3-Nöwetlik "Milliy mepkure we teshkilatchiliq kursi" axirlashti

Ixtiyariy muxbirimiz erkin tarim
2019-10-08
Élxet
Pikir
Share
Print
Ege uniwérsitéti proféssori alimjan inayet ependi 3-nöwetlik "Milliy mepkure we teshkilatchiliq kursi" ni püttürgen oqughuchilargha diplom tarqatti. 2019-Yili 6-öktebir, türkiye.
Ege uniwérsitéti proféssori alimjan inayet ependi 3-nöwetlik "Milliy mepkure we teshkilatchiliq kursi" ni püttürgen oqughuchilargha diplom tarqatti. 2019-Yili 6-öktebir, türkiye.
RFA/Erkin Tarim

3-Nöwetlik "Milliy mepkure we teshkilatchiliq kursi" türkiyening istanbul shehiride échildi. Merkizi istanbulda turushluq Uyghur akadémiyesi teripidin uyushturulghan ikki kün dawamlashqan kursqa türkiyening her qaysi uniwérsitétlirida magistirliq, doktorluq we toluq kursta oquwatqan 17 Uyghur oqughuchi qatnashqan bolup, bulargha milliy mepkure, teshkilatchiliq we bashqa bezi témilarda léksiye sözlen'gen. Mezkur léksiye axirlashqandin kéyin u témilar boyiche muzakire élip bérilghan. 5-6-Öktebir künliri ötküzülgen milliy mepkure we teshkilatchiliq mawzuluq kurs axirlashqandin kéyin kurs ehlige diplom tarqitip bérilgen. Kursta izmirdiki ege uniwérsitéti proféssori alimjan inayet ependi "Milliy mepkure toghrisida", istanbuldiki arel uniwérsitéti oqutquchisi shewket nasir ependi "Xitayning teshwiqat siyasiti toghrisida", musteqil tetqiqatchi doktor perhat qurban tengritaghli ependi "Xitayning heqiqiy ich yüzini tonushning sherqiy türkistan dewasidiki ehmiyiti", ablimit qaraxan ependi "Teshkilat we teshkilatchiliq" beykent uniwérsitéti oqutquchisi meghpiret kamal xanim "Türkiye we türklerni tonush" témilirida doklat berdi. Biz kurs heqqide téximu tepsiliy melumat igilesh üchün kursni uyushturghan Uyghur akadémiyesi re'isi proféssor doktor alimjan inayet ependi, ijra'iye re'isi ablimit qaraxan ependi we bezi kurs ehli bilen téléfon söhbiti élip barduq.

Ablimit qaraxan ependi milliy mepkure we teshkilatchiliq kursini échishtiki meqset we muzakire bérilgen léksiyeler we muzakire qilin'ghan témilar toghrisida melumat berdi.

Alimjan inayet ependi Uyghur akadémiyesi bolush süpiti bilen 3-qétim bundaq bir kurs ötküzgenlikini, türkiyediki Uyghur yashlarning öz'ara tonushushi, öz'ara chüshinishi we mepkure birliki peyda qilishi üchün paydiliq boluwatqanliqini bayan qildi. Ablimit qaraxan ependi burun Uyghur yashlirining pa'aliyetlerge qatnashmaydighanliqini, kéyinki yillarda Uyghur diyarining weziyitining éghirlishishigha, bu xil kurslarning köpiyishige egiship Uyghur yashlirining dewagha aktip qatnishishqa bashlighanliqini bayan qildi. Kursqa qatnashqan uniwérsitét oqughuchisi toxti niyaz ependi kursning özi üchün nahayiti paydiliq bolghanliqini éytti.

Uyghur akadémiyesi 2019-yili 4-we 7-aylarda ikki qétim "Milliy mepkure we teshkilatchiliq témisida kurs échip jem'iy 41 yashni terbiyeligen.

Pikirler (0)
Share
Toluq bet