Türkiyening konya shehiride sherqiy türkistan yash-ösmürler merkizi échildi

Merkizi istanbulgha turushluq sultan satuq bughraxan ilim we medeniyet wexpisi teripidin türkiyening Uyghurlar köp olturaqlashqan konya shehiride sherqiy türkistan yash-ösmürler merkizi échildi.

17‏-Öktebir düshenbe küni bu yashlar merkizining échilishi murasimi ötküzülgen bolup, murasimgha istanbuldiki sherqiy türkistan teshkilatlar birliki re'isi hidayetulla oghuzxan ependi, ölimalar birliki re'isi doktor atawulla shahyar we sultan satuq bughraxan ilim we medeniyet wexpisining re'isi abdulxaliq Uyghur ependi bashchiliqidiki hey'et konya shehridiki ammiwi teshkilat mes'ulliri we Uyghur yash-ösmürliri qatnashti. Qur'an kerim tilawiti bilen bashlan'ghan échilish murasimida aldi bilen xelq'ara sherqiy türkistan teshkilatlar birliki re'isi hidayettulla oghuzxan ependi söz qilip, sherqiy türkistan yash-ösmürler merkizining échilish meqsiti we uning Uyghur yashlirigha bolghan emeliy ünümi toghrisida toxtalghan.

Biz échilish murasimi toghrisida téximu tepsiliy melumat igilesh üchün hidayetulla oghuzxan ependi we sultan satuq bughraxan ilim we medeniyet wexpisi konya shöbisining mes'uli ablet udun ependiler bilen téléfon söhbiti élip barduq.

Ablet udun ependi échilish murasimigha 250-300 etrapida kishining ishtirak qilghanliqini, kishilerni bekla hayajanlanduridighan bir ish bolghanliqini bildürdi.

Hidayetulla oghuzxan ependi konyada sherqiy türkistan yash-ösmürler merkizini échishtiki meqsiti toghrisida toxtaldi. U, mundaq dédi: “Bu merkezni échishimizdiki meqset, hemmeylen'ge melum bolghinidek chet'ellerde nopusimiz köpeydi. Bularning ichide yash-ösmürlerning sani köpchilikni igileydu. Sherqiy türkistan dewasimu bundin kéyin bu yashlirimizgha tayinidu. Xitay hazir sherqiy türkistanning ishikini étiwélip xelqimiz bilen bolghan munasiwitimizni üzüp tashlidi, xelqimizning tilini, dinini we milliy kimlikini yoq qilishqa tirishiwatidu. Bundaq bir peytte bizge exlaqiy we milliy jehettin yaxshi yétishken ademlerge éhtiyajimiz bolghachqa bu yash-ösmürler merkizimizni qurup chiqtuq”.

Ablet udun ependi konyada échilghan yash-ösmürler merkizide élip bérishni pilanlawatqan xizmetler toghrisida melumat berdi. U, mundaq dédi: “Merkezni échishtiki meqsitimiz, konyadiki yash-ösmürlerning hem mekteptin sirtqi derslirige yétekchilik qilish, yeni mekteptin qaytip kelgendin kéyin tapshuruqlirini ishlishige yétekchilik qilish, Uyghur balilargha ana tilini we qur'an ögitishtin ibaret. Qisqisi yash-ösmürlerning penniy bilimlerni yaxshi öginip, türkiyediki yaxshi uniwérsitétlargha ötüshini emelge ashurush, hemde öz ana tilini we dinini yaxshi bilidighan, dewayimizgha yaramliq yashlarni terbiyelep chiqish üchün bu merkezni qurduq”.

Merkizi istanbuldiki sultan satuq bughraxan ilim we medeniyet wexpisi hazirghiche istanbulning 3 rayonida yash-ösmürler merkizi qurghan bolup, bundin kéyin türkiyening bashqa sheherliridimu échishni pilanlawatqaniken. Hidayetulla oghuzxan ependi bu heqte bizge melumat berdi. U, mundaq dédi: “Istanbuldimu tesis qilduq, aldimizdiki künlerde türkiyening kastamonu, enqere, qahramanmarash we bursa sheherliride yani sultan satuq bughraxan ilim we medeniyet wexpisining shöbiliri bar sheherlerde yash-ösmürler merkizini échishni oylawatimiz”.

Konya türkiyening ottura rayonigha jaylashqan bolup, burun Uyghurlar yoq idi. 2016-Yilidin kéyin bu yerge kélip jaylashqan Uyghurlarning sani 500ge yetken. Ablet udun ependi konyaning hawa kilimati Uyghur diyarigha oxshighachqa türkiyening bashqa sheherliridin bu yerge kélip olturaqlishiwatqan Uyghurlarning sanining künsayin köpiyiwatqanliqini bildürdi.