Uyghur déhqanlirining kentlerdiki “Démokratik saylam” heqqide dégenliri

Xitay metbu'atlirida déhqanlarning démokratik usulda kent bashliqlirini saylap chiqiwatqanliqi heqqide xewerler bérilmekte. Undaqta nöwette xitayda yézilarda heqiqeten démokratik usulda kent bashliqi saylash omumlashtimu? Uyghur yéziliridiki kent bashliqi saylamliri qandaq élip bériliwatidu?
Muxbirimiz méhriban
2012.06.29
Share on WhatsApp
Share on WhatsApp


Uyghur aptonom rayon da'iriliri yéqinqi xewerliride, yézilardiki tereqqiyat heqqide xewer bérip, nöwette Uyghur yézilirida démokratik usulda kent bashliqi saylash, her bir kentte birdin aliy mektep tügetken kent kadiri bolush nishanini emelge ashurush yolgha qoyuluwatqanliqini ilgiri sürgen idi.

Xitay metbu'atlirida teshwiq qiliniwatqan “Kent bashliqini démokratik saylash”, “Her 3 yilda bir qétim kent bashliqi saylimi ötküzüsh”, “Her bir kentte birdin aliy mektep sewiyisidiki kent kadiri bolush” qatarliq xewerlerge nispeten, Uyghur déhqanliri inkas qayturup, “Kent bashliqini démokratik usulda saylap chiqish”, “Kent kadirliri aliy mektep sewiyiside bolush” dégen bu atalghularni peqetla téliwizor hem gézitlerdiki xewerlerdila anglaydighanliqini tekitlep, Uyghur yézilirida téxi démokratik saylamlar élip bérilmighanliqini ilgiri sürdi.

Xoten hem ili qatarliq yurtlardin ziyaritimizni qobul qilghan Uyghur déhqanlirining bildürüshiche, ular turushluq yézilarda “Kent bashliqini démokratik saylash” dégen gepni anglighan bolsimu, emma yézilardiki kent partkom sékritari, kent bashliqi qatarliq kent kadirlirining yéziliq hökümet teripidin belgilen'gen kadirlar yaki yéziliq hökümettikilerning teshebbusi bilen déhqanlar resmiyet üchünla bélet tashlap, awaz bérish arqiliq saylinidighanliqini bayan qildi.

Xoten nahiyisige qarashliq melum yézidin ziyaritimizni qobul qilghan bir déhqan, ularning kentide téxi aliy mektep sewiyisidiki kent kadirining yoqluqini, kent bashliqiningmu bundin on nechche yil ilgiri yéziliq hökümet teripidin belgilen'gen eyni kishi ikenlikini bildürüp, ularning kentidiki déhqanlarning yéqinqi 10 yil ichide kent bashliqi saylimi élip barmighanliqini bayan qildi.

Ili diyariridin ziyaritimizni qbul qilghan Uyghur déhqanliri, 80 - yillarning axirqi mezgilliridin bashlap, yézilarda “Her 3 yilda bir qétim kent bashliqi saylimi ötküzüsh” tüzümi yolgha qoyulghan bolsimu, emma kent bashliqliri namzatining yéziliq hökümet teripidin körsitilip, déhqanlarning ulargha awaz bérish sheklide kent bashliqi saylinip chiqilidighanliqini bildürdi.

Ghulja shehiri etrapidiki melum yézidin ziyaritimizni qobul qilghan bir déhqan, öz kentide kent bashliqi saylimining soda xaraktérini alghanliqini ilgiri sürüp, bu yil ularning kentide élip bérilghan kent bashliqi saylimida, ilgiriki yillardiki sabiq kent sékritarining, yéziliq hökümettiki bir qisim kadirlar hem shu kenttiki öz yéqinlirigha kala, qoy, yer qatarliqlarni teqsim qilip béridighanliqini wede qilish arqiliq yene qaytidin kent bashliqi bolup saylan'ghanliqini bayan qildi.

Xotendin ziyaritimizni qobul qilghan bu déhqan yene, ularning kentidiki kent bashliqining déhqanlarni hashargha haydash, jerimane élish qatarliq ishlarda xizmet körsitip kelgini üchün, kent kadirliri bilimlik bolush teshebbus qiliniwatqan mushu künlerdimu, déhqanlarni qorqutush bilen nam chiqarghan bu kishining yenila kent bashliqliq wezipiside turuwatqanliqini bildürdi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.