"Chaqchaq emes, irqiy qirghinchiliq" témisidiki axbarat élan qilish yighinida türkiye hökümitining sükütte turmasliqi chaqirildi

Ixtiyariy muxbirimiz erkin tarim
2021-04-02
Share
"Sherqiy türkistan munbiri" namida élip bérilghan "Chaqchaq emes, irqiy qirghinchiliq" témisidiki axbarat élan qilish yighinidin bir körünüsh. 2021-Yili 1-aprél. Qarabük, türkiye.
Photo: RFA

1-April küni türkiyening qarabük wilayitide "Chaqchaq emes, irqiy qirghinchiliq: sherqiy türkistan" dégen témida axbarat élan qilish yighini ötküzüldi. Mezkur yighinda prézidént rejep tayip erdoghan hökümitini iqtisadiy menpe'etni dep Uyghur mesiliside sükütte turmasliqqa chaqirdi.

Türkiyediki köp sandiki ammiwiy teshkilatlarning qollap quwwetlishi bilen "Sherqiy türkistan munbiri" namida élip bérilghan bu axbarat élan qilish yighini türkiyening qarabük shehridimu ötküzüldi. 1-April küni chüshtin kéyin ötküzülgen pa'aliyetni insaniy yardem wexpisi, enser wexpisi, anatoliye yashlar teshkilati we ilim-penni omumlashturush jem'iyiti qatarliq teshkilatlar ortaq uyushturghan bolup, korona wirusi tüpeyli yürgüzülüwatqan cheklimiler sewebidin 200 etrapida kishi ishtirak qilghan. Mezkur pa'aliyetni uyushturghan insaniy yardem wexpisi qarabük shöbisining re'isi kamal ependi bu heqtiki so'alimizgha jawab bérip, mundaq dédi: "Sherqiy türkistandiki irqiy qirghinchiliq toghri'isda 1-april peyshenbe küni türkiyening nurghun jaylirida axbarat élan qilish pa'aliyiti ötküzüldi. Wirus cheklimiliri tüpeylidin 150-200 etrapida kishi ishtirak qildi. Pa'aliyetke axbarat wasitilirimu qatnashti. Biz metbu'at bayanatimizni 'biz insaniy yardem wexpisi bolush süpitimiz bilen bu zulum, bu irqiy qirghinchiliq tügigiche Uyghur qérindashlirimizning awazi bolushqa, ularni qollap-quwetleshke dawam qilimiz' dep tügettuq."

Kamal ependi bu pa'aliyetning meqsitining Uyghur élida dawamlishiwatqan zulum we bésimlarni dunyagha, bolupmu türkiye jama'etchilikige anglitish arqiliq türkiye hökümitining sükütini bozushtin ibaret ikenlikini tekitlep, mundaq dédi: "Biz türkiye hökümitining bu mesilide qattiq pozitsiye bildürüshini küttuq we téxighiche kütüwatimiz. Lékin hökümet xitay bilen tüzgen korona waksinisini élish kélishimini, shundaqla xitaydin alghan qerz pullarni nezerde tutup sükütte turuwatidu dep oylaymen. Shunga biz metbu'at bayanatimizda türkiye hökümiti tijariy we iqtisadiy menpe'etni dep qérindashlirimiz duchar boluwatqan irqiy qirghinchiliqqa köz yumsa bolmaydu, dep tügettuq. Biz türkiye hökümiti taki sükütini buzghiche türkiyening 81 wilayitide bu zulumni anglitishni dawamlashturimiz."

Axbarat élan qilish yighinida xitayning Uyghur diyaridiki yighiwélish lagérlirining taqilishi üchün chaqiriq qilin'ghandin sirt yene xitayni Uyghurlarni asas qilghan yerlik türkiy xelqlerge élip bériwatqan éghir bésim siyasitini toxtitishqa chaqirghan. Qarabük uniwérsitéti tarix kespining doktoranti mamutjan erkin ependi axbarat élan qilish yighinining tepsilati toghrisida melumat berdi.

Qarabük uniwérsitétining doktoranti mamutjan erkin ependi axbarat élan qilish yighinida söz qilip, anisi gülachxan emet, akisi memetjan erkin qatarliq 33 uruq-tughqinidin 4 yérim yildin buyan xewer alalmaywatqanliqini anglatti.

Axbarat élan qilish yighigha qatnashqan qarabük uniwérsitéti xelq'ara munasiwetler kespining aspiranti tajigül xanim axbarat élan qilish yighinida qolida her xil luzunkilar, kök bayraq bilen türk bayriqi kötüriwalghan köp sandiki kishining ishtirak qilghanliqini, buni körgendin kéyin bek tesirlen'genlikini otturigha qoydi.

1-April küni "Chaqchaq emes, irqiy qirghinchiliq: sherqiy türkistan" dégen témidiki axbarat élan qilish yighini oxshash bir waqitta istanbuldiki otuzgha yéqin rayon we türkiyening herqaysi sheher we wilayetliride ötküzüldi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet