Уйғур зиялийлар: “хитай тәшвиқатчилириниң идеологийә саһәсидики ролиға сәл қаримаслиқ керәк!!!”

Хитайда барлиқ ахбарат васитилири хитай коммунист һөкүмити үчүн хизмәт қилиду, бу нуқтидин ейтқанда хитайдики ахбарат саһәси болса хитай коммунист партийисиниң кишиләрниң идийисини өзгәртиш вә бойсундуруштики тәшвиқат қорали.
Мухбиримиз гүлчеһрә
2011.12.19
ikki-xil-kiyim-model-1-305.jpg Сайрам базиридики “икки хил” модел көргәзмисидә диний йосунда кийингән қиз. 2011-Йили декабир.
RFA

Дикабирниң бешиида, уйғур елидики бир қисим һөкүмәт башқурушидики вә шундақла шәхсләрниң тор бәтлиригә “икки хил кийим модел көргәзмиси күчлүк инкас қозғиди” намлиқ бир сүрәтлик хәвәр чаплинип уйғурлар ичидә зор ғулғула қозғиғандин кейин, даириләр тәрипидин 7-декабирдин етибарән пүтүнләй өчүрүп ташланған иди. Биз бай наһийисидә елип бериливатқан қанунсиз диний һәрикәтләргә зәрбә бериш йүз күнлүк қаратмилиқ һәрикәт давамида, даириләрниң уйғурларниң инсаний вә диний әркинликини боғуп, хәлқниң наразилиқини қозғаватқанлиқи һәққидә мәлуматлар игилидуқ вә икки хил кийим модел көргәзмиси арқилиқ чүмбәл атқан аялларни қамчилаш һәрикитиниң, бу һәқтә хәвәр елан қилған қурбан сайим язғандәк қарши елинған болмастин, бәлки даириләрниң инсан һәқлири, аяллар һәқ-һоқуқлири, диний һоқуқлирини дәпсәндә қилған бу һәрикитиниң хәлқниң ғәзипини, наразилиқини қозғиғанлиқи тоғрисида мәлуматларға игә болғандин кейин йәнә, хәвәр аптори қурбан сайимни зиярәт қилған идуқ, у зияритимизни қобул қилғанда униң сөзлиридин, хитай һөкүмитиниң актип тәшвиқатчиси икәнлики ипадиләнгән вә ахири соаллиримизға җаваб тапалмиғанда, “йезимизниң сиясити башқа җайлардин пәрқлиниду” дейиш арқилиқ өзиниң мухбирлиқ әхлақиға ят язмилирини ақлиған иди.

Мәзкур мәлуматлар радиомизда аңлитилғандин кейин чәтәлдики бир қисим ахбаратчи вә язғучи зиялийлар арисида мулаһизә қозғиди, германийидә яшаватқан илгири үрүмчи кәчлик гезитидә мухбир болуп ишлигән амангүл ханим, қурбан сайимға охшаш мухбир аталған тәшвиқатчиларниң пүтүн уйғур елидики мәтбуат ‏-ахбарат саһәсини тәшвиқат саһәсигә айландуруп, хитайниң уйғурларни идеологийә җәһәттин өзгәртиш һәрикити үчүн ахбарат принсипи вә инсаний вә кәспий әхлаққа ят хизмәт қиливатқанлиқини ечип көрсәтти.

Дәрвәқә, биз қурбан сайимниң хәвәрлирини көргән уйғур елидики тор абонтлири вә бәзи тор башқурғучилар билән сөһбәтләшкинимиздә, қурбан сайимниң “сайрамда өткүзүлгән икки хил кийим модел көргәзмиси күчлүк тәсир қозғиди” дәп язған хәвиридә тәшвиқ қилинған, инсан һәқлири, аяллар һәқ-һоқоқлири дәпсәндә қилинған, уйғурларниң диний һәм миллий әхлақиға хилап бир һәрикәтниң уларда һечқандақ ғәлитилик һес қилдурмайла қалмай, бәлки хитай һөкүмитиниң мәқсити апторниң идийисиниң уларни қайил қилғанлиқи мәлум болди.

Канадада турушлуқ шаир туйғунҗан абдувәли, уйғур елидики чеғидила қурбан сайимни тонуйдиғанлиқини, хитай һөкүмити вә коммунистик партийиси үчүн җан дил хизмәт қилидиған буниңға охшаш кишиләрниң буниңдин кейин техиму көпийиши мумкинликини вә уларниң уйғурларға елип келидиған яман тәсирлиригә сәл қаримаслиқ керәкликини агаһландурди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.