Türkiye adalet we tereqqiyat partiyesining tor arqiliq ötküzgen yighini türk jama'etchilikining naraziliqigha uchridi

Ixtiyariy muxbirimiz erkin tarim
2021-06-04
Share
Türkiye adalet we tereqqiyat partiyesining tor arqiliq ötküzgen yighini türk jama'etchilikining naraziliqigha uchridi Türkiye adalet we tereqqiyat partiyesi bilen xitay kommunist partiyesining tor arqiliq tejribe almashturush yighinini uyushturghan türkiyening béyjingda turushluq bash elchisi emin önen. 2021-Yili iyun.
Social Media

Xitayning Uyghurlargha qarita irqiy qirghinchiliq yürgüzgenliki amérika bashta bolup bezi gherb döletliri parlaméntliri teripidin birdek békitilgen, Uyghur mesilisi xelq'aralashqan bir peytte, türkiyeni idare qiliwatqan hakimiyet béshidiki adalet we tereqqiyat partiyesining xitay komunist partiyesi bilen tor arqiliq tejribe almashturush yighini ötküzgenliki, türkiyediki öktichi partiyelerning, ammiwiy teshkilatlarning we xelq ammisining küchlük naraziliqigha uchrimaqta.

Ijtima'iy taratqulardiki xewerlerde éytilishiche, mezkur yighinni türkiyening béyjingda turushluq bash elchisi emin önen ependi uyushturghan bolup, uninggha xitay kompartiyesining mes'ulliri we türkiye adalet we tereqqyat partiyesining bezi mes'ulliri qatnashqan. Yighin axbaratqa yépiq échilghan bolup, yighinda némilerning muzakire qilin'ghanliqi melum emes.

Biz bu yighin heqqide melumat igilesh üchün yighin'gha qatnashqan adalet we tereqqiyat partiyesining mu'awin re'isi tughba erjan xanimgha iltimas qilghan bolsaqmu jawab alalmiduq. Kéyin mezkur yighin'gha ishtirak qilghan adalet we tereqqiyat partiyesi bursa wilayiti yashlar yachéykisining mes'uli ömer faruq temiztürk ependige téléfon qilduq. Bizning “Yighinda néme mesililer muzakire qilindi? Uyghur mesilisi otturigha qoyuldimu?” dégen so'alimizgha u mundaq jawab berdi: “Uyghur mesilisi shu shekilde otturigha qoyuldi. Xitay rehberliri Uyghur mesilisidin türkiye terepning bi'aram boliwatqanliqini yaxshi bilidiken. Bu uzaqta turup échilghan tor yighini idi. Yighinda ikki terepning yene bir qétim yighin ötküzüdighanliqi qarar qilindi. Bu yighinni partiyimizning tashqiy ishlargha mes'ul mu'awin re'isi mes'ul bolup chaqirdi. Lékin men bu toghriliq partiyimizning munasiwetlik rehberliridin sorighandin kéyin andin sizge tepsiliy melumat bérey.”

1-Iyun küni chaqirilghan mezkur yighin'gha adalet we tereqqiyat partiyesining bursa wilayitidiki rehberliri we bursa sheher bashliqiningmu ishtirak qilishi kishilerning kallisida so'al peyda qilmaqta. Bursa shehri 2016-yilidin kéyin Uyghur oqughuchilar eng köp oquydighan bir sheherge aylan'ghan idi. Bursada Uyghur oqughuchilarning köpiyishi bilen xitaygha qarita naraziliq pa'aliyetlirimu köpeygen idi. Bursadiki Uyghur oqughuchilirining wekili bursa sheher bashliqi alinur aqtash ependi bilen körüshüp, Uyghurlarning hazirqi éghir ehwali toghrisida melumat bergen idi. Adalet we tereqqiyat partiyesining bursadiki mes'uli ömer faruq temiztürk ependi bu heqte mundaq dédi: “Partiyemizning tashqiy ishlargha mes'ul mu'awin re'isi, parlamént ezasi efgan ela ependi bursadin saylan'ghan bolghachqa, mushundaq boldi. Buning bashqa bir sewebi yoq dep oylaymen.”

Enqerediki Uyghur tetqiqat inistitutining mudiri, istiratégiye mutexessisi doktor erkin ekrem ependi türkiye bilen xitay otturisidiki munasiwetni kücheytish üchün tor yighinlirining köplep échiliwatqanliqini, lékin ikki dölet otturisidiki tijaret sommisigha qaraydighan bolsa, bu xil yighinlarning paydisi bolmaywatqanliqini körüwalghili bolidighanliqini bayan qildi.

Doktor erkin ekrem ependi türkiye bilen xitay otturisida échilghan bu xil yighinlarda sherqiy türkistan mesilisining choqum otturigha qoyulidighanliqini bayan qildi.
Péshqedem pa'aliyetchi, sherqiy türkistan weqpining sabiq re'isi hamutxan göktürk ependi özining 56 yildin buyan türkiyede turuwatqanliqini, burun bashqa siyasiy partiyelerning xitay komunist partiyesi bilen bundaq yighinlarni échip baqmighanliqini bayan qildi.

U yene adalet we tereqqiyat partiyesi bilen xitay kompartiyesining axbaratqa yépiq yighin chaqirishining nurghu nlighan kishilerning kallisida guman peyda qiliwatqanliqini bayan qildi.

Türkiyeni idare qiliwatqan adalet we tereqqiyat partiyesi 2017-yilining béshida xitay kompartiyesi ewetken alahide hey'et bilen enqerediki merkizide bir yighin chaqirip, kishilerning qattiq naraziliqqa uchighan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet