Amérika dölet mejlisi ezasi: xitayning iqtisadiy ishpiyonluq herikiti chidighusiz derijige yetti

Amérika dölet mejlisining istixbarat komitéti chaqirghan bu yighinida, xitayning amérika sana'et mexpiyetliklirini oghrilashni meqset qilghan intérnét ishpiyonluq herikiti élip bériwatqanliqini eyiblidi we amérika qatarliq döletlerni buninggha taqabil turushqa chaqirdi.

Yighin'gha dölet mejlisi istixbarat komitéti re'isi, jumhuriyetchiler partiyisi ezasi mayk rogérs (Mike Rogers) riyasetchilik qildi. Mezkur yighinda amérikigha qaritilghan intérnét ishpiyonluqining amérika dölet xewpsizlikige éghir tehdit ikenliki ilgiri sürüldi.

Bu amérika dölet mejlisidiki yuqiri derijilik emeldarlarning tunji qétim xitayni intérnét ishpiyonluqi bilen eyiblishi bolup, ilgiri xitay da'iriliri gherb ellirining bu xil eyibleshlirini “Asassiz” dep, ret qilip kéliwatqan idi.

Xitayning intérnét ishpiyonluq heriketlirini ispatlash üchün peqet yéqinda xitay gugul shirkitige qarita élip barghan intérnét hujumlirini misal qilishning yéterlik ikenlikini körsetken mayk rogérs: bular peqet bu xildiki hujumlarning bek kéchikkine bir qismi, dédi.

U yene özining nurghun shirketler bilen ayrim ‏- ayrim körüshkende, bu shirketlerning xitaydin kelgen intérnét hujumlirigha uchrap turidighanliqini hemde bu xildiki hujumlarning intayin yuqiri sewiyide teshkillen'genlikini éytqanliqini misal qildi.

Mayk rogérs bu heqte toxtilip mundaq dédi: bu xil ishpiyonluq herikitini birerige dönggesh unche asan emes. Biraq, herqandaq bir shexsiy shirketning intérnét analizchiliri bilen sözleshsingiz, ular héchqandaq ikkilenmeyla bu chong tiptiki heriketlerning xitay hökümiti teripidin teshkillen'genlikini éytishidu.

Mayk rogérs xitay da'iriliri intérnét ishpiyonluqi bilen élip barghan eqliy mülük hoquqini oghrilash qilmishining “Chidighusiz derijige” yetkenlikini körsetti.

U mundaq dédi: xitayning iqtisadiy ishpiyonluq herikiti chidighusiz derijige yetti. Shunga amérika, yawropa hemde asiyadiki ittipaqdashlirimiz béyjing da'iriliri bilen robiro körüshüp, bu xil oghriliq heriketlerni derhal toxtitishni telep qilishi kérek.

Mayk rogérs yene mundaq dédi: béyjing da'iriliri hemmimizge qarshi keng kölemlik soda urushi qozghidi. Shunga hemmimiz ittipaqliship, ularni bu qilmishini toxtishishqa qistishimiz kérek.

Guwahliq bérish yighinda xitayni eyibligen dölet mejlisi ezaliridin démokratlar partiyisi ezasi duch ruppérsbérgérmu bar bolup, u xitayning amérikigha intérnét hujumi élip bériwatqanliqigha chongqur ishinidighanliqini bildürdi.

U mundaq dédi: biz shuninggha chongqur ishinimizki, biz xitayning öktemlik bilen élip bériwatqan intérnét hujumlirigha uchrawatimiz.

Guwahliq bérish yighinda mayk rogérs yene amérika xewpsizliki mesilisi heqqide alahide toxtilip: bizning eng ijadiy pikirlirimiz we mexpiy uchurlirimizning uyatsizliq bilen oghrilinip kétishi amérikining pen-téxnikidiki yétekchilik orni we dölet bixeterlikige éghir tehdit salmaqta dédi.

U axirida, amérikining munasiwetlik organlirini xitay bilen körüshkendin bashqa, öz aldigha munasip tedbirlerni élip, amérika tor bixeterlikini qoghdashqa chaqirdi.