Түркийә адаләт вә тәрәққият партийәсиниң тор арқилиқ өткүзгән йиғини түрк җамаәтчиликиниң наразилиқиға учриди

Ихтиярий мухбиримиз әркин тарим
2021-06-04
Share
Түркийә адаләт вә тәрәққият партийәсиниң тор арқилиқ өткүзгән йиғини түрк җамаәтчиликиниң наразилиқиға учриди Түркийә адаләт вә тәрәққият партийәси билән хитай коммунист партийәсиниң тор арқилиқ тәҗрибә алмаштуруш йиғинини уюштурған түркийәниң бейҗиңда турушлуқ баш әлчиси әмин өнән. 2021-Йили июн.
Social Media

Хитайниң уйғурларға қарита ирқий қирғинчилиқ йүргүзгәнлики америка башта болуп бәзи ғәрб дөләтлири парламентлири тәрипидин бирдәк бекитилгән, уйғур мәсилиси хәлқаралашқан бир пәйттә, түркийәни идарә қиливатқан һакимийәт бешидики адаләт вә тәрәққият партийәсиниң хитай комунист партийәси билән тор арқилиқ тәҗрибә алмаштуруш йиғини өткүзгәнлики, түркийәдики өктичи партийәләрниң, аммивий тәшкилатларниң вә хәлқ аммисиниң күчлүк наразилиқиға учримақта.

Иҗтимаий таратқулардики хәвәрләрдә ейтилишичә, мәзкур йиғинни түркийәниң бейҗиңда турушлуқ баш әлчиси әмин өнән әпәнди уюштурған болуп, униңға хитай компартийәсиниң мәсуллири вә түркийә адаләт вә тәрәққят партийәсиниң бәзи мәсуллири қатнашқан. Йиғин ахбаратқа йепиқ ечилған болуп, йиғинда немиләрниң музакирә қилинғанлиқи мәлум әмәс.

Биз бу йиғин һәққидә мәлумат игиләш үчүн йиғинға қатнашқан адаләт вә тәрәққият партийәсиниң муавин рәиси туғба әрҗан ханимға илтимас қилған болсақму җаваб алалмидуқ. Кейин мәзкур йиғинға иштирак қилған адаләт вә тәрәққият партийәси бурса вилайити яшлар ячейкисиниң мәсули өмәр фаруқ тәмизтүрк әпәндигә телефон қилдуқ. Бизниң "йиғинда немә мәсилиләр музакирә қилинди? уйғур мәсилиси оттуриға қоюлдиму?" дегән соалимизға у мундақ җаваб бәрди: "уйғур мәсилиси шу шәкилдә оттуриға қоюлди. Хитай рәһбәрлири уйғур мәсилисидин түркийә тәрәпниң биарам боливатқанлиқини яхши билидикән. Бу узақта туруп ечилған тор йиғини иди. Йиғинда икки тәрәпниң йәнә бир қетим йиғин өткүзүдиғанлиқи қарар қилинди. Бу йиғинни партийимизниң ташқий ишларға мәсул муавин рәиси мәсул болуп чақирди. Лекин мән бу тоғрилиқ партийимизниң мунасивәтлик рәһбәрлиридин сориғандин кейин андин сизгә тәпсилий мәлумат берәй."

1-Июн күни чақирилған мәзкур йиғинға адаләт вә тәрәққият партийәсиниң бурса вилайитидики рәһбәрлири вә бурса шәһәр башлиқиниңму иштирак қилиши кишиләрниң каллисида соал пәйда қилмақта. Бурса шәһри 2016-йилидин кейин уйғур оқуғучилар әң көп оқуйдиған бир шәһәргә айланған иди. Бурсада уйғур оқуғучиларниң көпийиши билән хитайға қарита наразилиқ паалийәтлириму көпәйгән иди. Бурсадики уйғур оқуғучилириниң вәкили бурса шәһәр башлиқи алинур ақташ әпәнди билән көрүшүп, уйғурларниң һазирқи еғир әһвали тоғрисида мәлумат бәргән иди. Адаләт вә тәрәққият партийәсиниң бурсадики мәсули өмәр фаруқ тәмизтүрк әпәнди бу һәқтә мундақ деди: "партийәмизниң ташқий ишларға мәсул муавин рәиси, парламент әзаси әфган әла әпәнди бурсадин сайланған болғачқа, мушундақ болди. Буниң башқа бир сәвәби йоқ дәп ойлаймән."

Әнқәрәдики уйғур тәтқиқат иниститутиниң мудири, истиратегийә мутәхәссиси доктор әркин әкрәм әпәнди түркийә билән хитай оттурисидики мунасивәтни күчәйтиш үчүн тор йиғинлириниң көпләп ечиливатқанлиқини, лекин икки дөләт оттурисидики тиҗарәт соммисиға қарайдиған болса, бу хил йиғинларниң пайдиси болмайватқанлиқини көрүвалғили болидиғанлиқини баян қилди.

Доктор әркин әкрәм әпәнди түркийә билән хитай оттурисида ечилған бу хил йиғинларда шәрқий түркистан мәсилисиниң чоқум оттуриға қоюлидиғанлиқини баян қилди.
Пешқәдәм паалийәтчи, шәрқий түркистан вәқпиниң сабиқ рәиси һамутхан гөктүрк әпәнди өзиниң 56 йилдин буян түркийәдә туруватқанлиқини, бурун башқа сиясий партийәләрниң хитай комунист партийәси билән бундақ йиғинларни ечип бақмиғанлиқини баян қилди.

У йәнә адаләт вә тәрәққият партийәси билән хитай компартийәсиниң ахбаратқа йепиқ йиғин чақиришиниң нурғу нлиған кишиләрниң каллисида гуман пәйда қиливатқанлиқини баян қилди.

Түркийәни идарә қиливатқан адаләт вә тәрәққият партийәси 2017-йилиниң бешида хитай компартийәси әвәткән алаһидә һәйәт билән әнқәрәдики мәркизидә бир йиғин чақирип, кишиләрниң қаттиқ наразилиққа учиған иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт