Xelq'ara tömör sodisi qiliwatqan bir newre aka-ukilargha ghuljadiki lagérda ashpez-nawayliq "Ögitilmektiken"

Muxbirimiz shöhret hoshur
2020-12-28
Share
Xelq'ara tömör sodisi qiliwatqan bir newre aka-ukilargha ghuljadiki lagérda ashpez-nawayliq Abdusalam abduweli(solda) we ekber yüsüpjan.
BITTER WINTER

Xitayning Uyghur rayondiki atalmish "Kespiy terbiyelesh merkezliri" ge soliwélin'ghanlar arisida köp sanda ilmiy tetqiqatchilar we pen-téxnika xadimliri bolghinidek, xelq'ara tijaretning herqaysiy saheliride ilgirilep kétiwatqan tejribilik tijaretchilerningmu barliqi yéngi-yéngi pakitlar bilen ashkarilanmaqta. Delillinishiche, ghuljada uzun mezgil tümür sodisi bilen shughullan'ghan we kéyin téijaritini qazaqsitan'gha kéngeytken bir newre aka-uka tijaretchilerdin ekber yüsüp bilen abduslam abduweli ghulja shehiridiki yéngiyer lagérida ashpez we nawayliq ögenmektiken

Qazaqistanda turuwatqan Uyghur tijaretchilerning inkas qilishiche, qazaqistan bilen tömür sodisi qiliwatqan bir newre aka-uka tijaretlerdin ekber yüsüp bilen abdusalam abduweli 2017-yili yurti ghuljagha qaytqandin kéyin iz-déreksiz ghayip bolghan. Ularning qazaqistandiki uruq-tughqanliri sürüshte qilish arqiliq bu ikkisining ayrim-ayrim halda 2018-yili 12-ayning 26-küni we 2019‏-yili 4‏-ayning 4-künliri tutup kétilgenlikidin xewer tapqan. Emma ular herqanche qilipmu u ikkisining néme seweptin tutulghanliqi we nede tutup turuliwatqanliqidin xewer alalmighan.

Bu ikki aka-uka tijaretchining qolimizgha yetküzülgen salahiyet kénishkisidiki uchurlardin melum bolushiche, ekber yüsüp bu yil 48 yash bolup, ghulja shehiri shinxu'a 12-yili 11 ‏-qoruda olturushluqtur. Abdusalam abduweli bolsa bu yil 38 yash bolup, ghulja shehirining bext kochisi19-qorusigha olturushluqtur. Biz bu teweliktiki ahaliler kométiti we saqchixanilargha téléfon qilip, bu aka-ukilarning nöwettiki ehwali heqqide melumat soriduq. Xadimlardin birining ashkarilishiche, bu aka-ukilar tutulghandin buyan, boz, yamachang we yéngiyer qatarliq üch orundiki "Terbiyelesh merkizi" de bir mezgildin turghan. Yene bir xadimning déyishiche, bular nöwette nöwette ghulja shehirining "Yéngiyer terbiyelesh merkizi" de tutup turulmaqtiken.

Qazaqistandiki ehwaldin xewerdar tijaretchining melum qilishiche, ekber bilen abdusalamning dadiliri ghuljada taqichiliq bilen shughullinip kelgen kona tömürchilerdin bolup, bu aka-uka yéqinqi yillarda taqichiliqtin ibaret bu ata miras kespini tömür rishatka yasashqa özgertken. Yéqinqi yillarda belgilik derijide tereqqiy qilghan ghuljaning milliy binakarliq we hoyla-aram qurulushi bu aka-ukilarning tijaritige téz güllinish pursiti yaritip bergen. Ular yasighan tömür rishatkilargha qazaqistandimu xéridar chiqqan. Shuning bilen ular tijaritini 2010-yildin kéyin qazaqistan'gha kéngetken.

Ikki dölet arisida üzlüksiz soda qiliwatqan bu aka-uka 2017-yiligha kelgende ghuljadiki saqchilar teripidin yurtigha chaqirtilghan. Özlirining tijarettin bashqa héchqandaq bir ishqa arilashmighanliqigha ishinip yurtigha derhal qaytqan aka-ukilar chigradila béshigha qara xalta kiydürülüp tutup kétilgen. Tunji tutulushida bir heptiche soraqtin kéyin qoyuwétilgen aka-ukilar, 2018- we 2019-yilliri qaytidin tutulup, uchuri a'ile-tawabi'atlirigha bérilmigen.

Biz yenimu ilgirilep élip barghan téléfon ziyaretlirimiz dawamida, bu aka-uka tijaretchilerning mezkur atalmish "Terbiyelesh merkizi" de néme öginiwatqanliqini soriduq. Alaqidar xadim yéngiyer lagérining ular solan'ghan binasida peqet ashpez-nawayliqningla ögitiliwatqanliqini eskertip, ekber bilen abdusalamningmu shu kespni öginiwatqanliqini bayan qildi. Emma ekber we abdusalamning ashpez-nawayliqni qachandin bashlap ögen'genliki we bu öginishning qachan tügeydighanliqi heqqide melumat bérelmidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet