Хитайда ишләнгән "таң падишаһлиқи" дегән телевизийә филимидә муһәммәд әләйһиссаламға һақарәт қилинған

У филимдә муһәммәд әләйһиссаламниң сүрити дәп тонуштурулған рәсимниң бир көзи қариғу сизилған болуп, бу көрүнүш уйғур қатарлиқ мусулман хәлқләрниң қаттиқ наразилиқини қозғиди. Интернет муназирә мунбәрлиридә нурғун шәхсләр наразилиқини ипадиләп пикирлирини баян қилди. Филимниң 15 ‏- қисмидики 22 ‏ - минутлуқ йеридә у сүрәт көрситилгән.

Бу филим хитайниң мәркизи телевизийә истансисида тарқитилғандин кейин, дуняға мәшһур филим тор бети www.youtube.com Вә http://www.diyarim.com Тор бәтлиридә елан қилинған.

Диярим тор бетиниң муназирә мунбиридә бу филимни көргән интернет зиярәтчилири пикирлирини төвәндикидәк баян қилған: бу бир ойдурмичилиқ, әзәлдин болмиған ишни ойдуруп чиқирип хитайлар өзлирини көз ‏- көз қилғанлиқ дәп баһа бәргән. Бәзи зиярәтчиләр пәйғәмбиримизниң бу дуняда сүрити йоқ, һеч ким сизалмайду дәп язған болса, бәзи тор зиярәтчилири , башқилар бизни дәпсәндә қилсиму, һақарәт қилсиму дәрдимизни ичимизгә ютуп, сүкүт қилидиған болуп қаптимиз, мәзлум болуп қалдуқмикин? бу, динимизға қилған чоң һақарәт буниң җазасини чоқум тартиду, дегәндәк пикирләрни баян қилған.

Биз бу һәқтә мәлумат елиш үчүн , әйни заманда қағилиқта өткән мәшһур дини алим мәрһум абликим мәхсумһаҗимда оқуған, һазир истанбул шәһиридә яшаватқан уйғур дини алим абдулкәрим кучар әпәнди билән сөһбәт елип бардуқ.

Абдулкәрим кучар әпәнди көз қарашлирини ипадиләп мундақ деди: "муһәммәд әләйһиссаламниң рәсимини сизиш ислам динида чәкләнгән, шуниң үчүн ислам тарихидиму муһәммәд әләйһиссаламниң рәсими сизилғанлиқи яки муһәммәд әләйһиссаламниң рәсиминиң башқа бир дөләтниң падишаһиға совға қилинғанлиқи тоғрисида һечқандақ бир мәлумат йоқ. Бу хитайларниң өзлири ойдуруп чиқарған ялған тарих, һәмдә муһәммәд әләйһиссаламға вә мусулманларға қилинған чоң бир һақарәт, бу филимни ишлигән хитай яки хитай ширкити буниң җазасини чоқум тартиши керәк."