Türkiyediki 73 adwokatlar idarisi xitaygha naraziliq bildürdi

Ixtiyariy muxbirimiz erkin tarim
2021-05-18
Share
Türkiyediki 73 adwokatlar idarisi xitaygha naraziliq bildürdi Elazigh wilayitidiki adwokatlar idarisining mes'uli mustafa yentür ependi. 2021-Yili a7-may, türkiye.
RFA/Erkin Tarim

Türkiyediki 73 adwokatlar idarisi xitayning Uyghurlargha élip bériwatqan insanliq qélipidin chiqqan siyasitini qattiq eyiblep ortaq bayanat élan qildi. Ular mezkur bayanatta barliq her derijilik rehberlerni "Bu heqte mes'uliyitini ada qilishqa, her bir türk puqrasining we ammiwi teshkilatlarning sherqiy türkistan mesilisini izchil halda küntertipte tutup turushqa, barliq xelq'ara teshkilatlarni xitayning Uyghurlargha élip bériwatqan éghir zulum siyasitini tosidighan chare-tedbirlerni élishqa, xelq'ara jama'etchilikni sherqiy türkistandiki Uyghur türklirini qutuldurush üchün heriketke ötüshke" chaqirghan. Bayanatning axirida: "Adwokatlar idarisi bolush süpitimiz bilen adwokatliq kespining rohigha asasen, naheqchilik aldida sükütte turushning heqsizlik ikenlikini nezerde tutqan halda sherqiy türkistanda xitayning zulumi astida turuwatqan Uyghur türklirining yénida turushqa dawam qilidighanliqimizni pütün dunyagha jakarlaymiz" déyilgen.

Türkiyede 78 ming etrapida adwokat bar bolup, bu adwokatlar 81 "Baro", yeni "Adwokatlar idarisi" gha eza bolup wezipe öteydiken. Buning ichidin 73 adwokatliq idarisining Uyghurlarni qollap, xitayni eyiblep bayanat élan qilishi türkiyediki Uyghur dewasi üchün zor ilgirilesh iken.

Xitayning Uyghurlargha élip bériwatqan insanliq qélipidin chiqqan siyasitini qattiq eyiblep ortaq bayanat élan qilghan türkiyediki 73 adwokatlar idarisining tizimliki. 2021-Yili may.

Bu heqte ziyaritimizni qobul qilghan elazigh wilayitidiki adwokatlar idarisining mes'uli mustafa yentür ependi némishqa bundaq kech qalduq? dep öz-özini tenqid qiliwatqanliqini bayan qilip mundaq dédi: "Men uzun yillardin buyan némishqa sükütte turduq? hemme ishqa inkas qayturduq, némishqa Uyghurlar mesiliside sükütte turduq? dep özimiznimu tenqid qiliwatimen. Bu biz kech qalghan bir bayanat. Sherqiy türkistandiki Uyghurlar insan qélipidin chiqqan mu'amilige uchrawatidu. Xitay döliti u yerde insanliqqa qarshi jinayet ishlewatidu. Buni qobul qilghili bolmaydu. Shunga biz bu ortaq bayanatni élan qilduq".

Mustafa yentür ependi xitayning xelq'araning közi aldida bir milletni yoq qiliwatqanliqini, buninggha dunyadiki herqaysi döletlerning arilishishi kéreklikini bayan qilip mundaq dédi: "Biz türkiyede birlik-ittipaqliq ichide awazimizni chiqarsaq, pütün dunya döletliri ige chiqsa bu zulumni toxtatqili bolidu dep oylaymen. Hazir sherqiy türkistan mesiliside del aktip bolidighan zaman dep oylaymen".

Elazigh adwokatlar idarisining mes'uli mustafa yentür ependi türkiye hökümitini heriketke ötküzüshning yolliri heqqide toxtilip mundaq dédi: "Ammiwi teshkilatlar ortaq heriket qilsaq, her kün bir qanche yerdin bu heqte inkas chiqip tursa, dawamliq ortaq muxbirlargha bayanat élan qilip tursaq hökümet bir nerse déyishke mejbur qalidu dep oylaymen. Chünki xitay sherqiy türkistanda insaniyetke qarshi jinayet ötküzüwatidu".

Enqerediki Uyghur tetqiqat instituti mutexessisi doktor erkin ekrem ependi buning zor bir ilgirilesh ikenlikini, türkiyediki adwokatlarning ortaq bayanat élan qilishining zor ehmiyetke ige ikenlikini bayan qildi.

Enqerediki haji bayram uniwérsitéti qanunshunashliq fakultéti proféssori ilyas doghan ependi bu heqtiki ziyaritimizni qobul qilip, 73 adwokatlar idarisining Uyghurlar toghrisida élan qilghan ortaq bayanatining zor ehmiyetke ige ikenlikini, bu bayanatqa türkiye parlaménti bilen türk hökümitining sel qariyalmaydighanliqini bayan qilip mundaq dédi: "Türkiyediki 73 adwokatlar idarisining Uyghurlar toghrisida élan qilghan ortaq bayanati intayin muhim. Bu türkiyediki qanunchilarning xitayning Uyghurlargha élip bériwatqan bésim siyasitining irqiy qirghinchiliq ikenliki toghrisida ortaq pikirge ige bolghanliqini körsitip béridu. Bu türk xelqi üchünmu nahayiti muhim, chünki türkiye parlaménti bolsun, yaki siyasetchiler bolsun qanunchilarning bu obyéktip köz qarishigha sel qariyalmaydu. Bu kélechekte türkiyeningmu bu mesilini irqiy qirghinchiliq dep békitishige türtke bolidu dep oylaymen".

Sherqiy türkistan teshkilatlar birliki re'isi hidayetulla oghuzxan ependi türkiyening 81 wilayitidiki 81 adwokatlar idarisining yetmish üchining Uyghurlarni qollap ortaq bayanat élan qilishining türkiyede Uyghur mesilisidiki zor ilgirilesh ikenlikini otturigha qoydi.

Hidayetulla oghuzxan ependi xitayning bezi Uyghurlarni türkiyedin telep qiliwatqan bir peytte türkiyelik adwokatlarning mutleq köp qismining Uyghurlarni qollishidin Uyghurlarning qattiq xursen bolghanliqini otturigha qoydi.

Yéqindin buyan türkiyede Uyghur mesilisi izchil halda kün tertipte tutup turulmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet