Türkiyening konya shehiride "Jinayetchilerni öz'ara ötküzüp bérish kélishimi" ning maquluqtin ötüshini tosush pa'aliyiti bashlandi

Ixtiyariy muxbirimiz erkin tarim
2021-01-15
Share
Türkiyening konya shehiride Türkiye bilen xitay arisidiki "Jinayetchilerni öz'ara ötküzüp bérish kélishimi" ning maqulluqtin ötüshini tosush pa'aliyitidin körünüsh. 2021-Yili 13-yanwar, konya, türkiye.
RFA/Erkin Tarim

Türkiye axbaratlirida türkiye bilen xitay arisida tüzülgen "Jinayetchilerni öz'ara ötküzüp bérish kélishimi" ning 2017-yili ikki dölet ministirliri arisida imzalan'ghanliqi, 2019-yili türkiye prézidénti rejep tayyip erdoghan qol qoyghan bolsimu, emma türkiye parlaméntining maqulluqidin ötmigenliki xewer qilin'ghan idi. Mezkur kélishimning 26-dékabir küni xitay memliketlik xelq qurultiyi teripidin maqullan'ghanliqi heqqidiki xewer tarqitilghandin kéyin, türkiye parlaméntidiki öktichi partiyeler, ammiwi teshkilatlar we keng xelq arisida qattiq ghulghula peyda qildi. Kélechek partiyesining yashlar yachéykisi türkiyening konya wilayitide "Jinayetchilerni öz ara ötküzüp bérish kélishimi" ning türkiye parlaméntida maqulluqtin ötüshini tosush üchün pa'aliyet bashlatti. Sultan satuq bughraxan weqpining hemkarliqida 13-yanwar küni bashlan'ghan pa'aliyet 3 kün dawamlishidighan bolup, imza yighish pa'aliyitining tunji imzasini sabiq bash ministir, kélechek partiyesining re'isi exmet dawut'oghlu qoyghan.

Türkiye bilen xitay arisidiki

Imza yighish pa'aliyitini bashlash murasimigha qollirida türkiye bilen sherqiy türkistanning kök bayriqini kötürüwalghan köp sanda Uyghur, türk we kélechek partiyesining rehberliri ishtirak qilghan.

Biz bu heqte téximu tepsiliy melumat igilesh üchün kélechek partiyesi konya shöbisi yashlar yachéykisining mes'uli mustafa sézer ependi bilen téléfon söhbiti élip barduq.

"Sherqiy türkistan bizning ana yurtimiz, sherqiy türkistanliqlarning türk puqraliridin héch qandaq perqi yoq. Imza yighish pa'aliyitimiz konya shehirining del otturisidiki bir meydanda bashlandi. Bizning meqsitimiz 3 kün ichide 10 ming imza yighish, buning qisqa waqit ichide emelge ashidighanliqigha ishinimiz, chünki hazir kishiler bes-bes kélip qol qoyushqa bashlidi. Biz 'jinayetchilerni öz'ara ötküzüp bérish kélishim' ining türkiye parlaméntida maqulluqtin ötüshini tosush üchün toplan'ghan bu imzani 15 kündin kéyin muxbirlarni kütüwélish yighini échip türkiye parlaméntigha tapshurup bérimiz."

U imza toplash pa'aliyitide tunji imzani kélechek partiyesi re'isi exmet dawut'oghluning qoyghanliqini bayan qilip mundaq dédi: "Biz imza yighish pa'aliyitimiz bashlashtin bir kün burun re'isimiz exmet dawut'oghlu konyagha kelgen idi. Tunji imzani u qoydi."

Ziyaritimizni qobul qilghan sultan satuq bughraxan weqpi konya shöbisi re'isi ablet udun ependi pa'aliyet toghrisida qisqiche melumat berdi.

U pa'aliyette kélechek partiyesining konyadiki mes'ulliridin hesen ekichi ependi, mustafa sézer ependi, osman basharan qatarliq kishilerning sözlep pa'aliyetning ehmiyiti toghrisida melumat bergenlikini bayan qilip ötti.

Türkiyening ottura rayonigha jaylashqan konya shehiri 2014-yillardin kéyin köp Uyghur kélip olturaqlashqan bir sheher. Hazir ikki Uyghur teshkilati bar bolup, bular Uyghur tili sinipimu achti. Konyadiki Uyghur jem'iyiti mes'uli seypidin ependi türkiyening konya wilayitide 90 a'ile Uyghur we 100 etrapida Uyghur oqughuchi barliqini, Uyghurlarning bu pa'aliyetke aktip qatnishiwatqanliqini bayan qildi.

Seypidin ependi bu pa'aliyetning ehmiyitining zor ikenlikini otturigha qoydi.

Ershidin ependi türkiye bilen xitay "Jinayetchilerni öz'ara ötküzüp bérish kélishimi" ni tüzgenlikini anglap qattiq ensirigenlikini, shunga bu pa'aliyetke qatnashqanliqini, dewagha paydisi bolidighanliqini ilgiri sürdi.

Türkiyening konya shehiride bashlan'ghan qol qoyush pa'aliyiti 13-yanwar künidin 15-yanwar küni axshamghiche konya sheher merkizidiki chong meydanda ötküzülidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet