Xitayning 50 ming dollarliq mesxirilik yardimi

Süriye mesiliside xitay dölitining esed hakimiyitini qollighanliqi, xususen rusiye bilen birlikte birleshken döletler teshkilatida esed hakimiyiti terepni tutqanliqi ereb we islam elliride xelqning naraziliqini ashurghan idi.
Ixtiyariy muxbirimiz ömerjan
2013-01-14
Élxet
Pikir
Share
Print
Rusiye prézidénti putin shangxey hemkarliq teshkilati yighini harpisida xitay re'isi xu jintaw bilen uchrashti. 2012-Yili 5-iyun, béyjing.
Rusiye prézidénti putin shangxey hemkarliq teshkilati yighini harpisida xitay re'isi xu jintaw bilen uchrashti. 2012-Yili 5-iyun, béyjing.
AFP

Shuningdin kéyinmu xitay, rusiye we iran süriye re'isi beshshar el esedni qollashtin waz kechkini yoq. Tehlilchiler xitayni rusiyining arqisigha mökünüp turup esedning qirghinchiliqini qollighan dölet dep tebirleydu.

Londonda chiqidighan "Ottura sherq" gézitining 14-yanwar künidiki sanida, "Xitayning mesxirilik yardimi we ereb döletliri ittipaqi" dégen témida bir maqale élan qilin'ghan bolup, maqalide mundaq dep yézilghan:
"Xitay döliti süriyide boluwatqan qirghinchiliqlar, naheq öltürülüwatqan nareside balilar üchün ich aghritqanmu yaki wijdani malamet qilghanmu? némila bolmisun axiri süriye xelqige yardem qilmaqchi boldi. Emma qandaq yardem qildi dep sorisingiz, 50 ming dollar yardem qildi. Toghra, 50 milyon emes, belki 50 ming dollar yardem qildi. Amérika bankilirida tirilyon dollarliq meblighi bar, bir yilning ichide ereb döletlirige 130 milyard dollarliq tawar satqan bay bir döletning yanchuqidin süriye xelqi üchün aran 50 ming dollar chiqti. Hemmige melumki, rusiye esed hakimiyitini ashkara qollaydighanlardin bolup, herbiy eslihelirini ewetish bilen xelqni qirishta hemkarliship kelmekte, emma xitay döliti rusiyining keynige mökünüp turup esedni qollimaqta we süriye xelqining qénini bille tökmekte. Süriye xelqi xitayning bu 50 ming dollirini néme qilidu? bu pul ularning yarilirini téngishqa yétemdu? bundaq ahanet we mesxire xitaydin kelgen bolsa, bu ejeblinerlik emes. Chünki ereb döletliri ittipaqimu shundaq ahanet qiliwatidu. Ereb döletliri ittipaqi nebil erebi bash katip bolghandin biri, bu teshkilat süriye xelqi üchün héch ish qilip béreligini yoq. Uningdin ilgirimu bu teshkilat ajizliqi we quruq sözi bilen meshhur idi. Ehwal hazirmu shundaq."

Xitay pursetpereslik qilmaqchi

Maqalide yene mundaq déyilgen:
"Süriyidiki esed hakimiyitining küni az qalghan, hetta barmaq bilen sanighili bolghudek derijide az qalghan bu peytte. Bezi shexsler we bezi döletler pursetpereslik qilip, özlirini süriye xelqige yardem qilghanlar qataridin, ulargha hésdashliq qilip, ular bilen bille turghanlar qataridin körsitishke tirishmaqta. Del mushu peytte, shu meqset bilen xitay dölitimu bu 50 ming dollar yardimi bilen otturigha chiqti. Xitay özining birleshken döletler teshkilatida esed terepte turush bilen süriyide 60 ming insanning qirghin qilinishigha yol qoyghan bir dölet turup, emdi özini süriye xelqige yardem qilghan we ulargha hésdashliq qilip bir septe turghanlar qatarida yazdurush üchün tirishmaqta."

Toluq bet