Японийиниң 'сазанами' намлиқ пачақлиғуч парахоти хитай туприқиға қәдәм басқанда қарши елинди

 Бу японийә һәрбий қисимлириниң иккинчи дуня уруши аяқлашқандин буян тунҗи қетим хитай туприқиға қәдәм басқанлиқи болуп һесаблиниду. Бу японийә парахоти, пилан буйичә, хитайни бәш күн зиярәт қилиду. Буниңдин бурун, сичүәндә апәт йүз бәргәндә, японийиниң апәткә учриған хәлққә ярдәм беридиған әшялирини дәрһал нәқ мәйданға йәткүзүп бериш үчүн һәрбий айропилан қоллинишни хитай һөкүмити рәт қилған иди.

'Сазанами' сичүәндә апәткә учриған хәлққә ярдәм беридиған әшя елип кәлди

Б б с ниң баян қилишичә, японийә өзини қоғдаш әтритиниң 'сазанами' бәлгилик пачақлиғучиси билән кәлгән 240 нәпәр деңиз җәңчиси, сичүәндә апәткә учриған хәлққә ярдәм беридиған әшядин 300 данә әдиял вә 2600 кишилик тәйяр йемәклик вә дора қатарлиқ җиддий керәклик әшя елип кәлгән.

Франсийә агентлиқиниң баян қилишичә, хитай ташқи ишлар минситирлиқиниң баянатчиси лю җәнчав бу қетим японийиниң 'сазами' бәлгилик һәрбий парахотиниң хитайни зиярәт қилиши бултур 11 ‏ - айда хитайниң 'шенҗен' бәлгилик башқурулидиған бомбиға тақабил туридиған һәрбий парахоти японийини зиярәт қилғанлиқиға қилинған җавабән зиярәт, шуңлашқа буниңға қарита һечқандақ аммивий ғәзәп қозғалмайду, дәп чүшәндүргән.

Икки милләт оттурисида чүшәнчә вә өз - ара ишиниш пәйда болуши мумкин

японийидә чиқидиған 'санкей гезити'дә баян қилинишичә, японийә мудапиә министирлиқиниң баянатчиси такаши сәкине японийә һәрбий парахотиниң хитайни зиярәт қилиши бултур ху җинтав японийини зиярәт қилғанда муқимланған иди. Бу зиярәтниң мәқсити японийә билән хитай мунасивитини яхшилаштин ибарәт.

Гәрчә япон - хитай мунасивитиниң яхшилинишиниң ундақ тез болушини тәсәввур қилғили болмисиму, әмма 'сазанами' хитайға киргәндин кейин икки милләт оттурисида чүшәнчә вә өз ‏ - ара ишиниш пәйда болуши мумкин, дегән.

Японийиниң өзини қоғдаш әтрити шәрқий теморда вә ирақта яхши образ яратқан иди

Америка авазиниң баян қилишичә, хитайниң деңиз армийә генерал маюри яң йи хәлқни японийиниң һәрбий парахотиниң япон байриқи есип хитай туприқиға қәдәм басқанлиқини тоғра чүшинишкә чақирған. У сөзидә, тарихта японийиниң таҗавузи гәрчә хитайға еғир зиян кәлтүргән болсиму, у бәрибир тарихта өткән бир вәқә болуп қалди.

Йеқинқи тарихқа қарайдиған болсақ, японийиниң өзини қоғдаш әтритиниң шәрқий теморда вә ирақта елип барған паалийити хәлққә яхши тәсир қалдурди, у өзиниң интизамға риайә қилидиған, әдәп вә қаидини билидиған, башқа дөләткә һүрмәт қилидиған һәрбий қисимлиқ образини яратти, дегән.

'Хәлқ гезити' ейтқандәк зор қалаймиқанчилиқ йүз бәрмиди

Йәрлик хәлқниң франсийә агентлиқиға ейтип беришичә, хитай даирилири дәсләптә йәрлик орунларға чиқарған уқтурушида, япон парахоти кәлгәндә, 'агаһландуруш бәлгиси' есилиши лазимлиқини тапилиған икән.

Хитайниң 'хәлқ гезити'му японийиниң һәрбий парахоти җуңго зиминиға қәдәм басса, хәлқ ичидә җиддий қаршилиқ йүз бериши, һәтта у зор қалаймиқанчилиққа айлиниши мумкин, дәп йәрлик даириләрни агаһландурған иди.

Хәвәрдә баян қилинишичә, әмәлийәттә, японийиниң өзини қоғдаш әтритиниң 'сазанами' намлиқ пачақлиғучи парахоти хитайниң гуаңдуңдики җәнҗяң портиға киргәндә, хитайниң ақ кийимлик деңиз армийә әскәрлири сәп түзүп қарши алған. Гәрчә йолниң икки тәрипигә японийиниң дөләт байриқи қадалған болсиму, йәрлик хәлқтә, бәлки 'хәлқ гезити' ейтқанниң тәтүрисчә иш болған, һечқандақ қаршилиқ һесят яки аламәт көрүлмигән.