Uyghurlarning türkiyediki ot apet rayonigha bérishi türk xelqini söyündürdi

Uyghurlar türkiyede ot apitige uchrighan antalyening manawgat nahiyesige bérip yardem bérish xizmitige qatnashmaqta. Sherqiy türkistan teshkilatlar birlikining uyushturushi bilen 36 Uyghurdin terkib tapqan yardem guruppisi ot ketken rayon'gha yétip bérip yardem xizmitige qatnishishqa bashlidi. Uyghurlarning apet rayonigha kelgenlikini körgen apet rayonidiki türk xelqi qattiq söyün'gen.

Bu heqte ziyaritimizni qobul qilghan sherqiy türkistan teshkilatlar birliki bash katipi ablet abduraxman ependi mundaq dédi: “8 Kündin buyan türkiyediki nurghun, yéza, qishlaqlar, qoy-kala, haywanlar köyüp kül boldi. Köp yerlerde ot öchürülgen bolsimu, bezi yerlerde téxi ot apiti dawam qiliwatidu. Buni körgen Uyghurlar bolupmu sherqiy türkistan teshkilatlar birlikige eza teshkilatlarning mes'ulliri bizmu ot apiti yüz bergen jaylargha bérip yardem qilsaq, ot öchürüshke qatnishiwatqan kishilerge, su toshup, tamaq qilip bérip, héch bolmisa arqa septinmu bolsa yardem qilip, türklerge ular bilen bolghan qérindashliqimizni ipadilisek dédi. Bu telepke bina'en nurghun Uyghur yashlar iltimas qilghan bolsimu, biz istanbul, enqere we konyadin bolup 36 Uyghurdin terkib tapqan yardem guruppisi antalyening manawgat rayonigha yétip kelduq”.

Ablet abduraxman ependi kelgendin kéyinla arqa septe yardem pa'aliyitige qatnishishqa bashlighanliqini bayan qilip mundaq dédi: “Biz bügün etigen yétip kélip aldi bilen yerlik yardem teshkilatliri bilen körüshtuq. Ular bilen qandaq qilalaydighanliqimiz heqqide muzakire élip bérip, ot öchürüshke qatnishiwatqan kishilerge yardem buyumlirini apirip bérish, ulargha tamaq qilip bérishni qarar qilduq”.

Xewerlerge asaslan'ghanda türkiyede 8 kündin buyan dawamlishiwatqan ot apitide 183 yerge ot ketken bolup, buning 167 yerdikisi öchürülgen bolsimu, 7 wilayette 16 yerdiki ot apiti yenila dawam qilmaqta. 8 Kün jeryanida dunya Uyghur qurultiyi we Uyghur akadémiyesi qatarliq teshkilatlarmu bayanat élan qilip, ot apitide hayatidin ayrilip qalghan kishilerge teziyelirini bildürüsh bilen birlikte, apettin maddiy ziyan'gha uchrighanlardin hal soridi, otning baldurraq öchürülüshini tilidi. D u q re'isi dolqun eysa ependi türkiyede ot ketken jaylarni qayta bostanlashturush xizmitige töhpe qoshushni oylawatqanliqini bayan qildi.

Türkiyede oxshashla waqitta köp yerde ot apiti yüz bergen bolghachqa yardem xizmetliri yétishmeywatmaqta. Shunga türkiyening eng chong yardem teshkilatliridin insaniy yardem wexpisi bilen qizil'ay yardem teshkilati bilen birlikte nurghun ammiwi teshkilatlar arqa sep yardem xizmitige ishtirak qilmaqta. Neq meydandin ziyaritimizni qobul qilghan “Türkistan téléwiziyesi” ning muxbiri muhemmed aliy ependi 5-awghust küni 3000 kishilik polu tarqitish üchün teyyarliq qiliwatqanliqini, ularni körgen türk xelqining qattiq alqishigha we söygüsige érishkenlikini bayan qildi.

Nöwette ot kétishning sewebliri we qanchilik iqtisadiy ziyan bolghanliqi heqqide türkiye hökümet da'iriliri éniqlash élip bériwatqan bolup, emma mutexessislerning perezlirige asaslan'ghanda maddiy ziyan intayin köp iken.

2019-Yili türkiyening sherqiy jenub rayonliridin malatya bilen wlazigh wilayetliride yer tewrigendimu türkiyediki sherqiy türkistan ammiwi teshkilatliri apet rayonigha bérip, polu qilip tarqitip bérip türk xelqining alqishigha érishkenidi.