ئۇيغۇر ھۈنەرۋەن ياسىغان ياغاچ ماشىنا 6 ئايدىن بېرى قەشقەردە ساغلام قاتنىماقتا

سىياسىي، ئىقتىسادىي ۋە مائارىپ توسۇقلىرى ئارقىلىق زامانىۋى ئىشلەپچىقىرىش ۋاسىتىلىرىدىن قەستەن ئۇزاقلاشتۇرۇلۇۋاتقان ئۇيغۇر خەلقى ئۆزىنىڭ تەبىئىي ئەقىل-پاراسىتى ۋە ئاتا-بوۋىلىرىدىن قالغان ھۈنەر-ماھارەتلىرىگە تايىنىپ زامانىۋى ئىشلەپچىقىرىش ۋە تۇرمۇش تەرەققىياتىغا يېتىشىشكە ۋە ماسلىشىشقا تىرىشماقتا.
مۇخبىرىمىز شۆھرەت ھوشۇر
2012-11-22
ئېلخەت
پىكىر
Share
پرىنت
ئۇيغۇر ھۈنەرۋەن ياسىغان ياغاچ ماشىنا 6 ئايدىن بېرى قەشقەردە ساغلام قاتنىماقتا. 2012-يىلى نويابىر.
ئۇيغۇر ھۈنەرۋەن ياسىغان ياغاچ ماشىنا 6 ئايدىن بېرى قەشقەردە ساغلام قاتنىماقتا. 2012-يىلى نويابىر.
Facebook tin elinghan

قەشقەر شەھىرىدىكى ھۈنەرۋەن مەمتىمىن سەمەرنىڭ ماتورلۇق ياغاچ ماشىنا ياساپ چىقىشى ئەنە شۇ تىرىشچانلىقنىڭ بىر مىسالى. مەلۇم بولۇشىچە، بۇ يىل 6-ئايدا قەشقەر يەرمەنكىسىگە قويۇلغان مەزكۇر ياغاچ ماشىنا 6 ئايدىن بېرى قەشقەر كوچىلىرىدا ساغلام قاتنىماقتا. مۇخبىرىمىز مەزكۇر ماشىنىنىڭ ئىشلەش پرىنسىپلىرى ۋە نۆۋەتتىكى ئىشلىتىش ئەھۋالى ھەققىدە ماشىنىنىڭ ئىجادكارى مەمتىمىن سەمەر بىلەن سۆھبەت ئۆتكۈزدى.

سوئال: ئەسسالامۇئەلەيكۇم، ياخشىمۇسىز؟
جاۋاب: ۋەئەلەيكۇم ئەسسالام، مەن ياخشى، ئۆزىڭىزچۇ؟

سوئال: سىز قەشقەردىكى ماتورلۇق ياغاچ ماشىنا ياسىغان كىشى بولامسىز؟
جاۋاب: شۇنداق، مەن شۇ.

سوئال: مەن ئامېرىكىدىن تېلېفون قىلىۋاتىمەن، ئەركىن ئاسىيا رادىئوسىدىن.
جاۋاب: تېلېفون قىلغىنىڭىز ئۈچۈن رەھمەت.

سوئال: بىز، سىز ياسىغان ماشىنىنى يەرمەنكە ھەققىدىكى خەۋەرلەردىن كۆرگەن. ماشىنىنىڭ ھازىرقى ئەھۋالى قانداق: بۇزۇلماي-چۇۋۇلماي مېڭىۋاتامدۇ؟
جاۋاب: مېڭىۋاتىدۇ. ئائىلە ماشىنىسى ئورنىدا ئىشلىتىۋاتىمەن؛ كۈنىگە قەشقەر شەھەر ئىچىگە بىر-ئىككى قېتىم كىرىپ چىقىمەن، ئۇنىڭدىن باشقا (ئەسلى مەھەللەم) يامانيارغىمۇ ئايدا بىر-ئىككى قېتىم بېرىپ كېلىپ تۇرىمەن.

سوئال: يامانيارغىمۇ مۇشۇ ياغاچ ماشىنىڭىز بىلەن بارامسىز؟
جاۋاب: شۇنداق.

سوئال: ئۇنداقتا، بۇ ياغاچ ماشىنا ئائىلىڭىزنىڭ ئاساسلىق بىر ئىشلەپچىقىرىش قورالىكەن-دە؟
جاۋاب: دەل شۇنداق.

