Türkiyede Uyghur mesilisi boyiche her xil pa'aliyetler dawam qiliwatidu

• Ixtiyariy muxbirimiz arslan
  2019-03-12

Türkiye tashqi ishlar ministirliqining lagérlar mesilisi boyiche xitayni eyibligen bayanatidin kéyin türkiyede Uyghurlarni qollash pa'aliyetliri künsayin kücheymekte.

Xitayning Uyghur diyardiki jaz lagérlirini taqishi we milyonlighan bigunah tutqunlarni qoyup bérishi telep qilinip, türkiyening herqaysi sheherliride yighilish ötküzüsh, naraziliq namayishi teshkillesh we resim körgezmisi échishtek her xil pa'aliyetler dawam qilmaqta.

Türkiyediki Uyghur ziyaliylar we teshkilatlar mes'ullirining heriketke kélishi bilen türkiyediki köpligen uniwérsitétlar we ilmiy orunlarda léksiye-doklat bérish yighinliri uyushturulup, Uyghurlar mesilisi tonushturulmaqta. Türk xelqi bilen türkiyediki ammiwi teshkilatlarmu Uyghurlarni qollap her xil pa'aliyetler élip barmaqta.

Doktor erkin ekrem, doktor erkin emet, doktor abduréshit qarluq, doktor perhat qurban tengritaghli, proféssor alimjan inayet, doktor ömer qul, hidayetulla oghuzxan, mirkamil qeshqerli, abdul'ehet abduraxman, doktor eli rozi, abdulla oghuz, doktor abdusalam teklimakan qatarliq Uyghur bilim ademliri we teshkilat mes'ulliri türlük sorunlarda Uyghurlar weziyiti heqqide doklat we léksiyelerni sözlimekte.

Igilinishiche, ülkü ojaqliri, türk ojaqliri, alperen ojaqliri, insan medeniyiti herikiti, i ha ha insaniy yardem fondi, anadolo genchlik jem'iyiti, türkiye genchlik wexpisi qatarliq chong ammiwi teshkilatlar we organlar türkiyening her qaysi sheherliride Uyghurlar toghrisida mexsus yighin uyushturush, namayish élip bérish, naraziliq bayanati élan qilish, resim körgezmisi échish dégendek pa'aliyetlerni élip barmaqta.

6-Mart küni istanbul rayonidiki chayir'owa qizlar toluq ottura mektipide “Sherqiy türkistan heqiqetliri” témisida yighin échilghan bolup, yighinda Uyghur akadémiyesining bash katipi doktor perhat qurban tengritaghli mexsus doklat berdi. U doklatida sherqiy türkistanning qisqiche tarixi, hazirqi weziyiti we xitayning Uyghur diyarida qurghan jaza lagérliri shundaqla bu lagérlargha qamalghan milyonlighan bigunah Uyghur we bashqa musulman yerlik xelqler heqqide tepsiliy toxtaldi.

6-Mart küni yene türkiye genchlik wexpi istanbul kaghitxana shöbisining uyushturushi bilen “Sherqiy türkistanda iskenjiler we qanunsiz zaman” dégen témida doklat bérish yighini ötküzüldi. Bu yighin'gha “Eysa yüsüp aliptékin wexpi” ning re'isi doktor ömer qul we sherqiy türkistan wexpining mes'ulliridin abdulla oghuz teklip bilen qatniship, Uyghur mesilisi toghrisida léksiye berdi.

9-Mart küni kutahya dolmipinar uniwérsitétida “Qanighan yarimiz sherqiy türkistan” dégen témida yighin ötküzüldi. Bu yighin'gha sherqiy türkistan yéngi nesil herikitining re'isi doktor abdusalam teklimakan teklip bilen qatniship, Uyghur mesilisi toghrisida resimlik chüshendürülgen doklat teqdim qilindi.

Bügün, yeni 11-mart küni türkiyening düzje shehiridiki anadolu toluq ottura mektipide “Sherqiy türkistan mesilisi” dégen témida yighin ötküzüldi. Bu yighin'gha teklip bilen qatnashqan sherqiy türkistan ma'arip we hemkarliq jem'iyitining bash katipi abdul'ehed abduraxman söz qilip, Uyghurlarning tarixi, medeniyiti we Uyghur diyarining 1949-yilidin buyanqi paji'eliri shundaqla hörlük yolidiki küreshlirini tonushturdi.

Bu heqte ziyaritimizni qobul qilghan doktor erkin ekrem Uyghur mesilisining türkiyede keng da'iride anglitilishi we tonushturulushining muhim ehmiyiti toghrisida toxtilip ötti.

Sherqiy türkistan ma'arip we hemkarliq jem'iyitining bash katipi abdul'ehed abduraxman ependi Uyghurlar toghrisida échilghan yighinlarda asasliqi töt türlük nuqtini asas qilip, Uyghur mesilisini anglatqanliqini bildürdi.