Türkiyede aliy mektepni püttürgen 147 neper Uyghur oqughuchini tebriklesh murasimi ötküzüldi

21-Awghust shenbe küni sutuq bughraxan ilim we medeniyet wexpining uyushturushi we xelq'ara sherqiy türkistan teshkilatlar birlikining qollap-quwwetlishi bilen türkiyede ali mektepni püttürgen 147 neper Uyghur oqughuchini tebriklesh murasimi ötküzüldi.

Murasim “Qur'an kerim” tilawet qilish we istiqlal marshi oqush bilen bashlandi. Murasimda aldi bilen türkiyening sabiq parlamént ezasi, proféssur jalal erbay, xelq'ara sherqiy türksitan teshkilatlar birlikining re'isi hidayetullah oghuzxan we sherqiy türkistan ölimalar birlikining re'isi doktur atawullah shahyar, shundaqla abduqadir yapchan qatarliq kishiler söz qilip, ali mektepni püttürgen pütkül Uyghur oqughuchilarni tebriklidi we ulargha mukapat tarqitip berdi.

Yighinda aldi bilen sutuq bughraxan ilim we medeniyet wexpining idare hey'et ezasi shundaqla türkiyening sabiq parlamént ezasi, proféssur jalal erbay échilish sözi, qilip aliy mektepni püttürgen Uyghur oqughuchilarni tebriklidi.

U mundaq dédi: “Bu yil 147 neper Uyghur oqughuchi aliy mektepni püttürdi. Bulardin ikki nepiri özliri oqughan uniwéristétlerde uniwéristit boyiche birinchilik bilen oqush püttürdi. Bulardin birsi istanbul sabahettin za'im uniwéristétining oqughuchisi abdullah muhiddin oghli, yene birsi tejdid unwéristitining oqughuchisi muhemmed ömer yükseldur. Bular bizni ghururlanduridu, kelgüsidin ümid bar, istiqbal bizningdur, istiqbal kök bayraqningdur. Ewladlirimizning muweppeqiyiti bizning ghururimizdur. Allah xalisa ular téximu örlep aspirantliq we dokturluq unwani alghiche oqushni dawam qilidu. Biz ularning buningdin kéyinki muweppiqiyetliri bilen téximu ghururlinimiz, pexirlinimiz, ulargha téximu köngül bölimiz we hemmimiz xushal bolimiz, türkiye xelqimu xushal bolidu, hemmimiz birlikte sherqiy türkistanning azatliqi üchün, kök bayraqning jewlan qilip yelpün'gen künlirini körüsh üchün yolimizni dawam qilimiz.”

Yighinda xelq'ara sherqiy türksitan teshkilatlar birlikining re'isi hidayetullah oghuzxan söz qilip, aliy mektepni püttürgen Uyghur oqughuchilarni tebriklidi we ular bilen pexirlinidighanliqini bildürdi.

Hidayetullah oghuzxan sözide yene sherqiy türkistan dawasining bilimlik insanlargha éhtiyajliq ikenlikini tekitlidi. U mundaq dédi: “Bu dewa oqughan, bilimlik, qelbiy köksi dewa oti bilen yéniwatqan, yürikide dewa hés-tuyghusi bolghan, millitining özidin kütken mes'uliyitini tonup yetken yashlargha éhtiyaji bar.”

Yighinda söz qilghan sherqiy türkistan ölimalar birlikining re'isi doktur atawullah shahyar, oqush püttürge'in Uyghur oqughuchilarning buningdin kéyin weten-xelqi üchün qilishqa tégishlik wezipiliri we mes'ulliyetlirini xatirlitip ötti.

Doktur atawulla shahyar yene oqush püttürgen yashlarning sherqiy türkistan ichide éziliwatqan xelqining awazini chet ellerde anglitishi kéreklikini tekitldi.

Yighinda söz qilghan insan we medeniyetler herikiti teshkilatining re'isi kemal özden ependi, oqush püttürgen Uyghur oqughuchilarni tebriklidi. U bu yashlarning buningdin kéyinki hayatida téximu zor muweppeqiyetler qazinishqa tilekdashliq bildürdi.

U Uyghur mesilisi toghrisida toxtilip, mundaq dédi: “Biz insan we medeniyet herikiti teshkilati bolush süpitimiz bilen sherqiy türkistan dewasigha ige chiqishning qanchilik ehmiyetlik ikenlikini chüshinip yettuq. Men semimiylik bilen shuni deymenki, eger méning qolumda imkaniyet bolsa, dunyaning mesililirini hel qilalghudek küch-qudritim bolghan bolsa idi, tünji bolup sherqiy türkistan mesilisini hel qilghan bolattim, chünki dunya miqyasida bügünki künimizde téxi bundaq bir wehshiylik, bundaq bir zulum bashqa héch yerde körülüp baqmidi.”