Xitayda ishlen'gen "tang padishahliqi" dégen téléwiziye filimide muhemmed eleyhissalamgha haqaret qilin'ghan

Xitayning merkizi téléwiziye istansisi ishligen "tang padishahliqi" dégen téléwiziye tiyatirining 15 ‏- qismida körsitilishiche, ereb padishahining elchiliri teripidin padishah tang shü'enzonggha bir resim lewhesi sowgha qilin'ghan bolup, u resimdiki süretni ereb padishahining elchiliri tang shü'enzonggha " bu, muhemmed eleyhissalamning süriti" dep tonushturghan.
Muxbirimiz arrslan
2008-12-24
Share

U filimde muhemmed eleyhissalamning süriti dep tonushturulghan resimning bir közi qarighu sizilghan bolup, bu körünüsh Uyghur qatarliq musulman xelqlerning qattiq naraziliqini qozghidi. Intérnét munazire munberliride nurghun shexsler naraziliqini ipadilep pikirlirini bayan qildi. Filimning 15 ‏- qismidiki 22 ‏ - minutluq yéride u süret körsitilgen.

Bu filim xitayning merkizi téléwiziye istansisida tarqitilghandin kéyin, dunyagha meshhur filim tor béti www.youtube.com We http://www.diyarim.com Tor betliride élan qilin'ghan.

Diyarim tor bétining munazire munbiride bu filimni körgen intérnét ziyaretchiliri pikirlirini töwendikidek bayan qilghan: bu bir oydurmichiliq, ezeldin bolmighan ishni oydurup chiqirip xitaylar özlirini köz ‏- köz qilghanliq dep baha bergen. Bezi ziyaretchiler peyghembirimizning bu dunyada süriti yoq, héch kim sizalmaydu dep yazghan bolsa, bezi tor ziyaretchiliri , bashqilar bizni depsende qilsimu, haqaret qilsimu derdimizni ichimizge yutup, süküt qilidighan bolup qaptimiz, mezlum bolup qalduqmikin? bu, dinimizgha qilghan chong haqaret buning jazasini choqum tartidu, dégendek pikirlerni bayan qilghan.

Biz bu heqte melumat élish üchün , eyni zamanda qaghiliqta ötken meshhur dini alim merhum ablikim mexsumhajimda oqughan, hazir istanbul shehiride yashawatqan Uyghur dini alim abdulkerim kuchar ependi bilen söhbet élip barduq.

Abdulkerim kuchar ependi köz qarashlirini ipadilep mundaq dédi: "muhemmed eleyhissalamning resimini sizish islam dinida cheklen'gen, shuning üchün islam tarixidimu muhemmed eleyhissalamning resimi sizilghanliqi yaki muhemmed eleyhissalamning resimining bashqa bir döletning padishahigha sowgha qilin'ghanliqi toghrisida héchqandaq bir melumat yoq. Bu xitaylarning özliri oydurup chiqarghan yalghan tarix, hemde muhemmed eleyhissalamgha we musulmanlargha qilin'ghan chong bir haqaret, bu filimni ishligen xitay yaki xitay shirkiti buning jazasini choqum tartishi kérek."
Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet