Америка дөләт мәҗлиси әзаси: хитайниң иқтисадий ишпийонлуқ һәрикити чидиғусиз дәриҗигә йәтти

Америкини үзлүксиз давамлишиватқан интернет һуҗумлиридин қоғдаш мәқситидә чақирилған гуваһлиқ бериш йиғини җамаәткә очуқ йосунда 4-өктәбир америка дөләт мәҗлисидә елип берилди.
Мухбиримиз җүмә
2011.10.05
cyber-terror-internet-ishpiyon-xitay-mike-rogers-305.jpg Америка дөләт мәҗлисидә ечилған, интернет һуҗумлиридин қоғдиниш мәқситидә чақирилған гуваһлиқ бериш йиғиниға майк рогерс риясәтчилик қилди. 2011-Йили 4-өктәбир.
www.mikerogers.house.gov

Америка дөләт мәҗлисиниң истихбарат комитети чақирған бу йиғинида, хитайниң америка санаәт мәхпийәтликлирини оғрилашни мәқсәт қилған интернет ишпийонлуқ һәрикити елип бериватқанлиқини әйиблиди вә америка қатарлиқ дөләтләрни буниңға тақабил турушқа чақирди.

Йиғинға дөләт мәҗлиси истихбарат комитети рәиси, җумһурийәтчиләр партийиси әзаси майк рогерс (Mike Rogers) риясәтчилик қилди. Мәзкур йиғинда америкиға қаритилған интернет ишпийонлуқиниң америка дөләт хәвпсизликигә еғир тәһдит икәнлики илгири сүрүлди.

Бу америка дөләт мәҗлисидики юқири дәриҗилик әмәлдарларниң тунҗи қетим хитайни интернет ишпийонлуқи билән әйиблиши болуп, илгири хитай даирилири ғәрб әллириниң бу хил әйибләшлирини “асассиз” дәп, рәт қилип келиватқан иди.

Хитайниң интернет ишпийонлуқ һәрикәтлирини испатлаш үчүн пәқәт йеқинда хитай гугул ширкитигә қарита елип барған интернет һуҗумлирини мисал қилишниң йетәрлик икәнликини көрсәткән майк рогерс: булар пәқәт бу хилдики һуҗумларниң бәк кечиккинә бир қисми, деди.

У йәнә өзиниң нурғун ширкәтләр билән айрим ‏- айрим көрүшкәндә, бу ширкәтләрниң хитайдин кәлгән интернет һуҗумлириға учрап туридиғанлиқини һәмдә бу хилдики һуҗумларниң интайин юқири сәвийидә тәшкилләнгәнликини ейтқанлиқини мисал қилди.

Майк рогерс бу һәқтә тохтилип мундақ деди: бу хил ишпийонлуқ һәрикитини бирәригә дөңгәш унчә асан әмәс. Бирақ, һәрқандақ бир шәхсий ширкәтниң интернет анализчилири билән сөзләшсиңиз, улар һечқандақ иккиләнмәйла бу чоң типтики һәрикәтләрниң хитай һөкүмити тәрипидин тәшкилләнгәнликини ейтишиду.

Майк рогерс хитай даирилири интернет ишпийонлуқи билән елип барған әқлий мүлүк һоқуқини оғрилаш қилмишиниң “чидиғусиз дәриҗигә” йәткәнликини көрсәтти.

У мундақ деди: хитайниң иқтисадий ишпийонлуқ һәрикити чидиғусиз дәриҗигә йәтти. Шуңа америка, явропа һәмдә асиядики иттипақдашлиримиз бейҗиң даирилири билән робиро көрүшүп, бу хил оғрилиқ һәрикәтләрни дәрһал тохтитишни тәләп қилиши керәк.

Майк рогерс йәнә мундақ деди: бейҗиң даирилири һәммимизгә қарши кәң көләмлик сода уруши қозғиди. Шуңа һәммимиз иттипақлишип, уларни бу қилмишини тохтишишқа қистишимиз керәк.

Гуваһлиқ бериш йиғинда хитайни әйиблигән дөләт мәҗлиси әзалиридин демократлар партийиси әзаси дуч рупперсбергерму бар болуп, у хитайниң америкиға интернет һуҗуми елип бериватқанлиқиға чоңқур ишинидиғанлиқини билдүрди.

У мундақ деди: биз шуниңға чоңқур ишинимизки, биз хитайниң өктәмлик билән елип бериватқан интернет һуҗумлириға учраватимиз.

Гуваһлиқ бериш йиғинда майк рогерс йәнә америка хәвпсизлики мәсилиси һәққидә алаһидә тохтилип: бизниң әң иҗадий пикирлиримиз вә мәхпий учурлиримизниң уятсизлиқ билән оғрилинип кетиши америкиниң пән-техникидики йетәкчилик орни вә дөләт бихәтәрликигә еғир тәһдит салмақта деди.

У ахирида, америкиниң мунасивәтлик органлирини хитай билән көрүшкәндин башқа, өз алдиға мунасип тәдбирләрни елип, америка тор бихәтәрликини қоғдашқа чақирди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.