Zeherlik chékimliklerdin hezer eylesh kérek

Namelum eydiz chékermenlirining körünüshi chüshürülgen süret.

Shunga mundaq chiqishi yoq yolgha kirip qélishtin saqlinish ishida hoshyar bolush, özini halaketke atmasliq üchün yaman dostlardin, exlaqsiz kishilerdin yiraq turush tolimu muhimdur.

Se'udi erebistanining mekke mukerreme shehiride turushluq yash alim abdulla hajim bu heqtiki söhbitimizni qobul qilghan idi.

Abdulla hajim bilen söhbet

Abdulla hajim zeherlik chékimliklerning Uyghurlargha élip kelgen balayi'apetliri heqqide toxtulup mundaq didi:" yéqinqi yillardin biri, ana wetinimizdiki musulman yash oghul - qizlirimiz arisigha zeherlik chékimlik chékishtek rezil adet keng tarqilip, xelqimiz üchün chong ijtima'iy balayi'apetlerni, tölep bolghusiz maddiy we meniwi ziyanlarni élip keldi. Bolupmu biz musulman ewladliri ichide sézilgen zeherlik chékimlik chekküchilerning mutleq köp qismi xelqimizning kelgüsi ümidliri baghlan'ghan yash - ösmürler bolup chiqqan. Bu ehwallar ümidwar yashawatqan xelqimizning, kélechek üchün jan köydürüp ishlewatqan, harmay - talmay ter töküwatqan, étiqadi we ibadet ishliridin bashqa her bir sözi ashu yash ösmürlerning bexti üchün sözlinidighan, qollirining her bir herikiti ashu yash ösmürlerning bexti üchün heriket qilidighan, her bir qedimi ashu yash ösmürlerning sa'aditi üchün bésiliwatqan, perzentim dep baghri kawap boliwatqan shu qedirlik ata - anilarning ümidlirini yerde qoydi. Ularning ulugh ghayiliri üchün telpünüp chaqnap turghan nurluq közlerge ghem - qayghu yashlirini bashlap keldi. Bu balayi'apetlerning tüp sewebi bizning milliy we islamiy en'enilirimizdin yiraqliship qalghanliqimiz sewebidin boldi. Chünki bizning yolbashchimiz muhemmed eleyhissalam :" ademni mest qilidighan her qandaq nerse xemri yeni eqilsizlandurghuchi amil bolup, eqilsizlandurghuchi nersilerning herqandighi qet'iy haramdur" dep körsetken."

Zeherlik chékimlikler we ularning xetiri

Abdulla hajim zeherlik chékimlikler we ularning xetiri üstide toxtulup mundaq didi:" zeherlik chékimlik dégen ademni mest qilidighan, xumar tutquzidighan epyun, xéro'in, morfin, neshe, koka'in qatarliq nersiler bolup, bu nersilerde köp miqdarda zeherlik maddilar bar. Bularning kélish menbeliri, ishlepchiqirish usulliri her xil bolup, bu nersiler pütün dunya xelqining lenitige uchrighanliqtin, köpünche ehwallarda yoshurun halda qaraniyetlik kishiler teripidin ishlepchiqirilidu. U lar bu rezil qiliqi arqiliq özlirining erzimes shexsiy menpe'etliri,waqitliq hawayi - hewesliri we cheklik iqtisadiy kirimliri üchün pütün insaniyetni zeherleydu, ulargha zor balayi'apetlerni élip kélidu, xususen milletning kélechiki bolghan yashlarni zeherlesh arqiliq ularni nabut qilidu. Shunga ata - anilarning we her qandaq bir terbiyichining balilarni zeherlik chékimliklerge yéqinlishishtin qattiq tosushi we ularni hemishe bu zeherlerning xetiridin agahlandurup turushi, shundaqla jem'iyettiki nachar kishilerge we yaman dostlargha arilishishtin ularni tosushi zörürdur."

Abdulla hajimning éytishiche, adem zeherlik ichimlik we zeherlik chékimliklerni "bir qétimla qilip baqay" , "bir sinap baqay" dégen'ge oxshash sheytanning neyrenglirige aldining qélip, bu zeherlerning esirige aylinip qélishtin qattiq hezer qilishi kérek. Islam peyghembiri insanlarni bundaq zeherlerdin qoghdash üchün:" köp miqdardikisi mest qilidighan nersining az miqdarimu haram" dep körsitish arqiliq bu haram nersilerge qet'iy yéqinlashmasliqqa buyrighan. Bu hedisning menisidin ademni mest qilidighan barliq nersilerni bir qétim qilip béqishmu, azraq qilip béqishmu, bir sinap béqishmu haram we xeterlik ikenlikini köriwalghili bolidu.