Хитай учур васитилириға қаратқан 4 айлиқ ' қаттиқ зәрбә бериш' һәрикитини башлиди

Бирләшмә агентлиқиниң түнүгүн бейҗиңдин йоллиған хәвиридә, хитай һөкүмитиниң һәммә тор бәтлиригә һөкүмәт тәрипидин тәйярланған йеңи юмшақ детал қачилаш һәққидә бәлгилимә чиқарғанлиқини баян қилған иди.
Мухбиримиз вәли
2008.12.04
Xitay-Internet-cheklesh-305.jpg Сүрәттә, хитайниң мәлум җайидики интернетханисида назарәтчилик қиливатқан интернет сақчилиридин бири мәлум интернет ишләткүчини тәкшүрмәктә.
AFP Photo

Хитай һөкүмити бир мунчә тор бәтлирини вә торда әркин пикир баян қилған мустәқил язғучиларни қара тизимликкә алған

Бүгүн бошун тор бетиниң хәвәр қилишичә, коммунист хитай һөкүмити һазир учур васитилириға қаратқан 4 айлиқ 'қаттиқ зәрбә бериш' һәрикитини башлиған вә алди билән бир мунчә тор бәтлирини, торда әркин пикир баян қилған мустәқил язғучиларни қара тизимликкә алған.

Хитай бу 'қаттиқ зәрбә бериш' арқилиқ 2009‏ - йилида йүз бәргүси қаршилиқ һәрикәтләрни алди билән бастурмақчи

Униңда тәһлил қилинишичә, хитайниң тәшвиқат министирлики вә дөләт бихәтәрлик идариси 2009‏ - йилида хитайда йүз бәргүси қаршилиқ һәрикәтләрниң алдини елиш вә чәтәлләрдики 'җуңгоға қарши күчләргә тақабил туруш үчүн, уларға қарита алди билән бастуруш елип бармақчи боливатиду.

 Дуня уйғур қурултийи хитайниң бу қаттиқ бастуруш һәрикитини қаттиқ әйиплиди

Дуня уйғур қурултийиниң баянатчиси дилшат ришит бүгүн елан қилған баянатида, хитай һөкүмитиниң учур васитилириға қаратқан бу 4 айлиқ 'қаттиқ зәрбә бериш' һәрикитини әйиплиди, қаттиқ наразилиқ билдүрди вә хитайни бундақ һәрикәтни дәрһал тохтитишқа чақирди.

Хитай кишилик һоқуқни қоғдаймән десә, алди билән хәлқни мәтбуат һоқуқиға игә қилиши керәк

Дилшат ришитниң қаришичә, хитай кишилик һоқуқни қоғдаймән десә, алди билән хәлқни мәтбуат һоқуқиға игә қилиши керәк.

Дилшат ришитниң қаришичә, хитайда һөкүмәт махтап сөзлигән нәрсиниң ялғанлиқини хәлқ дуняға паш қилип қоюп, һөкүмәт дуняда мат болуп қалған әһвал йүз бәргән иди. Хитай һөкүмити һазир бундақ әһвал йүз беришниң алдини елиш үчүн, бу қетим учур васитилирини бастуруш арқилиқ, пүтүн җәмийәтни һөкүмәт немә десә шундақ дәйдиған бир хил рамкиға киргүзмәкчи боливатиду.

Хитайниң бу қаттиқ зәрбә бериш һәрикити техиму көпрәк уйғурларға қаритилған

Дилшат ришитниң қаришичә, хитайниң һазир башлиған учур васитилириға қаттиқ зәрбә бериш һәрикити техиму көпрәк һалда уйғурларға қаритилған, гәрчә уйғурларда учур, мәтбуат әркинлики хитайниң ички өлкилиригә қариғанда техиму йоқ болсиму, хитай уйғурларни асас нишан қилған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.