Zeximlen'gen rehimjan : “Apash ex etti....”

Balilar, bizning, kelgüsining dunyaning etisi, ular insaniyet jem'iyiti teripidin hemishe, söyülüshke, méhribanliq bilen asrashqa mohtajdur, halbuki ularning özini qoghdashqa qurbining yetmigenliki, ularning kichikkine téni, ghubarsiz rohi shepqetsiz kishiler teripidin ajizliq dep qarilip zorawanliqqa uchrap turidu, jem'iyette balilarning mewjutluqi, ularningmu yüksek heq hoquqlirining barliqi, ular zorawanliqqa uchrighandila kishilerning yadigha kélidu. Emma bu chaghda ularni qoghdashqa tolimu kéchikken bolimiz. Ürümchide téxi üch yashqa kirmigen rehimjanning omaq yüzliri, omaq pompilaq qolliri, pütün jismi hetta ghubarsiz rohi, u “Apash” dep chaqiridighan baqquchi ayalning rehimsiz zorawanliqigha uchridi, siz bu programmini anglawatqiningizda rehimjan hayat, emma u ilgirikidek wiliqlap külmes boldi.

Uyghur QQ torida tarqalghan mundaq bir weqe, tordashlarning yürikini ezdi. 4-Yanwar üch yashqa kirish aldida turghan rehimjan, ürümchi shimigo rayonida olturushluq bir bala baqquchi ayalning öyide éghir tayaq we zorawanliqqa uchrighan, uning kichikkine jughi hem rohida éghir jarahet izlirini qaldurghan bu weqe uning dadisi teripidin 12 dékabir Uyghurche torlirigha süretlik uchur teriqiside qoyulghandin kéyin, téz arida nurghun tor betlerge tarilip zor ghulghula qozghidi.

Üch yashqa kirmigen baligha qilin'ghan bu qeder rehimsizlik zorawanliq, kishilerni échindurdi. Bu weqe gahilarni heyran qaldurdi, gahilarni ghezepke saldi, shundaqla yene bezilerge jem'iyette heqiqeten mewjut boluwatqan bala béqish, balilarning zorawanliqqa uchrash, balilarning heq hoquqlirini qandaq qoghdash mesililiri heqqide chongqur oylinish pursiti yaratti.

Undaqta biz Uyghur jem'iyitide aldirash jan béqish ghémide yaki torda jahan kézish ghémidiki kishilerni, balilar heqqide oylinishqa salghan, zorawanliqqa uchrighuchi rehimjanning yüreklerni lexte qilghan kechmishini uning ata anisidin anglayli (yuqiridiki awaz ulinishidin anglang).

Bala kelse qosh keptu dégendek, késel we köngül aghriqida teng puchiliniwatqan bu a'ilige nisbeten, her bir a'ile ezasini teqdirning rehimsiz qismitige uchrighan ajiz dep sanashqa bolsimu emma balilar gunahsiz idi ularni qoghdash eng awwal ata anining mes'uliyiti andin jem'iyetning, qanunning mes'uliyiti.

Késel kariwitida kökrek raki késellikining azabida yatqan ana özining ajizliqidin balisinimu qoghdiyalmighanliqidin puchilinip yash tökse, ata bolghuchi özining amalsiz qalghanliqidin, bixestelikidin ökünmekte, emma mushu minutlarda kichikkine jismi hem rohi zeximlen'gen gunahsiz nareside rehimjan etrapidiki kishiler, we ularning özige qilghanliri heqqide némilerni oylawatqandu? buni héchkim bilmeydu, emma u oyliyalaydu, qiyas qilalaydu, qorqidu, téngirqaydu, wehime basidu emma dep bérilmeydu.

Biz rehimjanning heqsizlikke,zorawanliqqa uchrash weqesige da'ir kishiler we orunlar bilen alaqilishishke tirishiwatimiz, mezkur weqe heqqide kéyinki programmilirimizda dawamliq melumat bérishke tirishimiz.