."

Ziyaret dawamida yan jiéchi shundaqla qazaqistan yuqiri palata we mejlisining rehberliri qasim jomart toqayéf we oral muxamédjanof bilen körüshüp, ikki dölet we ikki tereplimilik parlamént munasiwetliri heqqide muzakire yürgüzgen.

"Kazaxstanskaya prawda" gézitide élan qilin'ghan éléna kozinséwaning "süpiti istratégiyilik we ünümlük" dégen maqaliside éytilishiche, yan jiéchi nursultan nazarbayéfqa qazaqistanning tashqi ishlar ministiri qanat sa'udabayéf bilen bolghan uchrishishining yekünlirini bayan qilghan.

Melum bolushiche, qanat sa'udabayéf ikki dölet rehberlirining istratégiyilik hemkarliq munasiwetlirini ornitish we rawajlandurush toghriliq birleshme höjjet qobul qilghanliqigha bu yili besh yil tolidighanliqini tekitligen. U shundaqla mezkur höjjetning peqet ikki tereplimilik munasiwetla emes, belki rayon da'irisidimu tinchliq we turaqliq muhitini berpa qilishta muhim ehmiyetke ige ikenlikini ilgiri sürgen. Ular soda-iqtisad saheside yenimu hemkarlishishning keng programmisini emelge ashurush boyiche wezipilerni muhakime qilghan. Asasiy jehettin énérgiye sahesidiki layihilerge, xitaygha yéza igiliki mehsulatlirini éksport qilishqa köprek nezer aghdurulghan.

Maqalide shundaqla ikki dölet tashqi ishlar ministirlirining xelq'araliq teshkilatlarda, asiya-tinch okyan rayoni boyiche her xil mezmunlarda buningdin kéyinmu birliship heriket qilishning zörürlükini tekitligenliki heqqide éytilghan. Ular "üch xil küch" ke qarshi birliship küresh qilishta meqsetlirining bir ikenlikini yene bir qétim tekitligen. Ministirlar 2011-yili qazaqistanda shangxey hemkarliq teshkilatining 10 yilliq yighinini, 2012-yili xitayda teshkilatning nöwettiki chare-tedbirlirini ötküzüsh yighinini qollaydighanliqi we ulargha aktip qatnishidighanliqi heqqide öz ‏- ara kélishkenlikini tekitligen. Qazaqistan we xitay tashqi ishlar ministirlirining muzakiriliri dawamida qobul qilin'ghan 2011 -, 2013 -yilliq hemkarliq heqqidiki bayanatida ikki dölet otturisidiki istratégiyilik hemkarliqning meqset-wezipiliri eks étilgen.