Türkiyediki Uyghurlar 2020-yilining tunji pa'aliyitini "Yéniden refah" partiyesini ziyaret qilish bilen bashlidi

Ixtiyariy muxbirimiz erkin tarim
2020-01-01
Élxet
Pikir
Share
Print
Türkiyediki Uyghur ammiwi teshkilatliridin teshkillen'gen bir hey'et türkiye "Yeniden refah" partiyesining re'isi bilen körüshti.
Türkiyediki Uyghur ammiwi teshkilatliridin teshkillen'gen bir hey'et türkiye "Yeniden refah" partiyesining re'isi bilen körüshti.
RFA/Erkin

Türkiyediki sherqiy türkistan ammiwiy teshkilatlirining 2020-yilidiki tunji pa'aliyiti "Yéniden refah" partiyesini ziyaret qilish bilen bashlandi. "Yéniden refah" partiyesining re'isi doktor fatih erbaqan ependi sherqiy türkistan dewasigha bolghan qollishini téximu kücheytidighanliqini tekitlidi.

Uyghur mesilisining xelq'arada künsayin küchiyishige egiship türkiyening her qaysi wilayet, sheher, nahiyeliridimu xitaygha qarshi naraziliq pa'aliyetliri köpeymekte. Türkiyediki bezi öktüchi partiyelermu arqa-arqidin xitayni eyiblep bayanat élan qilmaqta we türkiye hökümitini Uyghurlargha ige chiqishqa chaqirmaqta. Bu partiyelerdin biri "Yéniden refah" partiyesidur. 

Merkizi istanbuldiki Uyghur akadémiyisining ijra'iye re'isi abdulhemit qaraxan ependi, enqerediki Uyghur inistitutining mu'awin mudiri abdulkérim bughra ependi bashchiliqidiki hey'et 1-yanwar küni chüshte "Yéniden refah" partiyisining re'isi fatih erbaqan ependi bilen ishxanisida körüshti. Doktor fatih erbaqan ependi Uyghur hey'iti bilen ishxanisida 40 minut söhbet ötküzdi. Uchrishishta abdulhemit qaraxan ependi söz qilip, "Yéniden refah" partiyesining Uyghurlarni qollawatqanliqigha rehmet éyitti we bundin kéyinmu izchil halda qollishini telep qildi. Arqidin Uyghur hey'iti "Yéniden refah" partiyesining re'isi fatih erbaqan ependige Uyghur inistituti teripidin teyyarlan'ghan jaza lagérliri we kishilik hoquq depsendichiliki toghrisidiki ikki doklatni, Uyghurche "Qur'an kerim" we sherqiy türkistanning ay-yultuzluq kök bayriqini teqdim qildi.

Fatih erbaqan Uyghur hey'itige "Yéniden refah" partiyesining merhum dadisi nejmettin erbaqan mezgilidin tartip sherqiy türkistan mesilisige köngül bölüp kéliwatqan bir partiye ikenlikini, bundin kéyinmu Uyghur mesilisige köngül bölidighanliqini, 2020-yilida sherqiy türkistan heqqide köplep pa'aliyet élip baridighanliqini tekitlidi. 

Biz "Yéniden refah" partiyesning Uyghur siyasiti toghrisida téximu tepsiliy melumat igilesh üchün fatih erbaqan ependidin bezi so'allarni sorduq. "Uyghurlar hazir éghir weziyette, siz xitayni eyiblep bayanatlar élan qildingiz. Bügün sizge doklat berdi. Bu heqte némilerni démekchisiz?" dégen so'alimizgha doktor fatih erbaqan ependi mundaq jawab berdi: "Kelgenlikinglar üchün köp rehmet éytimen. Siler arqiliq türkiyediki sherqiy türkistanliqlargha hörmet we ihtiramimni bildürimen. Bizge eng muhim bolghini sherqiy türkistandiki musulman qérindashlirimizning baldurraq erkinlikke érishishishidur. Chünki sherqiy türkistanliqlar 70 yildin buyan xitayning zulumi astida yashimaqta. Xitayning zulumi bügünki künde téximu éghirlashti. Sherqiy türkistanliqlarning xitay zulumidin qutulishi üchün qolimizdin kelgenni qilidighanliqimizni her da'im tekitlep kelduq, bügünmu silerge dep öttüm."
"Bügün Uyghurlar éghir weziyette, melum bolushiche, 2 milyon etrapida Uyghur we qazaq qatarliq türkiy milletler jaza lagérlirida qamilip turmaqta. Bundaq bir weziyette 2020-yilida némelerni qilmaqchisiler?" dégen so'alimizgha "Yéniden refah" partiyesining re'isi doktor fatih erbaqan ependi mundaq dédi: "Yéqinda istanbulda sherqiy türkistan toghrisida chong pa'aliyet ötküzimiz. Mezkur pa'aliyette sherqiy türkistanning hazirqi éghir weziyitini tepsiliy anglitip, türkiye jama'etchilikining shundaqla dunya jama'etchilikining diqqitini sherqiy türkistan mesilisige tartishqa tirishimiz. Partiyemizning qurghuchisi sabiq bash ministir nejmettin erbaqanmu hayati boyiche sherqiy türkistan mesilisige köngül bölüp kelgen. Bizmu uning izidin méngip sherqiy türkistan dewasini qollashni dawam qilimiz."
Uchrishish axirlashqandin kéyin mikrofonimizni Uyghur akadémiyisining ijra'iye re'isi abdulhemit qaraxan ependige uzattuq. U "Yeniden refah" partiyesining re'isi doktor fatih erbaqan ependige rehmet éytish üchün bu ziyaretni élip barghanliqini, uchrishishning ümümlük ötkenlikini bayan qildi.

Enqerediki Uyghur tetqiqat inistitutining mu'awin re'isi abdulkérim bughra ependi türkiye siyasitige tesir körsitish üchün izchil halda partiyelerni ziyaret qilip, Uyghur inistituti teyyarlighan doklatlarni bérip turidighanliqini bayan qildi. 
Qimmetlik radiyo anglighuchilar, 2019-yilida Uyghur mesilisining gherb elliride, bolupmu amérika qoshma shtatlirida yuqiri derijide étibargha élinishigha egiship türkiyedimu tarixta körülüp baqmighan shekilde küntertipige kélishke bashlidi. Uyghur mesilisi bolupmu hazirqi éghir weziyiti türkiyediki eng chong téléwiziye qanalliridimu munazire témisigha aylandi. Abdulhemit qaraxan ependi Uyghur dewasining türkiyediki bu weziyitini qoghdap qélish, hetta téximu kücheytish üchün bundin kéyin türkiyede pa'aliyetlirini téximu kücheytidighanliqini bayan qildi. 

"Yéniden refah" partiyesi ötken yili qurulghan bolup, 1983-yili nejmettin erbaqan qurghan "Refah partiyesi" ning dawami hésablinidu.

Toluq bet