Yeken saqchixanisida urup öltürülgen memettursun tashning qéyin atisi toxti hoshur xun dawasini dawamlashturmaqta

Uning ayali dilber toxti, qéyin atisi toxti hoshur hem anisi semerxan obullar ilgiri radi'omiz ziyaritini köp qétim qobul qilip, bu a'ile kishilirining memettursun tashning xun dawasini qilish jeryanida tartqan azablirini bayan qilghan idi. Bügün memettursun tashning qéyini atisi toxti hoshur ependi radi'omiz ziyaritini qobul qilip, özlirining memettursun tashning xun dawasi erzini yenila dawamlashturuwatqanliqini bildürdi.

Radi'omiz 2009-yili 5-ayning 20-küni, Uyghur élining yeken nahiyisidin dilber toxtining éri memettursun tashning 2006-yili 1-ayning 24-küni yeken nahiyilik saqchi idarisining gülbagh yéziliq saqchixanisi teripidin tutup kétilip,11 kündin kéyin,saqchixanining tutup turush ornida, héchqandaq qolgha élish buyruqi bolmighan, téxi jinayiti békitilmigen, jaza höküm qilinmighan ehwal astida wéy jingshen isimlik saqchixana bashliqi hem wén jingyen isimlik ikki neper xitay saqchisi teripidin soraq jeryanida urup öltürülgenliki heqqidiki shikayet xétini tapshuruwalghan iduq.

Biz ilgiriki programmilirimizda bu a'ile kishilirini köp qétim ziyaret qilip, yeken hökümet da'irilirining memettursun tash délosini bir terep qilishta memettursun tashning ölümige seweb bolghan ikki neper xitay saqchisigha yan bésip, ularni qanuni jazagha tartmighanliqi, memettursun tashning ayali dilber xanim hem anisi semerxan obulgha 50 ming yüendin 60 ming yüen'giche tölem pul bérish bilen bu déloning hel bolghanliqini élan qilghanliqi, bu xil qarargha naraziliq erzi sun'ghan dilber toxti hem toxti hoshur qatarliqlarning yerlik saqchi da'iriliri teripidin köp qétim tutqun qilin'ghanliqi heqqide xewer bergen iduq.

26-Aprél küni memettursun tashning qéyini atisi toxti hoshur ependi, radi'omiz ziyaritini qobul qilghinida, özining küy'oghli memettursun tashning xun dawasini yenila dawamlashturuwatqanliqini bildürdi.

Toxti hoshur ependi sözide, özlirining köp qétim erz qilghan bolsimu, yeken nahiyilik hökümet da'irilirining memettursun tashning ölümige seweb bolghan saqchixana bashliqi wéy jingshen hem wén jingyen isimlik ikki neper xitay saqchisini hélighiche qanuniy jazagha tartmighanliqi, qizi dilber toxtigha bérilgen tölem heqqining ziyade az bolghanliqi, dilber toxtigha ilgiri wede qilin'ghan bir yürüsh binaliq öy, memettursun tashning oghlini béqish heqqi hem dilber toxtini xizmetke orunlashturush qatarliq wedilirini orunlimighanliqi üchün, özining küy'oghli memettursun tashning xun dawasi, qizi hem newrisi érishishke tégishlik bolghan qanuniy heqler üchün, türlük bésim hem qorqutushlargha qarimastin erz qilishni dawamlashturuwatqanliq'ini bildürdi.

Toxti hoshur ependi, yeken hökümet da'irilirining qizi dilber toxti hem özini yeken da'iriliri üstidin qeshqer shehiri hem ürümchidiki yuqiri derijilik orunlargha erz qilghini üchün, her xil jinayetlerni artip, yeken saqchixanisigha solap qoyghanliqini bayan qilip, özlirining eng zor qiyinchiliq hem bésimlar ichide erzni dawamlashturuwatqanliqini bildürdi.

Toxti hoshur ependi sözining axirida, soraq jeryanida urup öltürülgen küy'oghlining xun dawasi üchün bérilgen tölem heqqi bilen, 2009-yili 5-iyul ürümchi weqeside ölgen xitay puqralirigha bérilgen 420 ming yüen tölem heqqi otturisidiki perqni sélishturup, özining bu erzni dawamlashturushidiki yene bir seweb, hökümet da'iriliridin heqiqiy haldiki qanuni adilliq, milliy barawerlik telep qilish ikenlikini tekitlidi.