Уйғур елидин инкас: 'даириләр 4 ни ениқлаш арқилиқ бизни қорқутуватиду әмма биз пәрвасиз'

Игилигән учурлардин мәлум болушичә, уйғур аптоном районида давамлишиватқан "төтни ениқлаш, төтни игиләш" хизмити уйғурларға қаритилған. Уйғур елидин радиомиз зияритини қобул қилған уйғурларниң ейтишичә, һазир елип бериливатқан "4 ни ениқлаш һәрикити" вә күндин - күнгә көпәйтиливатқан сақчи вә хәлқ әскәрлиригә нисбәтән уйғурлар пәрва қилмайдиған болуп қалған.
Мухбиримиз миһрибан
2010-09-17
Елхәт
Пикир
Share
Принт
Сүрәт, 2010 -  йили 3 - ийул, "5 - ийул вәқәси" һарписида үрүмчи кочилиридики хитай сақчилириниң чарлаш әтрәтлиридин бир көрүнүш.
Сүрәт, 2010 - йили 3 - ийул, "5 - ийул вәқәси" һарписида үрүмчи кочилиридики хитай сақчилириниң чарлаш әтрәтлиридин бир көрүнүш.
AFP Photo

Қәшқәр һөкүмәт ториниң 15 - сентәбирдики хәвиридә, бу һәрикәтниң мәқсити баян қилинған. Униңда, "бу қетимлиқ һәрикәттә, бу хизмәткә тәйинләнгән кадирлар һәр бир аилиниң омуми әһвалини игиләш, һәммини чүшиниш, һәммини тәкшүрүш, һәммини ениқлаш, һәммини игиләштин ибарәт хизмәт үнүмдарлиқини 100%кә йәткүзүш" тәлипи оттуриға қоюлған.

Уйғур елидин зияритимизни қобул қилған, һазирчә исмини ашкарилашни халимиған бир йеза кадири, бу қетимлиқ тәкшүрүштә кадирларниң мәсулийәт түзүми конкрет бәлгиләнгәнликини, йезиларда кәнт мәһәллә кочилар бойичә деһқан аилилириниң "төтни ениқлаш, төтни игиләш хизмити"гә мәсул болған кадирларға тәқсим қилинип, бу кадирларға деһқанларниң конкрет әһвалини игиләш вәзиписи тапшурулғанлиқини билдүрди.

Бу йеза кадири йәнә, бу қетимлиқ тәкшүрүш хизмитиниң қаратмилиқи һәққидә тохталди. У сөзидә бу қетимқи тәкшүрүштә, илгири сиясий хаталиқлар билән җазаланғанлар, түрмидә йетип чиққанлар, бултур үрүмчидә йүз бәргән "5 - июл үрүмчи вәқәси" гә охшаш вәқәләргә қатнашқанлар һәм яқа юртларда уруқ - туғқан балилири барларниң нуқтилиқ тәкшүрүш обйекти қилинип, тәкшүрүш җәрянида һәр бир аилиниң әһвалидин язма хатирә қалдурулуп, булар архип шәклидә йезилиқ һөкүмәттә сақлинидиғанлиқини баян қилди.

Икки оғли сиясий җинайәт билән әйиблинип, айрим - айрим һалда 10 йиллиқ һәм 3 йиллиқ қамақ җазасиға һөкүм қилинған бир ханим зияритимизни қобул қилди. У сөһбәт җәрянида, уларниң аилисиниң шу йезидики һөкүмәт диққәт қилидиған алаһидә аилиләрдин болғини үчүн, йезиға чүшкән хизмәт әтритиниң алди билән уларниң аилисини тәкшүрүш еһтималлиқи барлиқини, әмма һазирчә "төтни ениқлаш, төтни игиләш хизмити" гә мәсул кадирларниң техи уларниң өйигә тәкшүрүш үчүн кирмигәнликини билдүрди.

Пенсийигә чиққан мәлум бир уйғур зиялийси, йезиларда елип бериливатқан "төтни ениқлаш, төтни игиләш хизмити" ниң бултур "5 - июл үрүмчи вәқәси" дин кейинла башланғанлиқини, һазир бу ишқа тәқсим қилинған йеза кадирлириниң өйму - өй кирип һәр бир аилиниң аилә тарихиниму өз ичигә алған һалда, шу аилидики барлиқ аилә әзалириға һәм уларниң йирақтики уруқ -туғқанлириға мунасивәтлик барлиқ учурларни игиләп, җәдвәл толдуруп, рәтләнгән материялларни йезилиқ һөкүмәткә тапшуруватқанлиқини билдүрди.

Униңдин йезидики деһқанларниң бу хил тәкшүрүш хизмитигә болған инкасиниң қандақлиқини сориғинимизда, у, һазир деһқанларниң бу хил тәкшүрүшләргә пәрвасиз муамилә қилидиғанлиқини, чүнки бултур "5 - июл үрүмчи вәқәси"дин кейин, вәзийәт барғанчә чиңип, наразилиқ билдүргәнләр қаттиқ җазаланғини үчүн, һазир кишиләрдә һөкүмәт елип бериватқан һәрқандақ һәрикәткә нисбәтән пәрвасиз болувелиш хаһиши күчийиватқанлиқини илгири сүрди.
 
У, нөвәттики қаттиқ назарәт астидики уйғур вәзийити һәм уйғурларниң бу хил вәзийәткә болған пәрвасиз һалитини ипадиләп сөзини муну җүмлиләр билән аяғлаштурди.

"Шундақ һазир әслидики кинишкиси бар сақчилар көпәйтилип, сақчиханилар күчәйтилди. Униңдин башқа хәлқ әскәрлири дәп аталған бир түркүм кишиләргә қорал тарқитип берип, уларни коча - кой, мәһәллиләрни қоғдашқа орунлаштурди. Һазир кечә саәт 9 - дин кейин, сақчи машинилири сигнал берип, муқимлиқни сақлаймиз дәп кечичә чарлаш елип бариду. Әмма уйғурлар бу ишларға пәрвасиз болувалдуқ. Һөкүмәт муқимлиқни сақлаймиз дәп өз иши билән алдираш, бизму бу ишларға пәрвасиз!"

Юқиридики аваз улинишидин, бу һәқтики мәлуматимизниң тәпсилатини аңлайсиләр.

 
Пикирләр (0)
Share
Толуқ бәт