Yaponiyide apettin kéyinki qurulush dawamlashmaqta

Nöwette yaponiyide yer tewreshtin kéyinki qurulush ishliri dawamlishiwatqan bolup, yaponiye hökümiti yapon puqralirining yéngi öy qurulushigha türlük yollar arqiliq yardem bermekte iken. Yaponiyidiki Uyghurlardin dunya Uyghur qurultiyining yaponiyidiki mes'uli ilham mexmut ependining bildürüshiche, yaponiyilikler apettin kéyinki iqtisadning téz arida eslige kélishige ishench bilen qaraydiken.

Yaponiye téléwiziyisining bügünki xewiride déyilishiche, yaponiye hökümiti peyshenbe küni qarar chiqirip, apetke uchrighan puqralargha bériliwatqan yardemdin sirt yene yaponiye bankisining puqralarning öy-makanlirini eslige keltürüsh qurulushi üchün, 150 milyard yaponiye yini ösümsiz qerz sommisi ajratqanliqini bildürgen. Xewerde puqralarning bu qerzge iltimas qilish waqti 2011-yili 10-ayning axirigha qeder dep belgilen'gen.

Yaponiye saqchi da'irilirining bildürüshiche, 28-aprélgha qeder yaponiyide yer tewresh hem déngiz shawqunida ölgen adem sanining 14 ming575 neperge yetkenliki melum bolghan. Hazirghiche iz dériki bolmighanlar sani 11ming 324 neper bolghan. Apettin kéyinki iqtisadiy ziyan 20 tirilyon yaponiye yini dep mölcherlenmekte iken.

Yaponiyide yer tewresh apiti yüz bergendin kéyin, nurghunlighan chet'ellikler öz döletlirige qaytip ketken. Emma yene bir qisim chet'ellikler xizmet we oqush éhtiyaji seweblik yaponiyide dawamliq qélip qalghan bolup, ular yaponiye xelqi bilen birlikte apettin kéyinki qurulush ishlirigha qatnashmaqta iken.

Dunya Uyghur qurultiyining yaponiyidiki mes'ul xadimi ilham mexmut ependi yaponiyide dawamlishiwatqan apettin kéyinki qurulush ehwali heqqide toxtaldi.

Ilham mexmut ependi yaponiye hökümiti we xelqining apettin qutquzush ishliri yolidiki semimiyiti hem mes'uliyetchanliqining tolimu yuqiriliqini teriplep, buni xitayda yüz bergen tebi'iy apetlerde xitay hökümitining pozitsiyisi bilen sélishturush mumkin emeslikini ilgiri sürdi.

Yaponiye hökümiti yaponiye bu qétimqi yer tewresh hem déngiz shawqunining yaponiye iqtisadining töwenlishige seweb bolghan bolsimu, emma yene 5 yil ichide yaponiye iqtisadining eslige kélidighanliqini bildürgen.

Ilham mexmut ependi bolsa yaponiye iqtisadining eslige kélishige ümidwar pozitsiyisini ipadilep, eger yaponiye xelqi mushu halette tirishchanliq körsetse yaponiye iqtisadining 5 yildinmu qisqa muddet ichide eslige kélidighanliqini bildürdi.