Istanbulda échilghan Uyghur oqughuchilarning türkche nutuq maharitini yétildürüsh kursi muweppeqiyetlik axirlashti

Istanbulda échilghan türk tili maharitini yükseldürüsh kursining püttürüsh guwahnamisi tarqitish murasimigha qatnashqan türk sha'irlar. 2022-Yili 6-féwral, türkiye.

Istanbuldiki herqaysi uniwérsitétlarda oquwatqan Uyghur oqughuchilardin 35 etrapida oqughuchi, istanbulda échilghan türkchini toghra teleppuz qilish, güzel sözlesh we nutuq maharitini yétildürüsh kursigha qatnashti we 3 ay dawam qilghan kurs axirida oqush püttürüsh murasimi ötküzülüp guwahname tarqitip bérildi.

Uyghur yash sha'iri imran sada'iy bu kursning oyushturulushidiki meqsiti toghrisida toxtilip, istanbulda yashawatqan Uyghurlarning türkchini toghra teleppuz qilish, güzel sözlesh, Uyghurlarning dewa saheside bolsun, meyli xizmetke chiqqanda bolsun we yaki oqush hayatida bolsun türkche sözlerni toghra teleppuz qilish we güzel ipadileshni özleshtürüshni közde tutup bu kursni uyushturghanliqini bildürdi.

Türkiye yazghuchilar jem'iyiti istanbul shöbisining qollishi bilen échilghan bu kurs, Uyghur yash yazghuchi imran sada'iyning teshkillishi bilen ötküzülgen bolup, kursta bu sahediki tejribilik oqutquchi, sha'ir we awaz sen'etchisi özgür choban ependi léksiye bergen.

Kursantlargha oqush püttürüsh guwahnamisi tarqitish murasimi türkiye yazghuchilar jem'iyitining istanbul shöbiside 6-féwral yekshenbe küni ötküzülgen bolup, murasimgha türkiye yazghuchilar jem'iyiti istanbul shöbisi re'isi mexmut béyikli, sha'ir mexmut topbashli, özgür choban qatarliq türk sha'irlarmu qatniship shé'ir déklamatsiye qildi we Uyghurlar toghrisida söz qildi.

Oqush püttürüsh murasimida söz qilghan türkiye yazghuchilar jem'iyiti istanbul shöbisi re'isi mexmut béyikli Uyghur oqughuchilargha xitab qilip mundaq dédi: “Sherqiy türkistandiki bésim we zulumni toxtitishqa tirishayli, u yerdiki nale-peryadlarni hemmeylen birlikte pütün dunyagha nida qilish üchün bu kursqa qatniship telim aldinglar. Bu kursni püttürgen qérindashlirimiz, qeyerde bir sehne tapsa, qeyerde bir teshwiqat orni tapsa qeyerde bir mikrofon tapsa peryadlirini yangritidu, bu xizmet ularning wezipisidur”.

U sözining axirida yene, sherqiy türkistan dewasining rehberliridin biri bolghan merhum eysa yüsüp aliptékinning “Sherqiy türkistanning azadliq kürishide tunji wezipe türkiye türklirige mensuptur” dégen sözini tilgha élip ötti we “Biz her qandaq shert-shara'it astida, weziyet qandaq bolushtin qet'iynezer her da'im sherqiy türkistanning yénida bolimiz we bu mesilini her yerde mékrofonlar arqiliq nida qilimiz”, dep tekitlidi.

Biz bu heqte pikir qarashlirini élish üchün mezkur kursta léksiye bergen türk sha'iri özgür choban ependi bilen söhbet ötküzüshni telep qilghan bolsaqmu özining aldirashliq sewebidin ziyaritimizni kéyinki waqitlarda qobul qilidighanliqini bildürdi. Biraq özgür choban ependining bu kurs heqqide özining féysbok sehipiside kursqa qatnashqan Uyghur oqughuchilargha teshekkür éytip mundaq yazghan: “Tirishchanliqi, semimiyliki, ésilliqi, edep-exlaqi bilen ülgilik Uyghur qérindashlirimgha köptin köp rehmet éytimen. Köngül diyarimiz sherqiy türkistanda erkinlik shamilining yelpunishini ümid qilimiz”.

Biz bu kurs toghrisida pikir-qarashlirini élish üchün kursni uyushturghan imran sada'iy bilen söhbet élip barduq.

Imran sada'iy bu kursta deslepte 47 oqughuchi ders bashlighanliqi, bulardin 35 oqughuchining axirighiche dawam qilghanliqini we ulargha oqush püttürüsh guwahnamisi tarqitip bérilgenlikini bildürdi.

Biz yene bu kurstqa qatnashqan Uyghur oqughuchi ayishe exmet xanimning pikir-qarashlirini alduq. U, bu kursqa qatnishishining yapdiliq bolghanliqini, sözleshte özini erkin hés qilidighanliqini ipadilidi.

Ayishe exmet xanim, tilning muhim amil ikenlikini, Uyghurlar özliri yashawatqan döletlerning tilini bilishning ehmiyetlik ish ikenlikini, shuning üchün özining weten dewasni tereqqiy qildurush, küchlendürüsh we tonutush üchün bu kursqa qatnashqanliqini bildürdi.