Istanbulda "Milliy mepkure we teshkilatchiliq" témisida terbiyelesh kursi ötküzüldi

Ixtiyariy muxbirimiz erkin tarim
2019-04-15
Élxet
Pikir
Share
Print
"Milliy mepkure we teshkilatchiliq" témisidiki terbiyelesh kursida izmir ege uniwérsitéti oqutquchisi alimjan inayet ependi(ongdin üchinchi) söz qilmaqta. 2019-Yili 13-aprél, istanbul.
"Milliy mepkure we teshkilatchiliq" témisidiki terbiyelesh kursida izmir ege uniwérsitéti oqutquchisi alimjan inayet ependi(ongdin üchinchi) söz qilmaqta. 2019-Yili 13-aprél, istanbul.
RFA/Erkin Tarim

Türkiyening istanbul shehiride Uyghur yashliri üchün "Milliy mepkure we teshkilatchiliq" témisida terbiyelesh kursi échildi.

13-14-Aprél künliri türkiyening istanbul shehiride ötküzülgen terbiyelesh kursigha türkiyening herqaysi sheherliride oquwatqan Uyghur oqughuchilardin tallan'ghanlar ishtirak qilghan.

Istanbuldiki sultan satuq bughraxan wexpining zalida ötküzülgen kursqa türkiyening herqaysi uniwérsitétlirida doktorluq, magistirliq unwanliri üchün we toluq kursta oquwatqan 21 oqughuchi tallap qatnashturuldi. Merkizi türkiyening istanbul shehiride turushluq Uyghur akadémiyesi achqan mezkur kursning birinchi küni izmir ege uniwérsitéti oqutquchisi alimjan inayet ependi "Uyghurlarda milliy mepkure", siprus 15-noyabir uniwérsitéti oqutquchisi doktor shewket nasir ependi "Taratqularning sherqiy türkistan dewasidiki roli", Uyghur akadémiyesi bash katipi perhat qurban tengritaghli ependi "Xitayning heqiqiy ichki yüzini tonushning sherqiy türkistan dewasidiki roli", musteqil tetqiqatchi abduraxman jemal kashgheri ependi "Sherqiy türkistan dewasida eqide we pidakarliq" istanbul sabahittin zayim uniwérsitéti oqutquchisi burhan séyit ependi "Oqush we xizmette utuq qazinishning yolliri" témilirida léksiye sözlidi. Mezkur kursning ikkinchi küni, yeni 14-aprél küni bolsa Uyghur akadémiyesi ijra'iye re'isi abdulxemit qaraxan ependi bolsa "Teshkilatchiliq sen'iti we sherqiy türkistan dewasi", doktor gülzade tengritaghli xanim "Sherqiy türkistan dewasida milliy medeniyetni janliq tutushning ehmiyiti", beykent uniwérsitéti oqutquchisi meghpiret kemal yunusoghlu xanim "Türkiye we türklerni chüshinish" témilirida léksiyeler sözligen.

"Milliy mepkure we teshkilatchiliq" namliq terbiyelesh kursini uyushturghan Uyghur akadémiyesi ijra'iye hey'iti re'isi abdulxemit qaraxan ependi yéqindin buyan Uyghur yashlirining Uyghur dewasigha bolghan qiziqishining yuqiri boluwatqanliqi, shunga bu yashlargha milliy mepkurini singdürüsh we Uyghur siyasiy pa'aliyetlirini téximu teshkillik halda élip bérish üchün mezkur kursni uyushturghanliqini bayan qildi.

Qimmetlik radi'o anglighuchilar, türkiyediki Uyghurlarning sanining köpiyishi, bolupmu ularning 2017-yili aprél éyidin tartip Uyghur diyaridiki Uyghurlar bilen bolghan munasiwetlirining üzülüshi bilen birlikte türkiyediki herqaysi ammiwi teshkilatlar we tetqiqat merkezliri her xil kurslarni achmaqta. Abdulxemit qaraxan ependi bu kursning bashqa kurslargha oxshimaydighan alahidilikliri toghrisida toxtaldi.

Istanbulda ötküzülgen "Milliy mepkure we teshkilatchiliq" namliq terbiyelesh kursigha ishtirak qilghan Uyghur oqughuchilardin kastamonu uniwérsitéti türk tili we edebiyati kespi oqughuchisi subinur ömer, özining tunji qétim bundaq terbiyelesh kursigha qatnashqanliqini we buning nahayiti paydiliq bolghanliqini bayan qildi.

Türkiyening qahramanmarash shehiridiki sütchü imam uniwérsitétida xelq'ara munasiwetler kespi boyiche magistirliq unwani üchün oquwatqan muhammet atawullah bu terbiyelesh kursining alahidilikining bilim bérish da'irisining keng bolushi ikenlikini bayan qildi.

Bursa shehiridiki uludagh uniwérsitéti xelq'ara munasiwetler kespi oqughuchisi abduqadir abdukérim bu kursta köp yéngi nersilerni ögen'genlikini, bolupmu, sherqiy türkistan dewasini hemmidin üstün körüshning muhimliqini tonup yetkenlikini bayan qildi.

Abdulxemit qaraxan ependi bu kursning ikkinchi qétimliqini bu yil yazda échishni oylishiwatqanliqi, buninggha xalighan Uyghur oqughuchilar iltimas qilsa bolidighanliqini bayan qildi.

Uyghur akadémiyesi re'isi alimjan inayet mezkur kursning tunji qétim bolushigha qarimay, nahayiti ehmiyetlik ötkenlikini tekitlidi.

Toluq bet