Йәмән президенти ели абдулла салеһ бүгүн истепанамигә имза қойди

Йәмән президенти ели абдулла салеһ бүгүн истепанамигә имза қоюп, һоқуқни йәмәнниң муавин президентиға өткүзүп беридиғанлиқини җакарлиди. Йәмәндә бу хил өзгиришләр йүз бериватқан пәйтләрдә америка дөләт ишла министири йәмәнлик нобел тинчлиқ мукапати саһиби тәвәккүл кәрманни күтүвелип, америкиниң демократик йәмәнни қоллайдиғанлиқини билдүрди.
Мухбиримиз җүмә
2011.11.23
abdullah-saleh-305 Йәмән перизеденти абдулла салиһниң сәуди әрәбистандики һоқуқ өткүзүп бериш сорунидики сүрәтлири
AFP

Йәмәнни 33 йил сориған йәмән президенти ели абуллаһ салеһниң истепанамиси һәққидики ишлардин толуқ хәвәрдар һөкүмәт әмәлдарлириниң мәлуматиға қариғанда, йәмән президенти салеһ вәзиписидин истепа беришкә қистайдиған келишимгә бу нөвәт рәсмий имза қойған. Мәзкур келишим бойичә, ели абдуллаһ салеһниң һоқуқи рәсмий бикар қилинип, орниға нөвәттики муавин президент абдурәбуһ мәнсур һәди бекитилидикән.

Келишим чаршәнбә күни сәуди әрәбистанниң рияд шәһиридә имзаланған болуп, келишим һасил қилиш мурасимға сәуди падишаһи абдуллаһ вә сәуди әрәбистанниң бир қисим юқири дәриҗилик әмәлдарлири қатнашқан.

Тунис вә мисир қатарлиқ әрәб әллиридә откән йилниң ахири башланған “әрәб баһари” намлиқ инқилаб ғәлибә еришкәндин кейин, инқилаб отлири йәмән, сүрийә, вә ливийә қатарлиқ оттура шәрқ әллиригә туташқан иди.

Тунис, мисир вә ливийә рәһбәрлири намайиш вә қозғилаңлар арқилиқ ағдурулған иди. Йәмән президенти салеһниң истепанамигә имза қоюши билән “әрәб баһари” инқилаби оттура шәрқтә ағдурған һөкүмәт рәһбәрлири 4 кә йәтти.

Ели абдуллаһ салеһ 1973 - йилидин буян йәмәндә һоқуқ тутуп келиватқан болуп, өткән 33 йилдин буян униң йәмәнни пүтүнләй диктаторилиқ билән сориғанлиқи мәлум.

Салеһ йәмәндә қаршилиқ намайиши башланғандин буян намайишларни һәрбий күч ишлитип бастурған вә ахири вәзиписидин истепа беришкә мәҗбурланған болсиму, келишимгә имза қоюштин бир нәччә қетим йенивалған иди.

Гәрчә у бу нөвәт келишимгә ахири имза қойған болсиму, йәмән сиясий сәһнисидә йәнә қанчилик имтиязни сақлап қалғанлиқи намәлум.

Салеһни вәзиписидин истепа беришкә қистап келиватқан обама һөкүмити салеһниң истепа бәргәнликини қизғин қарши алидиғанлиқини билдүргән.

Салеһ нөвәттә рияд шәһиридә туруватқан болуп, униң йәмәнгә қайтидиған яки қайтмайдиғанлиқи мәлум әмәс икән.

Салеһ бу йил 6 - июл бомба һуҗумға учрап еғир яриланғандиму сәуди әрәбистанға келип даваланған вә бир мәзгил шу йәрдә туруп қалған иди.

Б д т баш катипи бан кимунниң мухбирларға билдүрүшичә, салеһ чаршәнбә күни униңға телефон қилип, давалиниш үчүн ню - йорк шәһиригә келишини ойлишиватқанлиқини билдүргән. Әмма у бу һәқтә техи рәсмий илтимас сунмиған.

Йәмән президентиниң истепанамигә имза қойғанлиқи ашкариланған мәзгилдә америка дөләт ишлар министири һиларий клинтон ханим 2011 - йиллиқ нобел тинчлиқ мукапати саһиби вә “әрәб баһари” инқилабиң йетәкчилиридин бири тәвәккүл кәрманни күтүвалди.

Һиларий клинтон ханим бу хусусида америка дөләт ишлар министирлиқида ечилған ахбарат елан қилиш йиғинда америкиниң йәмәндә демократик усулда һөкүмәт алмишишини халайдиғанлиқини билдүрди.

У мундақ деди: америка йәмәндә демократик усулда һөкүмәт алмишишини, йәмәндики барлиқ хәлқни һәмдә уларниң өз йетәкчилири вә кәлгүсини таллаш һоқуқини қоллайду.

У йәнә, америка қошма штатлириниң йәмәндә инқилаб қозғап нәтиҗигә еришиватқан яшлар вә йәмән хәлқи билән һәмкарлишишни халайдиғанлиқини билдүрди.

Йиғинда, тәвәккүл кәрман ханимму сөзлиди. У мундақ деди: биз йәмәнниң кәлгүси. Һәмкарлишип елип барған күрәшлиримиз нәтиҗисидә салеһ вә униң һакимийити завал тапти.

2001 - Йили 27 - январ 10 миңдин артуқ йәмән яшлири йәмәндики ишсизлиқ, чириклик вә адаләтсизликкә етираз билдүрүп йәмән пайтәхти сана шәһиридә намайиш қилған. Бу намайиш вә шундин кейинки тинч йосунда елип берилған намайишлар бастурулғандин кейин, йәмәндики намайишлар қораллиқ тоқунушқа айланған иди.

Салеһниң, йәмән хәлқиниң күчлүк арзуси вә йәмәндә барғанчә еғирлишиватқан қораллиқ тоқунушларға бәрдашлиқ берәлмәй ахири һоқуқидин истепа бәргәнлики мәлум.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Пикир

Anonymous
Nov 23, 2011 10:13 PM

Әмди нөвәт қайси мустәбиткә кәлгәнду?