"чақчақ әмәс, ирқий қирғинчилиқ" темисидики ахбарат елан қилиш йиғинида түркийә һөкүмитиниң сүкүттә турмаслиқи чақирилди

Ихтиярий мухбиримиз әркин тарим
2021-04-02
Share
"шәрқий түркистан мунбири" намида елип берилған "чақчақ әмәс, ирқий қирғинчилиқ" темисидики ахбарат елан қилиш йиғинидин бир көрүнүш. 2021-Йили 1-апрел. Қарабүк, түркийә.
Photo: RFA

1-Април күни түркийәниң қарабүк вилайитидә "чақчақ әмәс, ирқий қирғинчилиқ: шәрқий түркистан" дегән темида ахбарат елан қилиш йиғини өткүзүлди. Мәзкур йиғинда президент рәҗәп тайип әрдоған һөкүмитини иқтисадий мәнпәәтни дәп уйғур мәсилисидә сүкүттә турмаслиққа чақирди.

Түркийәдики көп сандики аммивий тәшкилатларниң қоллап қуввәтлиши билән "шәрқий түркистан мунбири" намида елип берилған бу ахбарат елан қилиш йиғини түркийәниң қарабүк шәһридиму өткүзүлди. 1-Април күни чүштин кейин өткүзүлгән паалийәтни инсаний ярдәм вәхписи, әнсәр вәхписи, анатолийә яшлар тәшкилати вә илим-пәнни омумлаштуруш җәмийити қатарлиқ тәшкилатлар ортақ уюштурған болуп, корона вируси түпәйли йүргүзүлүватқан чәклимиләр сәвәбидин 200 әтрапида киши иштирак қилған. Мәзкур паалийәтни уюштурған инсаний ярдәм вәхписи қарабүк шөбисиниң рәиси камал әпәнди бу һәқтики соалимизға җаваб берип, мундақ деди: "шәрқий түркистандики ирқий қирғинчилиқ тоғриисда 1-април пәйшәнбә күни түркийәниң нурғун җайлирида ахбарат елан қилиш паалийити өткүзүлди. Вирус чәклимилири түпәйлидин 150-200 әтрапида киши иштирак қилди. Паалийәткә ахбарат васитилириму қатнашти. Биз мәтбуат баянатимизни ‹биз инсаний ярдәм вәхписи болуш сүпитимиз билән бу зулум, бу ирқий қирғинчилиқ түгигичә уйғур қериндашлиримизниң авази болушқа, уларни қоллап-қувәтләшкә давам қилимиз' дәп түгәттуқ."

Камал әпәнди бу паалийәтниң мәқситиниң уйғур елида давамлишиватқан зулум вә бесимларни дуняға, болупму түркийә җамаәтчиликигә аңлитиш арқилиқ түркийә һөкүмитиниң сүкүтини бозуштин ибарәт икәнликини тәкитләп, мундақ деди: "биз түркийә һөкүмитиниң бу мәсилидә қаттиқ позитсийә билдүрүшини күттуқ вә техиғичә күтүватимиз. Лекин һөкүмәт хитай билән түзгән корона ваксинисини елиш келишимини, шундақла хитайдин алған қәрз пулларни нәзәрдә тутуп сүкүттә туруватиду дәп ойлаймән. Шуңа биз мәтбуат баянатимизда түркийә һөкүмити тиҗарий вә иқтисадий мәнпәәтни дәп қериндашлиримиз дучар болуватқан ирқий қирғинчилиққа көз юмса болмайду, дәп түгәттуқ. Биз түркийә һөкүмити таки сүкүтини бузғичә түркийәниң 81 вилайитидә бу зулумни аңлитишни давамлаштуримиз."

Ахбарат елан қилиш йиғинида хитайниң уйғур дияридики йиғивелиш лагерлириниң тақилиши үчүн чақириқ қилинғандин сирт йәнә хитайни уйғурларни асас қилған йәрлик түркий хәлқләргә елип бериватқан еғир бесим сияситини тохтитишқа чақирған. Қарабүк университети тарих кәспиниң докторанти мамутҗан әркин әпәнди ахбарат елан қилиш йиғининиң тәпсилати тоғрисида мәлумат бәрди.

Қарабүк университетиниң докторанти мамутҗан әркин әпәнди ахбарат елан қилиш йиғинида сөз қилип, аниси гүлачхан әмәт, акиси мәмәтҗан әркин қатарлиқ 33 уруқ-туғқинидин 4 йерим йилдин буян хәвәр алалмайватқанлиқини аңлатти.

Ахбарат елан қилиш йиғиға қатнашқан қарабүк университети хәлқара мунасивәтләр кәспиниң аспиранти таҗигүл ханим ахбарат елан қилиш йиғинида қолида һәр хил лузункилар, көк байрақ билән түрк байриқи көтүривалған көп сандики кишиниң иштирак қилғанлиқини, буни көргәндин кейин бәк тәсирләнгәнликини оттуриға қойди.

1-Април күни "чақчақ әмәс, ирқий қирғинчилиқ: шәрқий түркистан" дегән темидики ахбарат елан қилиш йиғини охшаш бир вақитта истанбулдики отузға йеқин район вә түркийәниң һәрқайси шәһәр вә вилайәтлиридә өткүзүлди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт