Хитайниң хәлқарада чәкләнгән сүт парашоки сәуди әрәбистанға кирмәктә

Хитайдики бовақлар сүт парашокидин зәһәрлиниш мәсилиси еғир киризис һасил қилди. Сүрәттә, хитай анилар зәһәрлик мадда бар сүт парашокини қоллирида көтүрүп наразилиқини билдүрмәктә.

Мақалидә мундақ дәп йезилған:" әл рияд гезити хәлқарада тонулған чоң бир ширкәтниң васитиси билән сәуди әрәбистан пайтәхти рияд шәһиридики мәшһур бир йемәк - ичмәкләр дукинида хитайниң чәкләнгән сүт парашокини байқиди. Хитайниң сүт парашоки сәтчилики дуняға йейилғандин кейин, явропа иттипақи вә хитайниң сүт мәһсулатлирини алидиған дөләтләрниң хитайдин келидиған сүт парашоклирини базарлардин чәкләш һәққидә қарар чиқириши арқисида, техи мушу айниң бешидила сәуди әрәбистанниң сода - санаәт министирлики сәуди әрәбистан базарлирида хитайниң сүт мәһсулатлириниң, хусусән хитайда ишләнгән яки бирәр маддиси хитайдин кәлтүрүлүп ясалған балилар йемәкликлириниңму қәтий йоқлиқини елан қилған иди."

Сода - санаәт министирлики рухсәт бәрмигән

Мақалидә йәнә мундақ дәп йезилған:" сәуди әрәбистан базарлирида хитайниң сүт парашоклири байқалғандин кейин, сәуди әрәбистан сода - санаәт министирлики өзиниң бундақ сүт парашокиниң базарларға келишигә рухсәт қилмиғанлиқини тәкитлиди. Лекин мәзкур министирлик һазирғичә хитайниң чәкләнгән сүт парашокини пүтүн сәуди әрәбистани базарлиридин тазилаш һәққидә кәскин әмр чүшүргән болсиму, хитайниң зәһәрлик дейилгән бу сүт парашокиниң хәтириниң қанчилик дәриҗидә икәнлики һәққидә тәпсили мәлумат бәрмигән."

Хитайдин келидиған йемәк - ичмәкләр алаһидә қаттиқ тәкшүрүлиду

Мақалидә йәнә мундақ дәп йезилған:" сәуди әрәбистан сода - санаәт министирлики мундин икки һәптә бурун елан қилған баянатида, хитайдин кәлтүрүлгән балилар йемәкликлириниң вә һәр қандақ сүтләрниң, хусусән сүт парашокиниң ' меламин' дәп аталған зәһәрлик маддидин саламәт икәнликини тәкитләш үчүн тәкшүрүшни қаттиқ чиңитиш, хитайниң сүт парашоки сәтчилики билән тонулған мәзкур ширкитиниң мәһсулатлирини сәуди әрәбистани базарлириға қәтий елип кәлмәслик һәққидә қарар чиқарған иди."