Уйғур һәйити «лимон кино ширкити» гә уйғурлар намидин рәһмәт ейитти

Ихтиярий мухбиримиз әркин тарим
2020-01-10
Елхәт
Пикир
Share
Принт
Уйғур һәйити «савашчи» намлиқ чатма телевизийә филимини ишлигән «лимон кино ширкити» ниң мудири хәйри аслан әпәнди (оңдин иккинҗи киши) билән биргә.  2020-Йили январ. Түркийә.
Уйғур һәйити «савашчи» намлиқ чатма телевизийә филимини ишлигән «лимон кино ширкити» ниң мудири хәйри аслан әпәнди (оңдин иккинҗи киши) билән биргә. 2020-Йили январ. Түркийә.
RFA/Erkin Tarim

Уйғур һәйити «савашчи», йәни «җәңчи» намлиқ чатма телевизийә филимини ишлигән «лимон кино ширкити» ниң хоҗайини хайри аслан әпәнди, филимниң синарийәсини язған язғучи суләйман чобаноғлу әпәнди вә филимдә рол алған гүл, гүлизар вә мәрйәм ханимлар билән көрүшүп уларға уйғурлар намидин рәһмәт ейитти. Уйғур һәйити уларға совғатларни берип, уйғурларниң һазирқи еғир вәзийити тоғрисида мәлумат бәрди һәмдә өз тәләплирини оттуриға қойди.

Мәзкур учришишқа истанбулда паалийәт елип бериватқан шәрқий түркистан фондиниң рәиси дохтур муһиттин җануйғур әпәнди, идарә һәйити әзаси мәмәт қәшқәрли әпәнди вә шәрқий түркистан яшлар тәшкилатиниң пәхри рәиси тәбәт йүҗәтүрк әпәндиләр қатнашқан. 

Қиммәтлик радийо аңлиғучилар, бир қанчә йилдин буян һәр йәкшәнбә күни ахшими Fox телевизийәсидә тарқитиливатқан «җәңчи» филими һазир 89-қисимға кәлгән болуп, һазирғичә 10 әтрапидики қисимлирида шәрқий түркистан мәсилиси көрситилгән иди. Өткән һәптә қоюлған филимниң әң ахирқи қисмида шәрқий түркистанниң «истиқлал марши» билән җаза лагерлириға орун бәргән болуп, түркийәдики уйғурларни қаттиқ сөйүндүргән. Дохтур муһиттин җануйғур әпәнди «җәңчи» намлиқ чатма телевизийә филмини ишлигәнләргә рәһмәт ейтиш үчүн улар билән көрүшкәнликини баян қилди. 

Муһиттин җануйғур әпәнди «лимон кино ширкити» ниң мәсули вә синарист суләйман чобаноғлу әпәндиләрниң өзлирини қизғин күтивалғанлиқини, мәзкур «җәңчи» намлиқ телевизийә филминиң бундин кейинки қисимлиридиму уйғур мәсилисигә орун беридиғанлиқини ейтқанлиқини баян қилди. 

Шәрқий түркистан яшлар тәшкилатиниң пәхри рәиси тәбәт йүҗәтүрк әпәнди учришишта нуқтилиқ һалда һазирқи уйғурларниң еғир вәзийити, болупму җаза лагерлири тоғрисида уларға мәлумат бәргәнликини, телевизийә филиминиң бундин кейинки қисимлирида җаза лагерлирини аңлитидиғанлиқини ейтқанлиқини оттуриға қойди. 

Зияритимизни қобул қилған әйса йүсүп алптекин фондиниң рәиси, доктор өмәр қул әпәнди «лимон кино ширкити» гә уйғур тарихида өткән мәшһур шәхисләр тоғрисида кино ишләшни тәләп қилғанлиқини, уларниң қизиққанлиқини баян қилип мундақ деди: «мән язған ‹шәрқий түркистан тоғрисида 100 соал' намлиқ китабимни совғат қилғандин кейин, шәрқий түркстанниң һазирқи еғир вәзийити тоғрисида мәлумат бәрдуқ. Телевизийә филминиң бундин кейинки қисимлирида шәрқий түркистанниң еғир вәзийитини, болупму җаза лагерлирида боливатқан ишларға орун беришини тәләп қилдуқ. Әң муһими уйғур тарихида өткән әйса йүсүп алптекин, осман батур, муһәммәт имин буғра вә мәсут сабири байқозиға охшаш муһим шәхисләрниң һаяти тәсвирләнгән кинолар ишлишини тәләп қилдуқ. Уларму бәкла қизиқти. Бу һәқтә кейин йәнә қайта көрүшүп пикир алмаштурмақчи болдуқ.»

Fox Телевизийәсиниң тор бетидики мәлуматларға асасланғанда, «җәңчи» намлиқ чатма телевизийә филими түркийәдә әң көп көрүрмәни бар телевизйә филими һесаблинидикән. Мәзкур қаналниң йәкшәнбә күни тарқитилидиған филим программисида уйғурға даир филимларниң көрситилиши уйғурлар мәсилисиниң түрк җамаәтчилики тәрипидин билинишидә зор әһмийәткә игә икән.

Пикирләр (0)
Share
Толуқ бәт