Түркийәниң коня шәһиридә "җинайәтчиләрни өзара өткүзүп бериш келишими" ниң мақулуқтин өтүшини тосуш паалийити башланди

Ихтиярий мухбиримиз әркин тарим
2021-01-15
Share
Түркийәниң коня шәһиридә Түркийә билән хитай арисидики "җинайәтчиләрни өзара өткүзүп бериш келишими" ниң мақуллуқтин өтүшини тосуш паалийитидин көрүнүш. 2021-Йили 13-январ, коня, түркийә.
RFA/Erkin Tarim

Түркийә ахбаратлирида түркийә билән хитай арисида түзүлгән "җинайәтчиләрни өзара өткүзүп бериш келишими" ниң 2017-йили икки дөләт министирлири арисида имзаланғанлиқи, 2019-йили түркийә президенти рәҗәп таййип әрдоған қол қойған болсиму, әмма түркийә парламентиниң мақуллуқидин өтмигәнлики хәвәр қилинған иди. Мәзкур келишимниң 26-декабир күни хитай мәмликәтлик хәлқ қурултийи тәрипидин мақулланғанлиқи һәққидики хәвәр тарқитилғандин кейин, түркийә парламентидики өктичи партийәләр, аммиви тәшкилатлар вә кәң хәлқ арисида қаттиқ ғулғула пәйда қилди. Келәчәк партийәсиниң яшлар ячейкиси түркийәниң коня вилайитидә "җинайәтчиләрни өз ара өткүзүп бериш келишими" ниң түркийә парламентида мақуллуқтин өтүшини тосуш үчүн паалийәт башлатти. Султан сатуқ буғрахан вәқпиниң һәмкарлиқида 13-январ күни башланған паалийәт 3 күн давамлишидиған болуп, имза йиғиш паалийитиниң тунҗи имзасини сабиқ баш министир, келәчәк партийәсиниң рәиси әхмәт давутоғлу қойған.

Түркийә билән хитай арисидики

Имза йиғиш паалийитини башлаш мурасимиға қоллирида түркийә билән шәрқий түркистанниң көк байриқини көтүрүвалған көп санда уйғур, түрк вә келәчәк партийәсиниң рәһбәрлири иштирак қилған.

Биз бу һәқтә техиму тәпсилий мәлумат игиләш үчүн келәчәк партийәси коня шөбиси яшлар ячейкисиниң мәсули мустафа сезәр әпәнди билән телефон сөһбити елип бардуқ.

"шәрқий түркистан бизниң ана юртимиз, шәрқий түркистанлиқларниң түрк пуқралиридин һеч қандақ пәрқи йоқ. Имза йиғиш паалийитимиз коня шәһириниң дәл оттурисидики бир мәйданда башланди. Бизниң мәқситимиз 3 күн ичидә 10 миң имза йиғиш, буниң қисқа вақит ичидә әмәлгә ашидиғанлиқиға ишинимиз, чүнки һазир кишиләр бәс-бәс келип қол қоюшқа башлиди. Биз ‹җинайәтчиләрни өзара өткүзүп бериш келишим' иниң түркийә парламентида мақуллуқтин өтүшини тосуш үчүн топланған бу имзани 15 күндин кейин мухбирларни күтүвелиш йиғини ечип түркийә парламентиға тапшуруп беримиз."

У имза топлаш паалийитидә тунҗи имзани келәчәк партийәси рәиси әхмәт давутоғлуниң қойғанлиқини баян қилип мундақ деди: "биз имза йиғиш паалийитимиз башлаштин бир күн бурун рәисимиз әхмәт давутоғлу коняға кәлгән иди. Тунҗи имзани у қойди."

Зияритимизни қобул қилған султан сатуқ буғрахан вәқпи коня шөбиси рәиси абләт удун әпәнди паалийәт тоғрисида қисқичә мәлумат бәрди.

У паалийәттә келәчәк партийәсиниң конядики мәсуллиридин һәсән әкичи әпәнди, мустафа сезәр әпәнди, осман башаран қатарлиқ кишиләрниң сөзләп паалийәтниң әһмийити тоғрисида мәлумат бәргәнликини баян қилип өтти.

Түркийәниң оттура райониға җайлашқан коня шәһири 2014-йиллардин кейин көп уйғур келип олтурақлашқан бир шәһәр. Һазир икки уйғур тәшкилати бар болуп, булар уйғур тили синипиму ачти. Конядики уйғур җәмийити мәсули сәйпидин әпәнди түркийәниң коня вилайитидә 90 аилә уйғур вә 100 әтрапида уйғур оқуғучи барлиқини, уйғурларниң бу паалийәткә актип қатнишиватқанлиқини баян қилди.

Сәйпидин әпәнди бу паалийәтниң әһмийитиниң зор икәнликини оттуриға қойди.

Әршидин әпәнди түркийә билән хитай "җинайәтчиләрни өзара өткүзүп бериш келишими" ни түзгәнликини аңлап қаттиқ әнсиригәнликини, шуңа бу паалийәткә қатнашқанлиқини, дәваға пайдиси болидиғанлиқини илгири сүрди.

Түркийәниң коня шәһиридә башланған қол қоюш паалийити 13-январ күнидин 15-январ күни ахшамғичә коня шәһәр мәркизидики чоң мәйданда өткүзүлидикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт