Rabiye qadir xanim ispaniyidiki ikki künlük pa'aliyitini ghelibilik axirlashturdi

Amérika Uyghur birleshmisining mu'awin re'isi alim séyitof ependining bildürüshiche, Uyghur milliy herikitining rehbiri rabiye qadir xanim, 28 ‏- noyabir küni dunya Uyghur qurultiyining mu'awin re'isi ömer qanat bilen birge shiwétsariyidin ayrilip, ispaniyining barsélona shehirige yétip barghan. Ispaniyidiki tibet teshkilatining wekilliri ayropilan istansisida rabiye qadir xanimni kütüwalghan, shu küni chüshtin kéyin, rabiye qadir xanim ispaniye tibet teshkilatining re'isi wang chén bilen körüshüp, Uyghurlar we tibetlerning hazirqi siyasiy weziyiti we qandaq qilghanda bu ikki milletning ehwalini dunya jama'etchiliki arisida téximu yuqiri pellige kötürüp chiqish kérekliki üstide mexsus söhbet élip bérip, öz ‏- ara pikir almashturghan.

29 ‏- Noyabir düshenbe küni, rabiye qadir xanim barsélonada chiqidighan El- Temps heptilik zhurnili, ispaniyining Catradio radi'osi qatarliq metbu'atlarning ziyaritini qobul qilghan.

Shu küni chüshtin kéyin, ispaniye tibet teshkilati bilen ispaniyidiki kishilik hoquq teshkilatlirining birlikte orunlashturghan yighinida, Uyghurlarning kishilik hoquq weziyiti toghrisida mexsus doklat bergen. Shuningdek yene mezkur yighin'gha teklip qilin'ghan dalay lamaning singlisi bilen ayrim uchriship söhbet ötküzgen.

Rabiye qadir xanim ispaniyide yuqiriqi pa'aliyetler tüpeyli jiddi xizmet üstide bolghanliqi üchün, biz rabiye xanimni biwaste ziyaret qilish pursitige érishelmiduq. Amérika Uyghur birleshmisining mu'awin re'isi alim séyitof ependi ziyaritimizni qobul qilip, rabiye qadir xanimning ispaniye ziyariti heqqide melumat berdi we 12 ‏- ayning 10 ‏- küni ötküzülidighan nobél tinchliq mukapati murasimigha, rabiye qadir xanimning qatnishidighanliqi toghrisida tepsili toxtaldi.