سوئال: ماشىنىڭىزنىڭ ئىشلەش پرىنسىپى قانداق؟ يەنى قانداق ھەرىكەتلىنىدۇ؟
جاۋاب: ماشىنىنىڭ كۆپ قىسمى ياغاچتىن قۇراشتۇرۇلغان، ئاز بىر قىسمى مېتال؛ ماتورلۇق، توك ئارقىلىق ماڭىدۇ.

سوئال: ماشىنىڭىزنىڭ ئادەتتىكى تۆمۈر ماشىنىلارغا نىسبەتەن ئېيتقاندا ئارتۇق-كەم تەرەپلىرى قايسى؟
جاۋاب: بىرىنچىسى، تەننەرخى تۆۋەن، ئىككىنچىسى پەرقلىق بولغاچقا كىشىلەرنى قىزىقتۇرىدۇ. ئۈچىنچىسى، ئاڭلىسام تۆمۈردىن ياسالغان نەرسىلەر ياغاچتىن ياسالغانغا قارىغاندا زىيانلىق دەپ قارىلىدىكەن، شۇڭا زىيانلىق ئەمەس. يېتەرسىزلىكى تۆمۈر ماشىنىلاردەك سۈرئىتى تېز ئەمەس، سائىتىگە 20-30 كىلومېتىر، تېز بولغاندا 40 كىلومېتىر سۈرئەتتە ماڭغىلى بولىدۇ.

سوئال: سىز ماشىنىنى ياساشتا، مۇشۇ خىل ماشىنىنى ئومۇملاشتۇرۇش، ئىشلەپچىقىرىشتا پايدىلىنىش مەقسىتىدە ياسىغانمۇ ياكى پەقەت بىر ھۈنەر-ماھارەت كۆرسىتىش ئۈچۈن ياسالغانمۇ؟
جاۋاب: ھەر ئىككىسى بار. مەن بىر ھۈنەرۋەن، تالدا چويلا ياساشتىن تارتىپ ياغاچتا ۋېلىسىپىت ياساشقا قەدەر جىق نەرسە ياساپ بېقىپتىمەن، ياغاچتا ماشىنا ياسىغىلى نېمىشقا بولمىغۇدەك دەپلا تىرىشتىم، ئاخىرى ياساپ چىقتىم، 6 ئايدىن بېرى مېڭىۋاتىدۇ، 90 % سىنىقىمدىن ئۆتتى، غەلىبە قىلدىم.

سوئال: ياغاچ ماشىنىڭىز يەرمەنكىگە قويۇلدى، ئەينى چاغدا كۆپلىگەن ئاخبارات ۋاسىتىلىرىنىڭ دىققىتىنى تارتتى، ھېچ بولمىدى دېگەندە مۇشۇ نۇقتىدىن بولسىمۇ ئۆزىڭىز تەۋە يېزا ياكى كەنتتىن بىر قوللاش، رىغبەتلەندۈرۈشكە ئېرىشتىڭىزمۇ؟
جاۋاب: ياق، ئۇنداق ئىش بولمىدى. مەن ئەسلىدە يېڭىشەرنىڭ يامانيار يېزىسىدىن، 13 يىلدىن بېرى، قەشقەر شەھەر ئىچىدىكى ھەزرەتتە تۇرۇۋاتىمەن. بەلكىم ئىككى ئارىلىقتا بولغىنىم ئۈچۈن ئىزدىگۈچىلەر بولمىدى.

سوئال: بۇنىڭدىن كېيىنكى پىلانلىرىڭىز نېمە؟ يەنە باشقا يېڭى نەرسىلەرنى ياساپ بېقىش ئويىڭىز بارمۇ؟
جاۋاب: (ئىقتىسادى) ئەھۋالىم بەك ياخشى ئەمەس، بىر تەرەپتىن ئائىلىدىكى 4 بالىنى بېقىش، يەنە بىر تەرەپتىن مۇشۇنداق ھۈنەر-ماھارەتلىرىمىزنى كۆرسىتىش بىلەن ئۆتۈۋاتىمەن. بۇرۇنمۇ ياغاچتا ۋېلىسىپىت ياسىغان ئىدىم، ھازىرغىچە قوللىنىۋاتىمەن، ياغاچ ماشىنىنىمۇ 3-4 يىلدا ياساپ چىقتىم. يېقىندىن بۇيان سىزگە ئوخشاش قوللىغۇچىلىرىم كۆپىيىۋاتىدۇ؛ ئىنشائاللا، ئالدىمىزدىكى يىللاردا يەنە يېڭى نەرسىلەرنى ياساش ئويۇم بار....

پىكىرلەر (0)
Share
تولۇق بەت